އޭއެފްސީ ކަޕްގެ ކޮލިފައިން މެޗުތަކާއި ދިރާގު ދިވެހި ޕްރިިމިއާ ލީގުގެ މެޗުތައް އެކީގައި ކުޅެން ޖެހިފައިވީ ނަމަވެސް އީގަލްސް ކުޅުންތެރިން އެ މެޗުތަކަށް ތައްޔާރުވަމުން ދަނީ ރަނގަޅު ރޫހެއްގައި ކަމަށް އީގަލްސްގެ ފޯވާޑް މުހައްމަދު ނާއިމް ބުނެފި އެވެ.
އޭއެފްސީ ކަޕްގެ ކޮލިފައިން ފުރަތަމަ ބުރުގައި މި މަހުގެ ހަތް ވަނަ ދުވަހު މާލޭގައި ކުޅުނު މެޗުން އީގަލްސް ވަނީ ބޫޓާންގެ ޗެމްޕިއަން ތިމްޕޫ ސިޓީ 2-0 އިން ބަލިކޮށްފަ އެވެ. އެ ދުވަހު އީގަލްސްގެ ދެ ވަނަ ގޯލު ޖެހީ ހިލޭ ޖެހުމަކުން ނާއިމް އެވެ. އީގަލްސްގެ ކޮލިފައިން ދެ ވަނަ މެޗުގައި މިދިޔަ ބުދަ ދުވަހު ބަންގްލަދޭޝްގައި އެ ގައުމުގެ ޑާކާ އަބަހާނީއާ ދެކޮޅަށް ކުޅެން އޮތް މެޗު މި މަހު 21 ވަނަ ދުވަހު ނޭޕާލުގައި ކުޅެން ރޭވި ނަމަވެސް އެ ދުވަހު ވެސް އެ މެޗު ކުޅެވޭގޮތްނުވި އެވެ. މިހާރު އެ މެޗު ކުޅެވޭތޯ ބަލަނީ އިންޑިއާ ނޫނީ ރާއްޖޭގަ އެވެ. ސީދާ ތާރީހެއް އަދި ފައިނަލެއް ނުވެ އެވެ.
އީގަލްސްގެ އޭއެފްސީ މެޗު ލަސްވާއިރު، ފުރުސަތު ލިބޭ ވަރަކަށް އެ ޓީމުގެ ލީގުގެ މެޗުތައް ކުޅޭނެ ކަމަށް ބެލެވެ އެވެ. އެ ގޮތުން މިދިޔަ ބުރާސްފަތި ދުވަހުގެރޭ އީގަލްސް އިން ވަނީ ގްރީން ސްޓްރީޓްސްއާ ދެކޮޅަށް ކުޅުނު މެޗުން 1-1 އިން އެއްވަރުކޮށްފަ އެވެ. އެ މެޗުގެ މޮޅު ކުޅުންތެރިއަކަށް ހޮވުނީ ނާއިމް އެވެ. އީގަލްސް އިން އެ މެޗުގައި ލީޑުނެގީ ނާއިމް ވައްދާލި ޕެނަލްޓީންނެވެ.
ނާއިމް ބުނީ ދެ މުބާރާތް އެެއްކޮށް ކުޅޭތީ އުނދަގޫތަކެއް ހުރި ނަމަވެސް އޭގެ ސަބަބުން މާ ބޮޑު ކަންތައްތަކެއް ކުރިމަތިނުވާ ކަމަށެވެ.
"ދެ މުބާރާތް އެއްކޮށް ކުޅެން ޖެހުނީމަ ވަރުބަލިކަން ވެސް އަންނާނެ. އެކަމަކު ޓީމު ޕްލޭޔަރުން ތައްޔާރީތައް ވެފައި ހުރިލެއް ރަނގަޅުވީމަ ކަންނޭނގެ އެބައި މާ ބޮޑަށް ނުދައްކަނީ. ވަރަށް ރަނގަޅު ދެން ދެ މުބާރާތް އެއް ފަހަރާ ކުޅުނީމަ ޕްލޭޔަރުން މަސައްކަތްކުރާ ރޭޓާ އެއްޗެހި ވަރަށް ރަނގަޅަށް ފެންނަނީ،" ނާއިމް ބުންޏެވެ.
މި ސީޒަނަށް ނާއިމް ނުކުތީ ކަކުލުގެ ސީރިއަސް އަނިޔާއަކުން ރިކަވާވެގެންނެވެ. އެކަމަކު ސީޒަން ފެށިތަނާ ދެ މަސް ވެސް ނުވަނިސް އަލުން ލީގު ހުއްޓާލަން ޖެހުނީ ކޮވިޑްގެ ކޭސްތައް ގިނަވާތީ އެވެ. ދެ މަސް ފަހުން އަލުން މިދިޔަ މަހު ފަހުކޮޅުގައި ލީގުގެ މެޗުތައް ފެށިއިރު، ނާއިމް ފުރަތަމަ މެޗުތަކުގައި ކުޅުނީ ބަދަލު ކުޅުންތެރިއެއްގެ ގޮތުގަ އެވެ. އަމިއްލަ ސަބަބަކާ ހުރެ އޭނާ ޓީމުގެ ފަރިތަކުރުންތަކާ ގުޅުނީ ވެސް ފަހުންނެވެ.
"ބްރޭކަކަށް ފަހު އަސްލު އެހާ ގިނަ ދުވަސްކޮށްފައި އައީމަ ފިޓްނަސް އަށް ވަރަށް ބޮޑު ބަދަލުތަކެއް އައި. ދެން ކޯޗު ކައިރީގައި ބުނަން ވެސް ބުނިން އަދި 11 ގައި ނުކުޅެވޭނެ ވާހަކަ. އެއީ އެހާ ބޮޑަށް މަސައްކަތްކޮށްފައި ބްރޭކެއް އައީމަ މީހާ އަނެއްކާ ހޭނިލަން ވެސް ދުވަސްކޮޅެއް ނަގާނެ. ބްރޭކަށް ފަހު މަސައްކަތްކޮށްގެން އަމިއްލަ އަށް ވެސް ބައެއް ކަންކަން ކޮށްގެން މި ހިސާބަށް އަނެއްކާ އާދެވިފައި މި ހުރީ،" ފޯމަކަށް އެޅެން ކުރި މަސައްކަތް ނާއިމް ކިޔައިދިނެވެ.
ރޭ ޓީސީ ކުޅުނު މެޗުން މާޒިޔާ އަތުން ބަލިވުމުން އީގަލްސް ވަނީ ފަސް ވަނަ އަށް ޖެހިލައިފަ އެވެ. ޓީސީ އޮތީ ލީގުގެ ހަ ވަަނައިގަ އެވެ. އެއީ 13 މެޗުން 13 ޕޮއިންޓް ހޯދައިގެންނެވެ. ފަސް ވަނައިގައި އޮތް އީގަލްސް އަށް 11 މެޗުން 13 ޕޮއިންޓް ލިބިފައިވާއިރު، އެ ޓީމު އެ މަގާމުގައި އޮތީ ލަނޑުގެ ތަފާތުންނެވެ.
އޭއެފްސީ ކަޕްގެ ކޮލިފައިންގައި އަބަހާނީ އަތުން މޮޅުވެއްޖެނަމަ އީގަލްސް އިން ކޮލިފައިން ޕްލޭއޮފްގައި ކުޅޭނީ އިންޑިއާގެ ބެންގަލޫރުއާ އެވެ. ގްރޫޕް ސްޓޭޖުގެ ދެކުނު އޭޝިއާ އަށް ހާއްސަ ގްރޫޕްގެ ފަހު ޖާގަ ލިބޭނީ އެ މެޗުން މޮޅުވާ ޓީމަކަށެވެ. އެ ގްރޫޕްގައި މި ވަގުތު އޮތީ ރާއްޖޭގެ މާޒިޔާ އާއި ބަންގްލަދޭޝްގެ ބަޝުންދުރާ ކިންގްސް އަދި އިންޑިއާގެ އޭޓީކޭ މޯހަން ބަގާން އެވެ. އެ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ރާއްޖޭގަ އެވެ. މެޗުތައް އޮތީ އަންނަ މަހު 14 އިން 21 ގެ ނިޔަލަށެވެ.
