އޭއެފްސީ ކަޕްގެ ކޮލިފައިން ދެ ވަނަ ބުުރުގައި ބަންގްލަދޭޝްގެ ޑާކާ އަބަހާނީން ރާއްޖޭގެ އީގަލްސްއާ ދެކޮޅަށް ކުޅެން އޮތް މެޗު އަންނަ ބުދަ ދުވަހު ނޭޕާލުގައި ކުޅޭ ގޮތަށް ހަމަޖެއްސި ނަމަވެސް އެ ދުވަހުގެ މެޗަށް އަބަހާނީ އަށް މެޗު ކުޅެން ދަތުރުކުރެވޭނެ ގޮތެއް ނުވުމުން އެ މެޗު އިންޑިއާގައި ކުޅެވޭތޯ ބަންގްލަދޭޝް ފުޓްބޯޅަ ފެޑެރޭޝަން (ބީއެފްއެފް) އިން މަޝްވަރާތައް ފަށައިފި އެވެ.
އީގަލްސް އާއި އަބަހާނީގެ މެޗު އެންމެ ފުރަތަމަ ޝެޑިއުލްކޮށްފައި އޮތީ މިދިޔަ ބުދަ ދުވަހު ބަންގްލަދޭޝްގައި ކުޅޭ ގޮތަށެވެ. އެކަމަކު ބަންގްލަދޭޝްގައި ކޮވިޑްގެ ކޭސްތައް ގިނަވެ، ލޮކްޑައުންއެއްގައި އޮތުމުން އެ ގައުމުގައި މެޗު ކުޅެވޭނެ ގޮތެއް ނުވި އެވެ. އެހެންވެ އޭއެފްސީ އަށް ޖެހުނީ ބަދަލުތަކެއް ގެންނާށެވެ. ހާލަތަށް ބަލައި އޭއެފްސީން އަބަހާނީގެ ހުށަހެޅުމާ އެއްގޮތަށް އީގަލްސް ކުޅޭ މެޗު އަންނަ ބުދަ ދުވަހު ނޭޕާލްގައި ކުޅެން ނިންމި ނަަމަވެސް އަދިވެސް ބަންގްލަދޭޝް ލޮކްޑައުންއެއްގައި އޮތުމުން ދަތުރުފަތުރު ކުރުމުގެ ހުއްދަ ނުލިބި އެންމެ ފަހުން އަންނަ ބުދަ ދުވަހު ވެސް މެޗު ކުޅެވޭގޮތް ނުވީ އެވެ.
މިދިޔަ ދެ ދުވަހު އޭއެފްސީ އާއި އަބަހާނީ އަދި ބީއެފްއެފްގެ އޮފިޝަލުން ބޭއްވި ވީޑިއޯ ކޮންފަރެންސް ބައްދަލުވުމެއްގައި ނިންމާފައިވަނީ ހާއްސަ ވިސާއެއް ހޯދުމަށް ފަހު ނަމަވެސް މި މަހު 25 ގައި ލަސްވެގެން ބެންގަލޫރުގައި އަބަހާނީ އާއި އީގަލްސް މެޗު ކުޅެވޭތޯ ބެލުމަށެވެ. އެކަން ބަންގްލަދޭޝްގެ މީޑިއާތަކަށް އަބަހާނީގެ މެނޭޖަރު ސަތުޔަޖީތު ދާސް ރޫޕޫ ވަނީ ކަށަވަރުކޮށްދީފަ އެވެ.
އިންޑިއާގައި ކުޅެވޭތޯ ބަލަނީ މިހާރު އޮތްގޮތުން މި މަހު 28 ވަނަ ދުވަހު އޭއެފްސީ ކަޕްގެ ޕްލޭއޮފް މެޗު އިންޑިއާގައި ކުޅެން ޖެހޭނެތީ އެވެ. ޕްލޭއޮފް އިން ފުރުސަތު ހޯދާފައިވަނީ ކޮލިފައިން ދެ ވަނަ ބުރުގައި ބުދަ ދުވަހު ނޭޕާލްގެ އާމީ ކްލަބް އަތުން 5-0 އިން މޮޅުވި ބެންގަލޫރު އެފްސީ އެވެ. ޕްލޭއޮފް މެޗުގައި ބެންގަލޫރު ކުޅޭނީ އަބަހާނީ އާއި އީގަލްސް ކުޅެގެން މޮޅުވާ ޓީމަކާ އެވެ. ޕްލޭއޮފް އިން މޮޅުވާ ޓީމަކަށް އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ ފަހު ޖާގަ ލިބޭނެ އެވެ.
އެ ގްރޫޕްގައި މި ވަގުތު އޮތީ ރާއްޖޭގެ މާޒިޔާ އާއި ބަންގްލަދޭޝްގެ ބަޝުންދުރާ ކިންގްސް އަދި އިންޑިއާގެ އޭޓީކޭ މޯހަން ބަގާން އެވެ. އެ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ރާއްޖޭގަ އެވެ. މެޗުތައް އޮތީ އަންނަ މަހު 14 އިން 21 ގެ ނިޔަލަށެވެ.
"އަދަދު" އަށް އެނގިފައިވާ ގޮތުގައި އިންޑިއާގައި އީގަލްސް އާއި އަބަހާނީ މެޗު ނުކުޅެވިއްޖެނަމަ އެ މެޗު ދެން ކުޅޭނީ އަންނަ މަހު މާލޭގަ އެވެ. އީގަލްސް އިން ކޮލިފައިން ފުރަތަމަ މެޗުގައި ބޫޓާންގެ ތިމްޕޫ ސިޓީ އަތުން 2-0 އިން މޮޅުވީ މާލޭގައި ކުޅެގެންނެވެ. މިއީ އީގަލްސް ތާރީހުގައި އެ ޓީމުން އޭއެފްސީ ކަޕްގައި ވާދަކުރާ ފުރަތަމަ ފަހަރެވެ.
އަބަހާނީއާ ދެކޮޅަށް ރާއްޖޭގެ ކްލަބްތަކުގެ ރެކޯޑް ރަނގަޅެވެ. އަބަހާނީ އަތުން މިހާތަނަށް ރާއްޖޭގެ ކްލަބެއް ބަލިވެފައިނުވެ އެވެ. ރާއްޖޭގެ ނިއު ރޭޑިއަންޓާއި މާޒިޔާއާ ދެކޮޅަށް އަބަހާނީ އިން ޖުމްލަ ހަ މެޗެއް ކުޅެފައިވާއިރު، ހަތަރު މެޗުން ވީ ބައްޔެވެ. އަނެއް ދެ މެޗު ނިމުނީ އެއްވަރުވެގެންނެވެ. މާޒިޔާ އިން ވަނީ މިދިޔަ އަހަރުގެ ކޮލިފައިން ދެ ވަނަ ބުރުގައި އަބަހާނީ ކަޓުވާލައިފަ އެވެ.
