ރަޝިއާގެ އިދިކޮޅު ލީޑަރު އެލެކްސީ ނަވަލްނީ ބަންދުކޮށްފައި ހުންނެވި ޖަލުން އޭނާއަށް ގުރުއާން ކިޔެވުން މަނާކޮށް ހުރަސް އަޅަމުންދާ ކަމަށް ތުހުމަތު ކުރައްވައިފި އެވެ.
ޖަލުގައި ހުކުމް ތަންފީޒު ކުރައްވަމުންދާ މުއްދަތުގައި ގުރުއާން ކިޔަވަން ބޭނުންވާ ކަމަށާއި ގުރުއާންގެ މުސްހަފެއް ހޯދަން އެދުމުން އެކަމަށް ޖަލުން ހުރަސް އަޅާފައިވާ ކަމަށް ނަވަލްނީ ވިދާޅުވި އެވެ.
ނަވަލްނީގެ ފަރާތުން އިންސްޓަގްރާމުގައި ކުރި ޕޯސްޓެއްގައި ބުނެފައި ވަނީ ޖަލުގެ އޮފިޝަލުންގެ މައްސަލަ ކޯޓަށް ހުށަހަޅުއްވާނެ ކަމަށެވެ. ގުރުއާން ރަނގަޅަށް ކިޔާ ދަސްކުރުމަކީ އަމިއްލަ ނަފްސު އިސްލާހު ކުރަން ކަނޑައެޅި ލަނޑުދަނޑިއެއް ކަމަށް އޭނާ ވިދާޅުވި އެވެ.
ނަސާރާ ދީނަށް ނިސްބަތްވާ ނަވަލްނީ މި ވަގުތު ހުންނެވީ ބަނޑުހައި ހޫނުކަމުގެ ހަޅުތާލެއްގަ އެވެ. އެއީ އޭނާއަށް ދިމާވެފައިވާ ބުރަކަށީގެ ރިހުމާއި ފައިގެ ރިހުން ބަލަން ޑޮކްޓަރުން ގެނެސްދީފައި ނުވާތީ އެވެ.
އުމުރުން 44 އަހަރުގެ ނަވަލްނީ ވިދާޅުވީ ގުރުއާނުގެ އިތުރުން އޭނާ އެދުނު އެހެން ފޮތްތައް ވެސް ގެނެސްދީފައި ނުވަނީ "ހައްދު ފަހަނަ އަޅާ ގޮސްފައިވާ ވިސްނުން ހިމެނޭތޯ ބެލުމަށް" ކަމަށް އެންގި ކަމަށެވެ. އަދި އެއީ ތިން މަސް ނަގާ މަސައްކަތެއް ކަމަށް ވަނީ ބުނެފަ އެވެ.
ނަވަލްނީއަކީ ރަޝިއާގެ ރައީސް ލެޑިމިއަ ޕޫޓިންއަށް އެންމެ ބޮޑަށް ފާޑުވިދާޅުވާ އިދިކޮޅު ސިޔާސީ ލީޑަރެވެ. އޭނާ ހައްޔަރު ކުރީ މިދިޔަ ޖެނުއަރީ މަހު ޖަރުމަނުން މޮސްކޯއަށް ވަޑައިގެންނެވި ތަނުންނެވެ.
އޭނާ ޖަރުމަނުގައި ހުންނެވީ ނާވް އޭޖެންޓު ބޭނުންކޮށްގެން ދިން ހަމަލާއެއްގައި ވިހަވުމުން ފަރުވާ ހޯއްދަވާށެވެ. އެކަމުގެ ތުހުމަތު ކުރެވެނީ ރަޝިއާ ސަރުކާރަށެވެ. އެކަމަކު ރަޝިއާއިން އެކަން ދޮގު ކުރެ އެވެ.
އޭނާ ޖަލަށް ލާފައިވަނީ 2014 ވަނަ އަހަރު ފައިސާ ލޯންޑާ ކުރި ކަމަށް ސާބިތުވެ، ކުރި ހުކުމެއްގެ ޕްރޮބޭޝަން އުސޫލާ ހިލާފަށް ގައުމުން ބޭރުގައި އުޅުމުންނެވެ. ހުކުމް ކުރީ ފެބްރުއަރީ މަހު ދެ އަހަރާ ބަޔަށެވެ.
