ލަންޑަން (އޭޕްރީލް 13) - އެމެރިކާގެ ވިޔަފާރި މަޖައްލާ ފޯބްސް އިން ކޮންމެ އަހަރަކު ނެރޭ ދުނިޔޭގެ އެންމެ އަގުބޮޑު ފުޓްބޯޅަ ކްލަބްގެ ލިސްޓުގެ އެއް ވަނަ އަށް ބާސެލޯނާ ޖެހިލައިފި އެވެ.
މިދިޔަ އަހަރުގެ ރިޕޯޓްތަކަށް ބަލައި އެކުލަވާލި ލިސްޓުގެ އެއް ވަނައިގައި ބާސެލޯނާ އޮތްއިރު، އެ ކްލަބްގެ އަގަކީ 4.76 ބިލިއަން ޑޮލަރެވެ. ބާސެލޯނާގެ ދަރަނި މިދިޔަ އަހަރެއްހާ ދުވަސް ތެރޭގައި އެއް ބިލިއަން ޑޮލަރަށް ވުރެ އިތުރުވި ނަމަވެސް އެކި ގޮތްގޮޮތުން ބަލާއިރު، އަދިވެސް އެ ޓީމުގެ އަގުބޮޑެވެ. އެއީ ސްޕޮންސަރުންގެ އެއްބަސްވުންތަކުގެ އަގުބޮޑުވުމާއި ކުޅުންތެރިންގެ ކޮންޓްރެކްޓްތަކުގެ އަގަށް ބެލުމަށް ފަހު އެވެ.
ކުރިން މި ލިސްޓުގެ އެއް ވަނައިގައި އޮތް ރެއާލް މި ފަހަރު ދެ ވަނައިގައި އޮތްއިރު، އެ ޓީމުގެ އަގަކީ 4.75 ބިލިއަން ޑޮލަރެވެ. އިނގިރޭސި ކްލަބްތަކުގެ ތެރެއިން އެންމެ ކުރީގައި އޮތީ މެންޗެސްޓާ ޔުނައިޓެޑް އެވެ. އެކަމަކު އެ ޓީމަށް މުޅި ދުނިޔޭގެ ނިސްބަތުން ލިބެނީ ހަތަރު ވަނަ އެވެ. ދުނިޔޭގެ ލިސްޓުގެ ތިން ވަނައިގައި އޮތީ މިދިޔަ އަހަރެއްހާ ދުވަސް ތެރޭ ހަ ތަށި އުފުލާލި ޖަރުމަނުގެ ބަޔާން މިއުނިކް އެވެ. ބަޔާންގެ އަގަކީ 4.125 ބިލިއަން ޑޮލަރެވެ. އަދި ޔުނައިޓެޑްގެ އަގު އުޅެނީ 4.2 ބިލިއަން ޑޮލަރުގަ އެވެ.
ޔުނައިޓެޑްގެ ފަހަތުން ފަސް ވަނައިގައި އޮތީ ލިވަޕޫލް އެވެ. ލިވަޕޫލްގެ އަގަކީ 4.1 ބިލިއަން ޑޮލަރެވެ. މެންޗެސްޓާ ސިޓީ ހަ ވަނައިގައި އޮތްއިރު، އެ ކްލަބްގެ އަގަކީ ހަތަރު ބިލިއަން ޑޮލަރެވެ. ދެން ގަދަ 10 ގެ ތެރޭގައި ހިމެނެނީ ޗެލްސީ (3.2 ބިލިއަން ޑޮލަރު)، އާސެނަލް (2.8 ބިލިއަން ޑޮލަރު)، ޕީއެސްޖީ (2.5 ބިލިއަން ޑޮލަރު) އަދި ޓޮޓެންހަމް (2.3 ބިލިއަން ޑޮލަރު) އެވެ.
މި ފަހަރުގެ ލިސްޓުގެ އެންމެ އަގުބޮޑު 10 ކްލަބްގެ ތެރޭގައި އިޓަލީގެ ޓީމެއް ނުހިމެނެ އެވެ. މީގެ ކުރިން ގަދަ 10 ގެ ތެރޭގައި އޮތް އިޓަލީގެ ޗެމްޕިއަން ޔުވެންޓަސް އަށް މިދިޔަ ދެ އަހަރު ޗެމްޕިއަންސް ލީގުގައި ރަނގަޅު ނަތީޖާތަކެއް ނުނެރެވޭތީ އެ ޓީމުގެ އަގުވަނީ ދަށް ވެފަ އެވެ.
ލިވަޕޫލުން ވަނީ މި ފަހަރު ނެރުނު ލިސްޓުގައި 88 ޕަސެންޓްގެ ކުރި އެރުމެއް ހޯދައިފަ އެވެ. އެއީ މިދިޔަ ދެ އަހަރެއްހާ ދުވަސް ތެރޭގައި އެ ޓީމުން ޗެމްޕިއަންސް ލީގާއި ޕްރިމިއާ ލީގު އަދި ކްލަބް ވޯލްޑް ކަޕް ކާމިޔާބުކޮށްފައިވާތީ އެ ކްލަބްގެ ވިޔަފާރި ޑީލްތައް ވަރުގަދަވުމުންނެވެ.
ލިސްޓަށް ބަލާއިރު ގަދަ 10 ޓީމުގެ ތެރޭގައި އިންގްލެންޑަށް ނިސްބަތްވާ ހަ ކްލަބް އެބައޮތެވެ. ގަދަ 20 ކްލަބަށް ލިސްޓު ފުޅާކޮށްލާނަމަ ދެން އިތުރުވާ އިނގިރޭސި ކްލަބްތަކަކީ އެވަޓަން އާއި ވެސްޓް ހޭމް އަދި ލެސްޓާ ސިޓީ އެވެ. މުޅި ޔޫރަޕަށް ބަލާއިރު ގަދަ 20 ޓީމުގެ ތެރޭގައި އިންޓަ މިލާނާއި އޭސީ މިލާން، ރޯމާ، ބޮރޫޝިއާ ޑޯޓްމަންޑް އަދި އެތުލެޓިކޯ މެޑްރިޑް ހިމެނެ އެވެ.
