ލޯކަލް ކައުންސިލް އިންތިހާބަށް ވެރިކަންކުރާ އެމްޑީޕީން ކުރި ކެމްޕޭން ލާމަރުކަޒުކޮށް ނިންމާލުމަށް އެ ޕާޓީގެ ލީޑަޝިޕް އއ. ރަސްދުުއަށް މިއަދު ފުރާވަޑައިގެންފި އެވެ.
ހުޅުމާލޭގެ ލަކުޑި ޖެޓީން އެމްޑީޕީގެ އިސް ބޭފުޅުން ފުރާވަޑައިގަތުމުގެ ކުރިން ނޫސްވެރިންނަށް، އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ކައުންސިލްތަކުގެ 1،500 ގޮނޑީގެ ތެރެއިން 1،000 ގޮނޑި ކާމިޔާބު ކުރެވޭނެ ކަމަށް ޔަގީންކުރައްވާ ކަމަށެވެ. އެއީ، ރާއްޖޭގެ ހަތަރު ސިޓީގެ މޭޔަރުގެ ގޮނޑި ވެސް ހިމަނައިގެން ކަމަށް ވިދާޅުވި އެވެ.
އެމްޑީޕީގެ "ރަށްވެހި ފަތިސް" ކެމްޕޭން ނިންމުން ރަސްދޫގައި މިރޭ ބާއްވަން ހަމަޖައްސާފައި އޮތީ ރަސްދޫ ފަޅު ތެރޭގަ އެވެ. ތިން ސަފާރީ އާއި ކަންނެލި އޮޑިއެއްގައި މިރޭ ބާއްވާ ޖަލްސާގައި ރައީސް އިބްރާހިމް މުހައްމަދު ސޯލިހް ވެސް ބައިވެރިވެވަޑައިގަންނަވާނެ އެވެ.
އެޗްޕީއޭގެ ގައިޑްލައިން އޮތީ ރަސްދުއަށް އަރައިފި ނަމަ ކަރަންޓީންވާން ޖެހޭ ގޮތަށެވެ. އެހެންވެ އެމްޑީޕީގެ ނިންމުމަކީ އެއްވެސް މީހަކު ރަށަށް ނުފައިބައި ސަފާރީތަކުގައި ތިބެ ލައިވްކޮށް ކެމްޕޭން ނިންމުމުގެ ޖަލްސާ ބޭއްވުމެވެ.
"ދިވެހި ރައްޔިތުންގެ ޑިމޮކުރަޓިކް ޕާޓީން އިންތިހާބުތައް ކާމިޔާބު ކުރަނީ ވަރަށް ފުޅާ ވިސްނުމެއްގައި މި ޕާޓީ އަބަދުވެސް މަސައްކަތް ކުރަމުން ދާތީ. އަދި ހަމަ އެހެންމެ މި ރާއްޖޭގެ ގިނަ ރައްޔިތުންނަށް ހުރިހާ ރައްޔިތުންނަށް އެބަ ވަރަށް ސާފުވޭ އަޅުގަނޑުމެންގެ ވިސްނުން،" ނަޝީދު ވިދާޅުވި އެވެ.
"މި ޕާޓީއަކީ ދުވަހަކު ވެސް އަންނަ އޮތް އިންތިހާބެއް ޕާޓީއަށް އުނދަގޫ ވެދާނެކަމުގެ ފިކުރު، ވިސްނުން ގެންގުޅޭ ޕާޓީއެއް ނޫން."
މި އިންތިހާބާ މެދު އެމްޑީޕީގެ މެމްބަރުންނާއި ސަޕޯޓަރުންގެ ހުރި ކަންބޮޑުވުންތަކަށް ވެސް ނަޝީދު މިއަދު ވަނީ ނުސީދާކޮށް ޖަވާބު ދެއްވައިފަ އެވެ.
އެމަނިކުފާން ވިދާޅުވީ ވަގުތުގެ އަޖަލުގައި ޖެހި ބަލާލުމުން ބައެއް ފަހަރަށް ނުތަނަވަސްކަންވާ ކަމަށެވެ. އެކަމަކު އެމްޑީޕީ އަކީ ޝަކުވާތައް އަޑުއަހާ ބައެއް ކަމަށާއި ހުރި މައްސަލަަތައް އެ ޕާޓީން ހައްލުކޮށްދެއްވާނެ ކަމަށް ވެސް ނަޝީދު ވިދާޅުވި އެވެ.
މި ޕާޓީއަކީ މި ޕާޓީގެ ވެރިންނަށް ހުޝާމަދު ކުރާ އަޑު އަހާ ޕާޓީއެއް ނޫން. މިއީ ޝަކުވާ އަޑުއަހާ ޕާޓީއެއް. އަޅުގަނޑުމެންގެ ނޭވާއަކީ ވެސް އަޅުގަނޑުމެންގެ ކާނާއަކީ ވެސް ތިބޭފުޅުންގެ ޝަކުވާ، -- ނަޝީދު
އެމްޑީޕީގެ ސިޔާސަތުތައް އަމާޒު ކުރަނީ ރައްޔިތުންނަށް ތަނަވަސް ދިރިއުޅުމެއް ހޯދައި ދިނުމަށް ކަމަށް މިއަދު ވެސް ނަޝީދު ތަކުރާރު ކުރެއްވި އެވެ.
އެމްޑީޕީން ހާހެއްހާ ގޮނޑި ނަގާނެ ކަމަށް ނަޝީދު މިއަދު ވިދާޅުވި އިރު، ރައީސް އިބްރާހިމް މުހައްމަދު ސޯލިހް ވެސް ވަނީ ކައުންސިލް އިންތިހާބުގެ 80 ޕަސެންޓް އެމްޑީޕީއަށް ކާމިޔާބު ކުރެވޭނެ ކަމަށް ވިދާޅުވެފަ އެވެ.
