އަންނަ ހޮނިހިރު ދުވަހު ބާއްވާ ލޯކަލް ކައުންސިލް އިންތިހާބުގައި ވޯޓުލުމުގެ ހައްގު ހަނިވެދާނެ ކަމުގެ ކަންބޮޑުވުން އިލެކްޝަން ކޮމިޝަން (އީސީ) އާއި ހިއުމަން ރައިޓްސް ކޮމިޝަން (އެޗްއާރްސީއެމް)އިން ފާޅުކޮށްފި އެވެ.
ކޮވިޑާ ގުޅިގެން ކައުންސިލް އިންތިހާބު ދިގުދެމިގެން ގޮސްފައިވާއިރު މިހާރު ވެސް ކޮވިޑްގެ ހާލަތު އޮތް ގޮތުން ބައެއް މީހުންނަށް ވޯޓުލުމުގެ ދަތިކަމާ ވަނީ ކުރިމަތިލާން ޖެހިފަ އެވެ. އެގޮތުން މިހާރު ވެސް ގިނަ ރަށްރަށެއް މޮނީޓަރިން ހާލަތުގައި އަރާ ފޭބުން ވަނީ މަނާކޮށްފައިވާއިރު ކަރަންޓީނުގައި ތިބި މީހުންގެ އަދަދު ވެސް ގިނަ އެވެ.
މޮނީޓަރިންގެ ހާލަތުގައި އޮތް ރަށްރަށާއި އިންތިހާބަށް އަރާ ފޭބޭނެ ކަމަށް އީސީއިން ބުނެފައިވީ ނަމަވެސް، މިހާތަނަށް އެޗްޕީއޭއިން އެކަން އިއުލާން ކޮށްފައެއް ނުވެ އެވެ. އަދި ކަރަންޓީނުގައި ތިބޭ މީހުންނަށް އެ ހުއްދަ ދޭނެ ކަމެއް ނުވަތަ ނޫން ކަމެއް ވެސް ނުބުނެވެ. ކޮވިޑަށް ޕޮޒިޓިވްވެފައިވާ މީހުންނަށް ވެސް ވޯޓުލުމުގެ އިންތިޒާމް އީސީއިން ހަމަޖައްސާފައިވީ ނަމަވެސް، އެމީހުން ވޯޓުލުމަށް ދަތުރު ކުރުމުގެ އިންތިޒާމް ހަމަޖައްސަން ޖެހެނީ އަމިއްލައަށެވެ. އެހެންވެ، އެކަމުގައި ވެސް އަމަލު ކުރާނެ ގޮތެއް ސާފު ނުވެ އެވެ.
މީގެއިތުރުން ރިސޯޓުތަކުން މީހުން ދިރިއުޅޭ ރަށްރަށަށް ދަތުރު ކުރުމާއި މާލެއިން އެހެން ރަށްރަށަށް ވޯޓުލާން ދިޔުމުގެ ފުރުސަތު އޮތް ގޮތެއް ވެސް ވަނީ ސާފު ނުވެ އެވެ.
އިލެކްޝަން ކޮމިޝަން ރައީސް އަހުމަދު ޝަރީފް މިއަދު ކުރެއްވި ޓްވީޓެއްގައި ވިދާޅުވި ގޮތުގައި ވޯޓުލުމުގެ ހައްގު އަދާކުރުމަށް އެއްވެސް ފަރާތަކުން ހުރަސްއަޅައިގެން ނުވާނެ ކަމަށާއި ވޯޓު ރަޖިސްޓްރީވެފައިވާ ތަނަކަށް ވޯޓުލާން ދިޔުމުގެ ފުރުސަތު އެޗްޕީއޭއިން ދިނުމަށް ގޮވާލާ ކަމަށެވެ.
"ރިސޯޓް ބޯއީސް ވެސް އަދި މާލެއިން ރަށްރަށަށް ވޯޓުލާން ދާ މީހުންނަށް ވެސް ފުރުސަތު ދޭންވީ،" ޝަރީފް ޓްވީޓް ކުރެއްވި އެވެ.
ކޮމިޝަންގެ ނައިބު ރައީސް އިސްމާއިލް ހަބީބު ވެސް ވިދާޅުވި ގޮތުގައި ވޯޓުދިނުމުގެ ހައްގު އަދާކުރުމަށް އެމީހަކު ރަޖިސްޓްރީވެފައިވާ ފޮށްޓަކަށް ވޯޓުލުމުގެ ފުރުސަތު އެމީހަކަށް ލިބިދޭން ޖެހޭނެ އެވެ.
ކަންބޮޑުވުންތަކާއެކު އެޗްއާރްސީއެމްއިން ވެސް މިއަދު ވަނީ އީސީ އާއި އެޗްޕީއޭއާއެކު ބައްދަލުވުމެއް ބާއްވާފަ އެވެ. އެ ބައްދަލުވުމުގައި އެ ކޮމިޝަންގެ ކަންބޮޑުވުންތައް ހިއްސާކޮށްފައިވާއިރު، އެކަމާ ގުޅޭ ގޮތުން މިރޭ ވަނީ ޓްވީޓްކޮށްފަ އެވެ.
ޓްވީޓްގައި ބުނި ގޮތުގައި، ކޮވިޑާ ގުޅިގެން ވޯޓުލުމުގެ ހައްގު ހަނިވެގެން ހިނގައިދާނެ ކަންކަން އެ ކޮމިޝަނަށް ފާހަގަވެފައިވާ ކަމާއި އެކަންކަމަށް ހައްލު ހޯދުމަށް ކޮމިޝަނުގެ ލަފާތައް ހުށަހަޅާފައިވާނެ ކަމަށެވެ. މީގެ އިތުރުން އަދިވެސް ކޮވިޑް ފެތުރެމުންދާތީ ވޯޓާ ގުޅިގެން ލިބިގެންވާ ހައްގުތަކާއެކީ ފުރިހަމަ ސިއްހަތެއްގައި ހުރުމުގެ ހައްގަކީ ވެސް މުހިންމު ހައްގެއްކަން ކޮމިޝަނުން ފާހަގަކޮށްފައިވެ އެވެ.
"އެހެންކަމުން ހެދިފައި ހުރި އުސޫލުތަކާއި އެހެނިހެން އިންތިޒާމުތަކުގެ ތެރެއިންވެސް މި ދެކަމަށް ރިއާޔަތްކުރުމުގެ މުހިންމުކަން ކޮމިޝަނުން ފަހަގަކުރަން،" ކޮމިޝަނުން ބުންޏެވެ.
