ރަޝިއާގެ ރައީސް ލެޑިމިއަ ޕޫޓިންއަށް 2036 ވަނަ އަހަރާ ހަމައަށް ވެރިކަން ކުރެއްވޭ ގޮތަށް އެކުލަވާލާފައިވާ ގާނޫނެއް އެމަނިކުފާނު ތަސްދީގު ކުރައްވައިފި އެވެ.
އެ ގާނޫނުގެ ދަށުން ހަ އަހަރުގެ އިތުރު ދެ ދައުރު ވެރިކަން ކުރުމުގެ ފުރުސަތު ޕޫޓިންއަށް ލިބިވަޑައިގަންނަވަ އެވެ. ނަމަވެސް ކޮންމެ ދައުރެއް ނިމުމުން އަލުން އިންތިހާބެއްގައި ބައިވެރިވެ ވަޑައިގަންނަވަން ޖެހޭނެ އެވެ.
އުމުރުން 68 އަހަރުގެ ރަޝިއާގެ ލީޑަރު މިހާރު ވެސް ވެރިކަން ކުރައްވާތާ 20 އަހަރަށް ވުރެ ގިނަ ދުވަސް ވެއްޖެ އެވެ. އިތުރު ދެ ދައުރަށް ހުންނެވޭ ގޮތަށް ހުށަހެޅުމުން ރައްޔިތުންގެ ބޮޑު ތާއީދެއް ލިބުނެވެ.
ޕޫޓިން ވިދާޅުވީ މިހާރު ހިނގަމުންދާ ދައުރު ނިމުމާއެކު 2024 ގައި އަލުން އިންތިހާބުގައި ވާދަކުރެއްވުމާ މެދު އަދި ގޮތެއް ނުނިންމަވާ ކަމަށެވެ.
އެމަނިކުފާނު ވިދާޅުވެފައިވަނީ ގާނޫނަށް ބަދަލު ގެންނަން ޖެހުނީ ވެރިކަމަށް ދަހިވެތިވާ މީހުންނަށް އޮތް ފުރުސަތު ކުޑަކޮށް، ގައުމުގެ ތަރައްގީގެ މަސައްކަތަށް ބާރުއެޅުމުގެ ގޮތުން ކަމަށެވެ.
ޕޫޓިން އެންމެ ފުރަތަމަ ރައީސްކަމަށް އިންތިހާބުވެ ވަޑައިގެންނެވީ 2000 ވަނަ އަހަރު އެވެ. އެ ފަހަރު ހަތަރު އަހަރުގެ ދެ ދައުރު ފުރިހަމަ ކުރެއްވި އެވެ.
އޭގެ ފަހުން 2008 ވަނަ އަހަރު ވެރިކަމަށް ވަޑައިގެންނެވީ ޕޫޓިންއަށް ވަފާތެރި ޑިމިޓްރީ މެޑްވެޑެވް އެވެ. މެޑްވެޑެވް ވަނީ ރައީސްގެ ދައުރު ހަ އަހަރަށް ދިގުދަންމާލާ ގާނޫނެއް ފާސްކުރައްވާފަ އެވެ.
އެއާއެކު ދެން އައި އިންތިހާބުގައި ޕޫޓިން އަނެއްކާވެސް ވަނީ ވާދަކުރައްވާ ކާމިޔާބު ހޯއްދަވާފަ އެވެ. އޭގެ ފަހުން 2018 ގެ އިންތިހާބުން ވެސް ކުރި ހޯއްދެވީ ޕޫޓިންވެ އެވެ.
