މިދިޔަ މަހު ޖަޕާނުގެ ހޮސްޕިޓަލެއްގައި ކޮވިޑަށް ޓެސްޓު ކުރި މީހުންގެ ތެރެއިން 70 އިންސައްތަ މީހުން، ވެކްސިނުން ލިބޭ ރައްކާތެރިކަން ކުޑަކޮށްލާ ވައިރަހުގެ މިއުޓޭޝަނަކަށް ޕޮޒިޓިވްވެއްޖެ އެވެ.
ޖަޕާނުގެ ޕަބްލިކް ބްރޯޑްކާސްޓަރު އެންއެޗްކޭއިން މިއަދު ރިޕޯޓު ކުރި ގޮތުގައި ޓޯކިޔޯ މެޑިކަލް އެންޑް ޑެންޓަލް ޔުނިވާސިޓީ މެޑިކަލް ހޮސްޕިޓަލުން ޓެސްޓު ކުރި ގިނަ ބަޔަކު ޕޮޒިޓިވްވީ ކޮވިޑް ވަައިރަހުގެ E484K މިއުޓޭޝަނަށެވެ.
"އީކް" ގެ ނަމުން ސައިންސްވެރިން އިޝާރާތް ކުރަމުންދާ މި މިއުޓޭޝަނުގެ ސަބަބުން ވައިރަހުން ހަށިގަނޑަށް ލިއްބައިދޭ ރައްކާތެރިކަން ކުޑަކޮށްލަ އެވެ.
އެންއެޗްކޭއިން ބުނީ އެ ހޮސްޕިޓަލުގައި މިދިޔަ މާޗް މަހު ކޮވިޑަށް ޓެސްޓު ކުރި ކޮންމެ 14 މީހެއްގެ ތެރެއިން 10 މީހެއްގެ ހަށިގަނޑުން ފެނުނީ ވައިރަހުގެ މި މިއުޓޭޝަން ކަމަށެވެ.
މިހާތަނަށް މި މިއުޓޭޝަނަށް ޕޮޒިޓިވްވި އެއްވެސް މީހަކު ޖަޕާނުން ބޭރަށް ދަތުރު ކުރި ކަމެއް އެނގިފައެއް ނުވެ އެވެ.
ވެކްސިނުގެ ބާރު ކުޑަކޮށްލާ މިއުޓޭޝަނެއް ޖަޕާނުން ފެނިފައި ވާއިރު، އެ ގައުމުގައި ކޭސްތަކުގެ އަދަދު ދަނީ މަޑުމަޑުން އިތުރުވަމުންނެވެ. މިދިޔަ ހުކުރު ދުވަހު ޓޯކިޔޯގައި 446 މީހުން ޕޮޒިޓިވްވި އެވެ. އެކަމަކު މިއީ މިދިޔަ ޖެނުއަރީ މަހު ޕޮޒިޓިވްވި 2،500 މީހުންނާ އަޅާ ބަލާއިރު ވަރަށް ބޮޑު ވެއްޓުމެކެވެ.
ނަމަވެސް އޮސާކާ ސިޓީއިން ވަނީ ރިކޯޑް އަދަދަކަށް އާ ކޭސް ފެނިފަ އެވެ. މިދިޔަ ހުކުރު ދުވަހު އެ ތަނުން 666 މީހުން ޕޮޒިޓިވްވި އިރު، ސިއްހީ ތަޖުރިބާކާރުން ކަންބޮޑުވެފައި ވަނީ އިނގިރޭސި ވިލާތުން އައި ކަމަށް ބެލެވޭ ސްޓްރެއިން ޖަޕާނުގެ ހުޅަނގުގައި ފެތުރޭތީ އެވެ.
އެހެން ނަމަވެސް "އީކް" މިއުޓޭޝަން ފެނުނު ހޮސްޕިޓަލުން ޓެސްޓު ކުރި އެއްވެސް މީހެއްގެ ހަށިގަނޑުގައި އިނގިރޭސިވިލާތުން ފެނުނު ކޮވިޑް ވައިރަހުގެ ސްޓްރެއިން ފެނިފައެއް ނުވެ އެވެ.
