ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވޯޓު ދިނުމުގެ ހައްގު ލިބިފައިވާ މީހުންގެ ދާއިމީ ލިސްޓު، އިލެކްޝަންސް ކޮމިޝަން (އީސީ)އިން މިއަދު އާންމުކޮށްފި އެވެ.
ގެޒެޓްގައި އާންމުކޮށްފައިވާ ވޯޓްލެވޭ މީހުންގެ ދާއިމީ ލިސްޓްގައިވާ ގޮތުން މިފަހަރުގެ އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެންވެ އެވެ. އޭގެ ތެރެއިން 5،134 މީހުންނަކީ އިންތިހާބު މި އަހަރަށް ފަސް ކުރުމުން، އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
ކުރިން ބާއްވަން އުޅުނު ތާރީހަށް ވުރެ އިންތިހާބު ފަސްވުމުން 308 ކެންޑިޑޭޓަކު ވަނީ ނަން އަނބުރާ ގެންގޮސްފަ އެވެ. އޭގެ ސަބަބުން 120 ކެންޑިޑޭޓެއް ވަނީ ވޯޓަކާ ނުލައި އިންތިހާބުވެފަ އެވެ. އެ ކެންޑިޑޭޓުން ނަން ނެގުމާއެކު މިހާރު އިންތިހާބުގައި ވާދަކުރަނީ 3،934 ކެންޑިޑޭޓުންނެވެ. އެއީ ކައުންސިލަރު ކަމަށް ވާދަކުރާ 2،264 މީހަކާއި އަންހެނުންގެ ކޮމެޓީތަކަށް ވާދަކުރާ 1،670 މީހެކެވެ.
އިންތިހާބު ބާއްވަން ކަނޑައެޅި ބަޖެޓަށް އީސީން އެދުނު މިންވަރަށް 30 އަކަށް މިލިއަން ރުފިޔާ އިތުރުކޮށްދިނުމާއެކު އިންތިހާބުގެ އެންމެ ފަހުގެ ތައްޔާރީތައް ވަމުންދާއިރު، ބަލިމަޑުކަމުގެ ހާލަތަށް ބަދަލެއް ނާދެ އެވެ. އޭގެ ބަދަލުގައި އިންތިހާބަށް އެންމެ ހަފްތާއަކަށްވެފައިވާއިރު، ހާލަތު ވަނީ އިތުރަށް ގޯސްވެފަ އެވެ.
އީސީއިން އަންނަނީ އަންނަ ހޮނިހިރު ދުވަހު ބާއްވާ އިންތިހާބުގައި ވޯޓް ލުމަށް ހާއްސަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންނެވެ. އެގޮތުން ކޮވިޑްއަށް ޕޮޒިޓިވް ވެފައިވާ މީހުންނާއި ކަރަންޓީންގައި ތިބޭ މީހުންނަށް ވެސް ވޯޓް ލެވޭގޮތް ހަމަޖައްސަން ވަނީ ނިންމައިފަ އެވެ. އަދި ކޮވިޑްގެ ޕޮޒިޓިވް ކޭސްތައް ފެނިގެން މޮނީޓަރިންގެ ހާލަތަށް ގެނެސް، އަރައިފޭބުން މަނާކޮށްފައިވާ ރަށްތަކަށް، ވޯޓުލާ ދުވަހު ދަތުރުކުރެވޭ ގޮތް ހަދަން ވަނީ މަޝްވަރާ ފަށައިފަ އެވެ.
https://adhadhu.com/article/10196
މިދިޔަ އަހަރުގެ އޭޕްރީލް މަހުގެ ކުރީކޮޅު ބާއްވަން އުޅުނު ލޯކަލް ކައުންސިލްތަކުގެ އިންތިހާބު ފަސް ކުރަން ޖެހުނީ ކޮވިޑްގެ ސަބަބުންނެވެ. އަންނަ ހޮނިހިރު ދުވަހު ހާއްސަ އިންތިޒާމުތަކެއްގެ ދަށުން އިންތިހާބު ބާއްވަނީ އެތައް ތާރީހެއް ކުރިން ކަނޑައަޅައި ފަސް ކުރުމަށް ފަހުގަ އެވެ.
