ދުނިޔޭގެ ގިނަ ގައުމުތަކެއްގައި ކޮވިޑުގެ ހާލަތު ގޯސްވެފައިވާ މި ދަނޑިވަޅުގައި ދެކުނު އިރުމަތީ އޭޝިއާއިން ލޮކްޑައުން ކުރާ ފުރަތަމަ ގައުމަކަށް ބަންގްލަދޭޝް ވެއްޖެ އެވެ.
އެ ގައުމުގެ ރޯޑް ޓްރާންސްޕޯޓް މިނިސްޓަރު އުބައިދުލް ގާދިރު އިއްޔެ އުލާނު ކުރައްވާފައިވާ ގޮތުގައި އަންނަ ހޯމަ ދުވަހުން ފެށިގެން އެއް ހަފްތާގެ ލޮކްޑައުނަކަށް ދާން ވަނީ ނިންމައިފަ އެވެ.
"ހުރިހާ އޮފީސްތަކާއި ކޯޓުތައް މި ލޮކްޑައުން ތެރޭގައި ބަންދު ނަމަވެސް ސިނާއަތްތައް ހުއްޓުމެއް ނެތި ކުރިއަށް ދާނެ،" ޕަބްލިކް އެޑްމިނިސްޓްރޭޝަނުގެ ސްޓޭޓު މިނިސްޓަރު ފަރްހާދު ހުސެއިން ވިދާޅުވި ކަމަށް ޑާކާ ޓްރިބިއުންގައި ވެއެވެ.
މިދިޔަ ބުރާސްފަތި ދުވަހު ބަންގްލަދޭޝްގައި ވަނީ ރިކޯޑް އަދަދަކަށް ކޮވިޑުގެ ކޭސްތައް ރިޕޯޓުކޮށްފަ އެވެ. އެގޮތުން އެ ދުވަހު 6،469 މީހުންނަށް މި ބަލި ޖެހުނެވެ.
ދުނިޔެއަށް ބަލިމަޑުކަން ފެތުރެން ފެށި ފަހުން މިހާތަނަށް ބަންގްލަދޭޝްގެ 617،764 މީހުން ވަނީ ޕޮޒިޓިވްވެފަ އެވެ. އަދި 9،105 މީހަކު ވަނީ މި ބަލީގައި މަރުވެފަ އެވެ.
