އެމެރިކާގެ ވޮޝިންޓަންގައި ކޮންގްރެސް ބައްދަލުވުންތައް ބާއްވާ ކެޕިޓަލް އިމާރާތް ހިމެނޭ ސަރަހައްދުގައި ދިން ހަމަލާއެއްގައި ފުލުހަކު މަރުވެ، އިތުރު ފުލުހަކަށް އަނިޔާވެއްޖެ އެވެ.
ފުލުހުން ބުނީ އެ ހަމަލާ ދިނީ ބާރަށް ދުއްވާފައި ދިޔަ ކާރެއް ސެކިއުރިޓީ ބެރިއަރުގައި ޖައްސައިގެން ކަމަށާއި އެއަށްފަހު ޑްރައިވަރު ކާރުން ނިކުމެ ވަޅިއަކުން ފުލުސް އޮފިސަރުންނަށް ހަމަލާ ދިން ކަމަށެވެ.
ރައްދުގައި ފުލުހުން ވަނީ ބަޑި ޖަހާ އެ މީހާ މަރާލާފަ އެވެ.
މިއީ ޓެރަރިޒަމާ ގުޅުން ހުރި ހަމަލާއެއް ކަމަށް ނުބެލެވޭ ކަމަށް ކަމާ ބެހޭ ފަރާތްތަކުން ވަނީ ބުނެފަ އެވެ. މި ހަމަލާ ދީފައި މި ވަނީ މިދިޔަ ޖެނުއަރީ މަހު އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަޕޯޓަރުން ކެޕިޓަލް އިމާރާތަށް ވަދެގަނެ ހަމަނުޖެހުން ހިންގާފައި ވަނިކޮށެވެ.
ކެޕިޓަލް ފުލުހުންގެ އެކްޓިން ޗީފް ޔޮގަނަންޑާ ޕިޓްމޭން ވިދާޅުވީ ވަޅީގެ ހަމަލާގައި މަރުވި ފުލުސް އޮފިސަރަކީ ފާއިތުވި 18 އަހަރު ކެޕިޓަލް ފުލުހެއްގެ ގޮތުގައި އުޅުނު ވިލިއަމް ބިލީ އެވަންސް ކަމަށެވެ.
ސީބީއެސް ނިއުސްއިން ރިޕޯޓުކުރި ގޮތުގައި އެ ހަމަލާ ދިނީ އިންޑިއާނާ ސްޓޭޓަށް ނިސްބަތްވާ އުމުރުން 25 އަހަރުގެ ނޮއާ ގްރީންސް ނަމަކަށް ކިޔާ މީހެކެވެ. އޭނާއާ ގުޅޭ ކުށުގެ ރިކޯޑެއް މީގެ ކުރިން ނެތެވެ.
މިދިޔަ މާޗް މަހު އޭނާ ފޭސްބުކްގައި ލިޔެފައިވަނީ ވަޒީފާއިން ކެނޑިފައިވާ ކަމަށާއި އޮޅިގެން ބޭނުން ކުރަމުން ދިޔަ ބޭހެއްގެ ސައިޑް އިފެކްޓް ކުރަމުންދާ ކަމަށެވެ. އަދި ކަޅު ނަސްލުގެ ދީނީ ޖަމިއްޔާ "ނޭޝަން އޮފް އިސްލާމް" އަށް ޝައުގުވެރިވާ ކަމަށް ވެސް އޭނާ ލިޔުނެވެ. ނަމަވެސް ފަހުން ވަނީ އެ ޕޯސްޓު ޑިލީޓުކޮށްފަ އެވެ.
ފޭސްބުކްއިން ނެރުނު ބަޔާނެއްގައި ބުނީ ތުހުމަތު ކުރެވޭ މީހާގެ އެކައުންޓު ސަސްޕެންޑުކޮށްފައިވާ ކަމަށާއި އޭނާއަށް ތާއީދުކޮށް ހިއްސާކުރާ ހުރިހާ ކޮންޓެންޓެއް ވެސް ފޭސްބުކް އާއި އިންސްޓަގްރާމުން ސަސްޕެންޑު ކުރާނެ ކަމަށެވެ. އެގޮތަށް އަމަލު ކުރަނީ އެ ކުންފުނީ "ޑޭންޖަރަސް އިންޑިވިޖުއަލްސް އެންޑް އޮގަނައިޒޭޝަންސް" ސިޔާސަތުގެ ދަށުންނެވެ.
އެ ހާދިސާއާ ގުޅިގެން ކެޕިޓަލް ސަރަހައްދުގެ ސަލާމަތީ ކަންކަން އޮތީ ވަރުގަދަކޮށްފަ އެވެ. ނަމަވެސް މި ވަގުތު ކޮންގްރެސް ޗުއްޓީގައި އޮތުމުން ގިނަ ސިޔާސީ ބޭފުޅުން އެ އިމާރާތުގައި އުޅެމުން ނުދެ އެވެ.
