އިންޑިއާގެ ހުޅަނގު މަހަރާޝްތްރަ ސްޓޭޓުގައި ކޮވިޑުގެ އަދަދުތައް ދަށް ނުކުރެވޭ ނަމަ ލޮކްޑައުނަކަށް ދާން ޖެހިދާނެ ކަމުގެ އިންޒާރު އެ ސްޓޭޓުގެ ޗީފް މިނިސްޓަރު ދެއްވައިފި އެވެ.
އުއްދަވް ތަކެރޭ ވިދާޅުވީ ރައްކާތެރިކަމުގެ ފިޔަވަޅުތަކާ އެއް ގޮތަށް އާއްމުން އަމަލު ކުރަމުން ނުދާ ކަމަށާއި ކުޑަ ދުވަސްކޮޅެއްގެ ތެރޭގައި ސްޓޭޓުގެ ސިއްހީ ނިޒާމު ހުއްޓުމަކަށް އައުމުގެ ބިރު އެބަ އޮތް ކަމަށެވެ.
އިއްޔެ އެކަނިވެސް މަހަރާޝްތްރަ ސްޓޭޓުން 47،828 މީހުން ކޮވިޑަށް ޕޮޒިޓިވްވި އެވެ. އިއްޔެ މުޅި އިންޑިއާއިން ޕޮޒިޓިވްވީ 81،466 މީހުންނެވެ. އަދި 469 މީހުން މަރުވި ކަމަށް ތަފާސްހިސާބުން ދައްކަ އެވެ. މިއީ މިދިޔަ ޑިސެމްބަރު މަހުގެ ފަހުން އަދަދުތައް މިހާ މައްޗަށް ދިޔަ ފުރަތަމަ ފަހަރެވެ.
"ހާލަތު ބަދަލު ނުވާ ނަމަ ކުރިއަށް އޮތް ދުވަސްތަކުގައި ފުރިހަމަ ލޮކްޑައުނަކަށް ދާން ޖެހިދާނެ،" ޓީވީ މެދުވެރިކޮށް ދެއްވި ބަޔާނެއްގައި ތަކެރޭ ވިދާޅުވި އެވެ.
އޭނާ ވިދާޅުވީ ކޮވިޑާ ދެކޮޅަށް ވެކްސިންގެ ފުރަތަމަ ޑޯޒް ޖެހުމަށް ފަހު ބައެއް މީހުން މާސްކު އެޅުން ހުއްޓާލާފައި ވާތީ ބަލި އަވަސް މިނެއްގައި ފެތުރުމަށް ބާރު ލިބެމުންދާ ކަމަށެވެ.
މިދިޔަ އާދީއްތަ ދުވަހު ތަކެރޭ ވަނީ ލޮކްޑައުންގެ ފިޔަވަޅުތައް ކަނޑައެޅުމަށް އޮފިޝަލުންނާ ހަވާލުކޮށްފަ އެވެ. ނަމަވެސް ލޮކްޑައުނަކަށް ދިޔުމުގެ ވިސްނުމާ އާއްމުން ދެކޮޅެވެ.
ޕޫނޭ ސިޓީއިން މިހާރު ވެސް ކާފިއު ހިންގަމުން ދާއިރު، ދީނީ އަޅުކަން ކުރާ މަޒުކަޒުތަކާއި ހޮޓާތަކާއި ބާތަކާއި ޝޮޕިން މޯލް އަދި ސިނަމާތައް ހުރީ ބަންދުކޮށްފަ އެވެ.
އޭގެ އިތުރުން ޓެސްޓު ކުރުން އިތުރު ކުރުމުގެ ބޭނުމުގައި ސަރުކާރުން ވަނީ ޕީސީއާރް ޓެސްޓާއި ރެޕިޑް އެންޓިޖެން ޓެސްޓުގެ އަގުތައް ތިރިކޮށްފަ އެވެ.
ކޮވިޑުގެ ބަލިމަޑުން ފެތުރެން ފެށި ފަހުން މިހާތަނަށް އިންޑިއާއިން 12.2 މިލިއަން މީހުން ވަނީ ޕޮޒިޓިވްވެފަ އެވެ. އަދި 163،000 އަށް ވުރެ ގިނަ މީހުން ވަނީ މި ބަލީގައި މަރުވެފަ އެވެ.
އެމެރިކާ އާއި ބްރެޒިލްއަށް ފަހު ކޮވިޑުގެ ހާލަތު ތިންވަނައަށް އެންމެ ގޯސްކޮށް އޮތް ގައުމަކީ އިންޑިއާ އެވެ.
