މައްސަލަތައް ނިމޭ ގޮތުން ކޮންމެ ފަހަރަކު މަގާމުން ވަކި ކުރަން މަސައްކަތް ކުރާނަމަ މިނިވަން ކަމާއެކު މަސައްކަތް ކުރުމަށް ހުރަސްއެޅިގެން ދާނެ ކަމަށް އެންޓި ކޮރަޕްޝަން ކޮމިޝަން (އޭސީސީ)ގެ ރައީސް މަރިޔަމް ޝިއުނާ ވިދާޅުވެއްޖެ އެވެ.
ޝިއުނާ މިހެން ވިދާޅުވީ ކޮވިޑްގެ އެންމެ ގޯސް ހާލަތަށް ތައްޔާރުވުމަށް ސަރުކާރުން ހޯދަން އުޅުނު ވެންޓިލޭޓަރުތަކުގެ މައްސަލާގައި އިހުމާލުވި މީހުންނަށް ދައުވާ ކުރެވެން ނެތް ކަމަށް ނިންމަވާފައިވާތީ، މަޝްރަހު ހޫނުވެފައިވާ ދަނޑިވަޅެއްގަ އެވެ.
އެ މައްސަލާގައި އޭސީސީގެ ތަހުގީގުގެ ފެންވަރެއް ނެތް ކަމަށް އެމްޑީޕީގެ ބައެއް އިސް ބޭފުޅުން ވެސް ތުހުމަތު ކުރައްވާފައިވާއިރު އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވަނީ އޭސީސީ ފެއިލްވެއްޖެ ކަމަށް ވިދާޅުވެ، ކޮމިޝަންގެ ރައީސްގެ އިތުބާރު ނެތް ކަމަށް ހުށަހަޅަން ފެންނަ ކަމަށް ވިދާޅުވެފަ އެވެ.
އެކަމަށް އިޝާރަތް ކުރައްވާ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝިއުނާ ވިދާޅުވީ، އޭސީސީއިން މަސައްކަތް ކުރަމުން ދަނީ ކޮރަޕްޝަންގެ މައްސަލަތަކުގައި ފިޔަވަޅު އަޅައި އެކަމުގައި ކާމިޔާބު ހޯދުމަށް ކަމަށެވެ. ނަމަވެސް ބައެއް މައްސަލަތައް އެންމެ ފުރިހަމައަށް ނުގެންދެވިދާނެ ކަމާއި އަދި ހިޔާލު ތަފާތުވާ މައްސަލަތައް ވެސް އަންނާނެ ކަމަށެވެ. އެފަދަ ކޮންމެ ހާލަތެއްގައި އިތުބާރު ނެތް ކަމުގެ މައްސަލަ ވެއްދުމާ ގުޅޭ ގޮތުން މަޝްވަރާ ކުރުމަކީ ހިތާމަ ކުރައްވާ ކަމެއް ކަމަށް ޝިއުނާ ވިދާޅުވި އެވެ.
"މައްސަލައެއްގެ ނިމުން އަންނަ ގޮތަކުން ކޮންމެ ފަހަރަކު އަޅުގަނޑުމެން މަގާމުން ދުރުކުރަންޖެހޭ ކަމަށް ވެއްޖެއްޔާ މިގޮތަށް މަސައްކަތްކުރުމަކީ އަޅުގަނޑުމެންނަށް ވަރަށް އުނދަގޫ ކަމަކަށް ވާނެ، އެއީ މިނިވަންކަމާއެކު މަސައްކަތް ކުރަން އެޅޭ ހުރަހެއް ކަމަށް އަޅުގަނޑުމެން ގަބޫލު ކުރަނީ،" ޝިއުނާ ވިދާޅުވި އެވެ.
ވެންޓިލޭޓަރުގެ މައްސަލާގައި ހިނދިގެން ގޮސްގެންވާނެ މައްސަލައެއް ނޫންކަން ފާހަގަ ކުރައްވަމުން ކޮމިޝަންގެ ރައީސް ޝިއުނާ ވިދާޅުވި ގޮތުގައި ވެންޓިލޭޓަރު މައްސަލާގައި އޭސީސީއިން ދޫނުދޭނެ އެވެ. ޕީޖީއަށް މައްސަލަ ރިވިއު ކުރަން ހުށަހެޅުމުގެ އިތުރުން އެކަމާ ގުޅޭ ކަންކަން ރައްޔިތުންގެ މަޖިލީހުގެ ކޮމިޓީތަކާއެކު ކުރައްވާނެ ކަމަށް ވެސް ވިދާޅުވި އެވެ.
ޝިއުނާ ވިދާޅުވީ ބައެއް މައްސަލަތަކުގައި އޭސީސީ އާއި ޕީޖީއާ ދެމެދު ހިޔާލު ތަފާތުވުންތައް އޮންނާނެ ކަމަށާއި އެއީ މައްސަލައެއް ނޫން ކަމަށެވެ. ނަމަވެސް ދެ މުއައްސަސާގެ އަމާޒަކީ މައްސަލަތައް ކާމިޔާބު ކުރުން ކަމަށާއި އެހެންކަމުން އެ މަގުން މަސައްކަތް ކުރާނެ ކަމަށެވެ. މި މައްސަލާގެ ތަހުގީގަށް އެއްވެސް ފަރާތެއް ނުފޫޒެއް ވަދެފައި ނޯންނާނެ ކަމާއި އެ ޖާގަ ވެސް ނުދެއްވާކަން ވެސް ފާހަގަ ކުރެއްވި އެވެ. އަދި ދައުވާ ކުރުމުގެ މަރުހަލާގައި ޕީޖީއަށް ވެސް އެފަދަ ނުފޫޒުތަކެއް އޮތް ކަމަށް ގަބޫލު ނުކުރެއްވޭ ކަމަށް ޝިއުނާ ވިދާޅުވި އެވެ.
ޝިއުނާގެ އިތުބާރު ނެތް ކަމުގެ މައްސަލައަށް ރައީސް ނަޝީދު ތާއިދު ކުރައްވާފައިވާތީ އެމްޑީޕީ ޕީޖީ ގްރޫޕްގެ ބައްދަލުވުމެއް ބޭއްވި އެވެ. ޝިއުނާގެ އިތުބާރު ނެތް ކަމުގެ މައްސަލަ ވައްދަން އުނގޫފާރު ދާއިރާގެ މެމްބަރު މުހައްމަދު ވަހީދު ހުށަހެޅުއްވި ހުށަހެޅުމަށް ލިބުނީ 13 ވޯޓެވެ. އެހެންވެ އެކަން އެގޮތަށް ކުރެވޭ ގޮތެއް ނުވި އެވެ.
