ޓެކްނޯ ސާފް ޗެމްޕިއަންޝިޕް 2026 ގެ ގްރޫޕް އޭގައި މިރޭ ބޫޓާނުން 2-2 އިން ސްރީ ލަންކާއާ އެއްވަރުކުރިއިރު، މި ނަތީޖާއާ އެކު، މި ފަަހަރުގެ މުބާރާތް ހޯސްޓްކުރާ ބަންގްލަދޭޝް އަށް ސެމީ ފައިނަލުން ޖާގަ ލިބިއްޖެ އެވެ.
ބަންގްލަދޭޝް އަކީ މި ފަހަރުގެ ސާފް ޗެމްޕިއަންޝިޕްގެ ސެމީ ފައިނަލް ކަށަވަރުކުރި ދެ ވަނަ ގައުމެވެ. ޕާކިސްތާނުން ވަނީ ގްރޫޕް ބީގައި މިއަދު ހަވީރު 3-0 އިން ރާއްޖެ ބަލިކޮށް މުބާރާތުގެ ސެމީ ފައިނަލަށް ދަތުރުކޮށްފަ އެވެ.
ބޫޓާނުން މުބާރާތުގައި ކުޅުނު ފުރަތަމަ މެޗުން ބަންގްލަދޭޝް އަތުން ވަނީ 1-0 އިން ބަލިވެފަ އެވެ. އެހެންވެ، އެ ޓީމަށް ގްރޫޕްގައި ކުޅެން ޖެހޭ ފަހު މެޗުގައި މިރޭ ސްރީ ލަންކާ ކައިރީގައި ނަތީޖާ ނެރެން އޮތީ މަޖުބޫރުވެފަ އެވެ.
ޑާކާ ނެޝަނަލް ސްޓޭޑިއަމްގައި މިރޭ ކުޅުނު މެޗުގައި ލީޑުނެގީ ވެސް ބޫޓާނުންނެވެ. އެ ގޮތުން، މެޗުގެ 34 ވަނަ މިނިޓްގައި ބޫޓާންގެ ޑާވާ ޝެރިން ވަނީ ލިބުނު ފުރުސަތުގެ ބޭނުންހިފައި، ބޫޓާނަށް ލީޑުނަގައިދީފަ އެވެ. އެކަމަކު، ބޫޓާނަށް ލީޑުގައި އޮވެވުނީ މިނިޓެއްހާއިރު އެވެ. ލަންކާ ޓީމަށް ކުޅޭ އޮސްޓްރޭލިއާ ދަަރިކޮޅަށް ވެސް ނިސްބަތްވާ އޮލިވާ ކެލާޓް އޭރިއާ ކައިރިން ގޯލުގެ ތިރީ ކަނަށް ބޯޅަ ފޮނުވާލައިގެން ލަންކާ އަށް އެއްވަރުކޮށްދިނެވެ.
އެއްވަރުކުރި ގޯލު ޖެހުމަށް ފަހު، ލަންކާ އިން ކުރިއަށް ޖެހިގެން ކުޅެން ފަށައި، އެޓޭކް އިތުރަށް ވަރުގަދަކުރި އެވެ. އެ ގޮތުން، މެޗުގެ 43 ވަނަ މިނިޓްގައި އޭރިއާތެރެއަށް ހުރަސްވި ބޯޅައަކުން ވަސީމް ރަޒީކް ބޮލުން ޖެހި ގޯލާ އެކު، ލަންކާ އިން ވަނީ މެޗުގައި ލީޑުނަގައިފަ އެވެ.
ބޫޓާން ޓީމުން ދެ ވަނަ ހާފުގައި ފުރަތަމަ ހާފަށް ވުރެން ރަނގަޅަށް މަސައްކަތްކޮށްގެން ކުޅުނެވެ. އޭގެ ނަތީޖާ ވެސް އެ ޓީމަށް ދިޔައީ ރަނގަޅަށެވެ. އެ ގޮތުން، މެޗުގެ 76 ވަނަ މިނިޓްގައި ބޫޓާން ފުޓްބޯޅައިގެ ތަރި، ތަޖުރިބާކާރު ކުޅުންތެރިޔާ، ޗެންޗޯ ގެޔެސްޓެން ވަނީ ލިބުނު ފުރުސަތުގައި ގޯލު ޖަހައި އެއްވަރުކޮށްފަ އެވެ. ލަންކާ، އޭރިއާތެރެއިން ޗެންޗޯ އަށް ލިބުނު ބޯޅަ ވަނީ ގޯލުގެ މަތީ ދާގަނޑަށް އަމާޒުކޮށްލައިފަ އެވެ.
މި މެޗުގެ ނަތީޖާއާ އެކު، ބަންގްލަދޭޝް އެއް ވަނައިގައި އޮތީ އެއް މެޗުން ތިން ޕޮއިންޓް ހޯދައިގެންނެވެ. ދެ ވަނައިގައި އޮތް ސްރީ ލަންކާ އަށް އެއް މެޗުން އެއް ޕޮއިންޓް ލިބިފައިވާއިރު، ތިން ވަނައިގައި އޮތް ބޫޓާނަށް ވަނީ ޕޮއިންޓެއް ލިބިފަ އެވެ. މި ގްރޫޕްގައި ބާކީ އޮތީ ބަންގްލަދޭޝް އާއި ލަންކާ ބައްދަލުކުރާ މެެޗެވެ. އެ މެޗުން ލަންކާ އިން ޕޮއިންޓެއް ހޯދިޔަސް ސެމީ ފައިނަލުން ޖާގަ ލިބޭނެ އެވެ. އެކަމަކު، ބަންގްލަދޭޝް އެ މެޗުން ދެ ގޯލުގެ ފަރަގަކުން މޮޅުވެއްޖެނަމަ، ބޫޓާނަށް ސެމީން ޖާގަ ލިބޭނެ އެވެ.
