ރާއްޖޭގެ ތަރައްގީ ހޯދެން އޮތީ މާލޭގައި ތިބެގެން ނޫން ކަމަށާއި އެހެން އެއްވެސް ތަނެއްގައި ނެތް މިންވަރަށް ރަށްރަށުގައި ވިޔަފާރީގެ ފުރުސަތުތައް ހުޅުވިފައިވާ ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީިޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
"ރަށްވެހި ތަރައްގީ" ގެ ނަމުގައި ބާއްވާ އިންވެސްޓްމަންޓު ފޯރަމަކީ ނަޝީޑު އެމްޑީޕީގެ ޗެއާޕާސަންގެ މަގާމާ އަލުން ހަވާލުވެވަޑައިގަތުމަށްފަހު އުފެއްދެވި ޕްރޮޖެކްޓްސް އޮފީހުގެ ބެލުމުގެ ދަށުން ބާއްވާ ފޯރަމެކެވެ. އެ އޮފީހުން ވަނީ އެމްޑީޕީ މެޖޯރިޓީ އޮތް ކައުންސިލްތަކާއެކު މަސައްކަތްކޮށް ރަށްރަށުގައި އިންވެސްޓުކުރެވިދާނެ ޕްރޮޖެކްޓުތައް ދެނެގަނެ އެ ޕްރޮޖެކްޓުތަކާ ގުޅޭ ލިޔެކިޔުންތައް ތައްޔާރުކޮށްފަ އެވެ.
މިއަދުގެ ފޯރަމްގައި 40 އަށްވުރެ ގިނަ ޕްރެޒެންޓޭޝަން ހުށަހަޅާއިރު ފޯރަމް ފެށުމުގެ ރަސްމިއްޔާތުގައި ވާހަކަ ދައްކަވަމުން ނަޝީދު ވަނީ ކައުންސިލްތަކަށް އިތުރު ބާރުތައް ދޫކޮށްލުމަށް ގޮވާލައްވާފަ އެވެ.
"ރާއްޖޭގެ ތަރައްގީ ދެން ހޯދެން އޮތީ މާލޭގައި ތިބެގެންނެއް ނޫނޭ، އަޅުގަނޑު އުންމީދުކުރަން އެމްޑީޕީގެ ސަރުކާރެއްގައި އެއްވެސް ޕްރޮޖެކްޓެއް ނުހިންގާނެ ކަމަށް މާލޭގައި. ހުރިހާ ކަމެއް ހިންގަން ކައުންސިލްތަކަށް ދޭންވީ،" ނަޝީދު ވިދާޅުވި އެވެ.
އެމްޑީޕީއަށް 2028 ގައި ރައްޔިތުން ވޯޓެއް ދޭނީ އެ ޕާޓީއާ އިދިކޮޅު ފަރާތްތަކާ ޒުވާބުކޮށްގެން ނޫނީ ބަދުބަސް ބުނެގެން ނޫން ކަމަށާއި އޭގެ ބަދަލުގައި އެމްޑީޕީން ކަންކަން ޑެލިވާ ކުރަން ޖެހޭ ކަމަށް ނަޝީދު ވިދާޅުވި އެވެ. ސަރުކާރުން ހުރަސް އެޅިޔަސް ކައުންސިލްތަކުން މަސައްކަތް ކުރަން ޖެހޭ ކަމަށް ނަޝީދު ވިދާޅުވި އެވެ.
"އަޅުގަނޑުމެން އެބަޖެހޭ ޑެލިވާ ކުރަން. އަޅުގަނޑުމެން އެބަ ޖެހޭ ކަމެއް ކުރަން. މި ރާއްޖޭގެ ހަތަރު ސިޓީ ކައުންސިލް އޮތީ އެމްޑީޕީގައި. އެ މީހުންނަކަށް ނެތް މިއަދު ތިބެވޭކަށް، ސަރުކާރުން އެހެން ހެދީއޭ މިހެން ހެދީއޭ، ސަރުކާރުން ހަދާނެ އެހެންމިހެން،" ނަޝީދު ވިދާޅުވި އެވެ.
މިއީ ރާއްޖޭގެ ސިޔާސީ ޕާޓީއަކުން ބާއްވާ ފުރަތަމަ އިންވެސްޓްމަންޓު ފޯރަމެވެ. އެމްޑީޕީގެ ކޮންގްރެސްގައި މިއަދު މައިގަނޑު ކަމެއްގެ ގޮތުގައި އެ ފޯރަމެވެ.
