ޖަޕާނުގައި މިހާރު ކުރިއަށްދާ 20 ވަނަ އޭޝިއަން ގޭމްސްގެ ސްވިމިން އިވެންޓުގައި، ރާއްޖޭގެ ގައުމީ ސްވިމިން ޓީމުގެ މުހައްމަދު ރިހާން ޝިހާމް، ފިރިހެނުންގެ ލޯންގް ކޯސް 400 މީޓަރު އިންޑިވިޖުއަލް މެޑްލޭ އިވެންޓުގެ ޤައުމީ ރެކޯޑް އާ ކޮށްފި އެވެ.
ގައުމީ ގިނަ ރެކޯޑްތަކެއް މީގެ ކުރިން ވެސް އާ ކޮށްފައިވާ ރިހާން، ފިރިހެނުންގެ ލޯންގް ކޯސް 400 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑް އާކޮށްފައިވަނީ އޭޝިއަން ގޭމްސްގެ މި އިވެންޓް، 05.06.92 އިން ފުރިހަމަކޮށްގެންނެވެ.
މި ރެކޯޑް އެންމެފަހުން ވެސް އާކޮށްފައިވަނީ ރިހާން އެވެ. އެއީ، ސްކޮޓްލަންޑްގެ ގްލާސްގޯގައި ދާދި ފަހުން ކުރިއަށްދިޔަ 23 ވަނަ ކޮމަންވެލްތް ގޭމްސްގައި 05.09.68 އިން އިވެންޓު ފުރިހަމަ ކޮށްގެންނެވެ.
އޭޝިއަން ގޭމްސްގައި، ރާއްޖޭން ހަތް ކުޅިވަރަކުން ވާދަކުރާއިރު، ގޭމްސްގައި ހަރަކާތްތެރިވާ ރާއްޖޭގެ ކޮންޓިންޖެންޓްގެ ޖުމްލަ އަދަދަކީ، 81 އެވެ. އޭޝިއަން ގޭމްސްގައި ރާއްޖޭގެ ޝޫޓިން ގައުމީ ޓީމުން ވެސް ވަނީ ގައުމީ ރެކޯޑްތަކެއް އާ ކޮށްފަ އެވެ.
ރާއްޖޭގެ ސްވިމިން ޓީމުގެ އެކޮމަޑޭޝަން ހަމަޖެހިފައިވަނީ، އެ އެތުލީޓުންގެ އިވެންޓް ވެސް ކުރިއަށްދާ ސިޓީ ކަމަށްވާ ޓޯކިޔޯގަ އެވެ. ރިހާންގެ އިތުރުން، ދެން ސްވިމިން ޓީމުގައި ހިމެނެނީ، މެރާލް އައިން ލަތީފް، ލޫތު މުހައްމަދު ހުސެއިން އަދި މަލައިކާ ލިންޑާ އިމްރާން އެވެ.
ދާދި ފަހުން، ރާއްޖޭގެ ފިރިހެނުންގެ ޝޯޓް ކޯސް 50 މީޓަރު ބްރެސްޓް ސްޓްރޯކް އިވެންޓުގެ ޤައުމީ ރެކޯޑް، އިފްޒާލް އިބްރާހިމް މަހްފޫޒް ވަނީ އާ ކޮށްފަ އެވެ. އެއީ، ސިންގަޕޯ ނޭޝަނަލް ސްވިމިން ޝޯޓް ކޯސް އިންވިޓޭޝަނަލް 2026 ގައި ވާދަކޮށެެވެ. އެ ގޮތުން، އިފްޒާލް މި ރެކޯޑް އާކޮށްފައިވަނީ 00:31.86 އިން ނިންމައިގެންނެވެ.
މި އިވެންޓުގެ ގައުމީ ރެކޯޑު އެންމެ ފަހުން އާކޮށްފައިވަނީ ލޫތު އެވެ. އެއީ 2025 ވަނަ އަހަރު ތައިލެންޑްގައި ކުރިޔަށްދިޔަ އޭޝިއަން އޯޕަން ސްކޫލްސް އިންވިޓޭޝަނަލް ޝޯޓްކޯސް ސްވިމިން ޗެމްޕިއަންޝިޕްސް ގައި 00:31.95 އިން އިވެންޓު ފުރިހަމަ ކޮށްގެންނެވެ.
