މި މަހު ޖަޕާނުގެ އައިޗީ-ނަގޯޔާގައި ފަށާ އޭޝިއަން ގޭމްސްގައި ވާދަކުރާ ރާއްޖޭގެ ގައުމީ ސާފިން ޓީމުގައި ހިމެނޭ މަރިޔަމް ރާހިލް ނަސީމް (އާޔާ)، ޔާސިން އަހުމަދު ނާޝިދު، ކަޔާން އަބްދުﷲ އަރީފް (ކައިޕުޓީ) އަދި އަައިމިނަތު ތާނީސް ޝިރަން، މުބާރާތަށް ތައްޔާރުވުމަށްޓަކައި ޖަޕާނަށް ގޮސްފި އެވެ.
ޖަޕާނުގައި މި އަހަރު ބާއްވާ އޭޝިއަން ގޭމްސް އަކީ ސާފިން އިވެންޓް ހިމެނޭ ފުރަތަމަ އޭޝިއަން ގޭމްސް އެެވެ. އެ ތާރީހީ ގޭމްސްގެ އަންހެން އަދި ފިރިހެން ކެޓަގަރީގެ ސްލޮޓް ރާއްޖެ އަށް ފުރަތަަމަ ކަށަވަރުވީ، 2024 ވަނަ އަހަރު ކ. ތުލުސްދޫގައި، ކުރިއަށްދިޔަ އޭޝިއާގެ ސާފިން މުބާރާތުގެ ނަތީޖާތަކަށް ފަހު އެވެ. ރާއްޖެ އަށް، އޭޝިއަން ގޭމްސް އިން އިތުރު ދެ ޖާގަ ލިބިގެންދިޔައީ، އިންޑިއާގެ ޓަމިލް ނާޑޫގައި ކުރިއަށްދިޔަ މިދިޔަ އަހަރުގެ އޭޝިއަން ސާފިން ޗެމްޕިއަންޝިޕުގައި ރާއްޖޭގެ އެތުލީޓުންގެ ނަތީޖާ ރަނގަޅުވުމާއެކު އެވެ. އެ ގޮތުން، ޖެހިޖެހިގެން ދެ އަހަރު އޭޝިއާ މުބާރާތުގައި ގައުމީ ސާފިން ޓީމުން ނެރުނު ނަތީޖާތަކަށް ބަލައި، ރާއްޖޭގެ ހަތަރު ސާފަރުން (އަންހެން ދެ އެތުލީޓުންނާއި ފިރިހެން ދެ އެތުލީޓުން) މި މަހު 22 ގައި ފަށާ އޭޝިއަން ގޭމްސްގެ ސާފިން އިވެންޓްގައި ވާދަކުރާނެ އެވެ.
ގައުމީ ސާފިން ޓީމުގެ ކޯޗު ހުސެއިން އަރީފް (އިބޫ)ގެ އިރުޝާދުގެ ދަށުން އޭޝިއަން ގޭމްސް އަށް ސާފިން ޓީމު ތައްޔާރުވާއިރު، ދުރާލައި، ޖަޕާނަށް ގޮސް މުބާރާތަށް ތައްޔާރުވުމުގެ ވިސްނުމަކީ މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ އިސްނެގުމެކެވެ. އެ ގޮތުން، މި މަހު 22 ވަނަ ދުވަހު، އޭޝިއަން ގޭމްސްގެ ސާފިން އިވެންޓްގެ ކަންކަން ފެށުމާ ހަމައަށް ހުރިހާ ކަމެއް ހަމަޖައްސަނީ ސާފިން އެސީސިއެޝަނުންނެެވެ.
އޭޝިއާގެ އެންމެ ބޮޑު ކުޅިވަރު ހަރަކާތުގެ ތާރީހީ ސާފިން އިވެންޓުގައި ރާއްޖެ ތަމްސީލް ކުރާ އެތުލީޓުންގެ ތެރޭގައި ހިމެނެނީ، މުސްތަގުބަލާއި ތަޖުރިބާ އަށް ބަލާއިރު، ހުނަރުވެރި ސާފަރުންނެވެ. އަދި، ގައުމީ ލެވަލްގެ ތަޖުރިބާ އާއި ބައިނަލްއަގުވާމީ ކުރިއެރުން ވެސް ރަނގަޅު އެތުލީޓުންނެވެ.
ދާދި ފަހުން، ލ. މާބައިދޫގައި ކުރިއަށްދިޔަ، ދިވެހި ސާފް ލީގުގެ މުބާރާތެއް ކަމަށްވާ ކެރަންޑޫ މުބާރާތުގެ އޯޕަން ބައިގެ ޗެމްޕިއަންކަން، ޔާސިން ވަނީ ހޯދައިފަ އެވެ.
ސާފިން ހިމެނޭހެން، އޭޝިއަން ގޭމްސްގައި ރާއްޖޭން ޖުމްލަ އެކު، ހަތް ކުޅިވަރަކުން ވާދަކުރެ އެވެ. އެއީ، އެތުލެޓިކްސް، ބެޑްމިންޓަން، ބީޗްވޮލީބޯޅަ، ސްވިމިން، ޝޫޓިން އަދި ޓޭބަލް ޓެނިސް (ޓީޓީ) އެވެ.
ސާފިން ޓީމުގެ އެކޮމަޑޭޝަން ރާއްޖޭގެ ގިނަ ކުޅިވަރުތަކެއްގެ ގައުމީ ޓީމުތަކެކޭ އެއްގޮތަށް، ނަގޯޔާގައި ތިބޭ ގޮތަށް ހަމަޖެހިފައިވާއިރު، އެ ޓީމު ތިބޭނީ މެއިން އެކޮމަޑޭޝަނަށް ވުރެން 1 ގަޑިއިރާއި 30 މިނިޓުން ދެވޭ ދުރުމިނުގަ އެވެ. ރާއްޖޭގެ ސްވިމިން ޓީމުގެ އެކޮމަޑޭޝަން ހަމަޖެހިފައިވަނީ، އެ އެތުލީޓުންގެ އިވެންޓް ވެސް ކުރިއަށްދާ ސިޓީ ކަމަށްވާ ޓޯކިޔޯގަ އެވެ.
އޭޝިއަން ގޭމްސް އަށް ރާއްޖޭގެ ކޮންޓިންޖެންޓްގެ ޗެފް ޑި މިޝަން އަކީ، މޯލްޑިވްސް ޕޫލް ބިލިއާޑް އެސޯސިއޭޝަންގެ ރައީސް، އަހުމަދު ނާސިފް އެވެ. އޭނާ އަކީ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ހިންގާ ކޮމިޓީގެ މެމްބަރެއް ވެސް މެ އެވެ. އޭޝިއަން ގޭމްސްގައި، ފެނިގެންދާނެ ރާއްޖޭގެ ކޮންޓިންޖެންޓުގެ ޖުމްލަ އަދަދަކީ 81 މެމްބަރުން ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ބުނެފަ އެވެ. ގޭމްސްގައި ރާއްޖޭގެ ދިދަ އުފުލާނީ، ޓޭބަލް ޓެނިސް ތަރި، މޫސާ މުންސިފް އަހުމަދު އާއި ޝޫޓިން އެތުލީޓު، މަރިޔަމް އީޝަލް އައްބާސް އެވެ.
