ފައިނަލުގައި މާލެ ސްޕޯޓްސް ކްލަބް ބަލިކޮށް ސީބީއެލް ސްޕޯޓްސް އިން ޓީ20 ޕްރެޒިޑެންޓްސް ޗެލެންޖު ކަޕްގެ ޗެމްޕިއަންކަން ހޯދައިފި އެވެ.
އިއްޔެ ކުޅުނު ފައިނަލުގައި ސީބީއެލް އިން މާލެ ސްޕޯޓްސް ކްލަބް ބަލިކޮށްފައިވަނީ، 56 ލަނޑުންނެވެ.
ފައިނަލް މެޗުގެ ޓޮސް ދިމާވުމުން، ސީބީއެލް އިން ނިންމީ ކުޅެން އަރާށެވެ. އެ ގޮތުން، ސީބީއެލް އިން ކުޅެން އަރައި 20 އޯވަރުގެ ތެރޭގައި، ތިން ކުޅުންތެރިން ނުބައިވެގެން 185 ލަނޑު ހަދައިފަ އެވެ. ސީބީއެލް އިން އެންމެ ރަނގަޅު ކުޅުމެއް ދައްކާފައިވަނީ، 50 ބޯޅައިން 80 ލަނޑު ހެދި ތަރަކަ ރުވާން އާއި 17 ބޯޅައިން 27 ލަނޑު ހެދި އާދަމް ނާސިފް އުމަރު އެވެ. އަދި، އެ ޓީމުގެ ކެޕްޓަން، އަޝާން ޔަޕަން ވަނީ 36 ބޯޅައިން 49 ލަނޑު ހަދައިފަ އެވެ.
ޖަވާބުގައި ކުޅެން އަރައި، މާލެ ސްޕޯޓްސް ކްލަބަށް 20 އޯވަރުގެ ތެރޭގައި، ހަތް ކުުޅުންތެރިން ނުބައިވެގެން 127 ލަނޑު ހަދައިފަ އެވެ. މާލެ ސްޕޯޓްސް ކްލަބަށް އެންމެ ގިނަ ލަނޑު ހަދައިދިނީ 23 ބޯޅައިން 34 ލަނޑު ހެދި އިސްމާއިލް އަލީ އެވެ. އެ ޓީމުގެ މުހައްމަދު ރިޝްވާން ވަނީ 20 ބޯޅައިން 25 ލަނޑު ހަދައިފަ އެެވެ.
ޓީ20 ޕްރެޒިޑެންޓްސް ޗެލެންޖު ކަޕްގައި ކުޅެފައިވަނީ، މޯލްޑިވްސް ޕްރިމިއާ ލީގުގެ ގަދަ ހަތަރު ޓީމެކެވެ. އެއީ، ޕްރިމިއާ ލީގުގެ ޗެމްޕިއަންކަން ހޯދި މާލެ ސްޕޯޓްސް ކްލަބްގެ އިތުރުން، ސީބީއެލް ސްޕޯޓްސް، އަނަކީ ސްޕޯޓްސް ކްލަބް އަދި ނިއު ސްޓާ އެވެ.
ޕްރެޒިޑެންޓްސް ކަޕްގެ ފުރަތަަމަ މެޗުގައި، ސީބީއެލް އަތުން މޮޅުވެ، މާލެ ސްޕޯޓްސް ކްލަބުން ފައިނަލްގެ ފުރަތަމަ ޖާގަ ހޯދައިފަ އެވެ. ސީބީއެލް އިން ފައިނަލަށް ދަތުރުކުރީ ދެ ވަނަ ސެމީ ފައިނަލުގައި މޮޅުވި އަނަކީ އަތުން ތިން ވަނަ ސެމީގައި ކުރިހޯދައިގެންނެވެ.
