ސަތާރަ ލަނޑުން މާލޭ ސްޕޯޓްސް ކްލަބް ބަލިކޮށް ޓީ20 ޕްރެޒިޑެންޓްސް ކަޕްގެ ޗެމްޕިއަންކަން ސީބީއެލް އިން ހޯދައިފި އެވެ.
ޓީ20 ޕްރިމިއާ ކްރިކެޓު ލީގުގެ ގަދަ ހަތަރު ޓީމާ އެކު ކުރިއަށްދިޔަ ޕްރެޒިޑެންޓްސް ކަޕްގެ ފައިނަލުން މާލޭ ސްޕޯޓްސް ކުލަބު ޖާގަ ހޯދީ ސެމީ ފައިނަލުގައި މާލޭ ވެޓްރަންސް ބަލިކޮށްގެންނެވެ. ސީބީއެލް ފައިނަލުން ޖާގަ ހޯދީ ލީގުގެ އެއް ވަނަ ހޯދި މިލާން ކްރިކެޓް އެކަޑެމީ ބަލިކޮށްގެންނެވެ.
ފައިނަލް މެޗުގެ ޓޮސް ދިމާވުމުން މާލޭ ސްޕޯޓްސް އިން ނިންމީ ސީބީއެލް އަށް ފުރަތަމަ ބެޓް ކުރަން ފުރުސަތުދޭށެވެ. ސީބީއެލް ކުޅެން އަރައި 20 އޯވަރުގައި އަށް ކުޅުންތެރިން ނުބައިވެގެން ހެދުނީ 162 ލަނޑެވެ. އެ ޓީމުން އެންމެ ރަނގަޅަށް ކުޅުނީ 33 ބޯޅައިން 55 ލަނޑު ހެދި އަކްސަތު ރެޑޭ އާއި، 21 ބޯޅައިން 25 ލަނޑުހެދި ޓީމްގެ ކެޕްޓަން ހަސަން ހާޒިގް އެވެ.
ޖަވާބުގައި މާލޭ ސްޕޯޓްސް ކުޅެންއަރައި 20 އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 145 ލަނޑެވެ. މާލޭ ސްޕޯޓްސް އަށް އެންމެ ގިނަ ލަނޑު ހަދައިދިނީ 42 ބޯޅައިން 66 ލަނޑު ހެދި މުހައްމަދު ރިސްވާން އާއި 42 ބޯޅައިން 66 ލަނޑު ހެދި އިސްހާގް އީސާ އެވެ.
ޓީ20 ޕްރެޒިޑެންޓްސް ކަޕްގެ ފައިނަލް މެޗުގެ ތެރެއިން.-- ފޮޓޯ: އަބްދުﷲ އިޔާން/ އަދަދު
ފައިނަލުން މެޗުން ބަލިވި ނަމަވެސް މި މެޗުގެ އެންމެ މޮޅު ކުޅުންތެރިއަކަށް ހޮވުނީ މާލޭ ސްޕޯޓްސް ކްލަބްގެ ބެޓްސްމަން މުހައްމަދު ރިސްވާން އެވެ. ފައިނަލް މެޗަށްފަހު ޗެމްޕިއަން ތަށްޓާއި މެޑަލް ހަވާލުކޮށްދެއްވީ ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހު އެވެ.
ޓީ20 ޕްރެޒިޑެންޓްސް ކަޕްގެ އިތުރުން މިދިޔަ މަހު ނިމުނު ޓީ20 ޕްރިމިއާ ކްރިކެޓް ލީގުގެ ވަނަތަކަށް ހޮވުނު ކުޅުންތެރިންނަށް ވެސް މި ރަސްމިއްޔާތުގައި ވަނީ އިނާމް ދީފަ އެވެ.
މިގޮތުން ލީގުގެ އެންމެ މޮޅު ކުޅުންތެރިއާގެ މަގާމާއި އެންމެ މޮޅު ބެޓްސްމަންގެ މަގާމް ހޯދީ މާލޭ ވެޓްރަންސްގެ ރުވާން ތަރަކަ އެވެ. އެންމެ މޮޅު އުކުންތެރިންނަށް ހޮވުނީ ސީބީއެލްގެ އިބްރާހިމް ރިޒާން އާއި މިލާން ކްރިކެޓް އެކަޑެމީގެ ލީމް ޝަފީގު އެވެ. ދެ ކުޅުންތެރިން ވެސް ލީގުގައި ވަނީ 14 ވިކެޓު ނަގާފަ އެވެ.
އެންމެ އުއްމީދީ ކުޅުންތެރިއަކަށް ކޮމެޓްސްގެ އަލީ ރާފިލް ހޮވުނުއިރު ލީގުގެ އެންމެ މޮޅު ފީލްޑަރަކަށް ހޮވުނީ މާލޭ ވެޓްރަންސްގެ ދިލްސާން ފެނާންޑޯ އެވެ.
ޓީ20 ޕްރެޒިޑެންޓްސް ކަޕާ އެކު މި އަހަރުގެ ކްރިކެޓުގެ ރަސްމީ ހުރިހާ މުބާރާތެއް ނިމުނީ އެވެ. މިއަހަރު ކުރިއަށް ގެންދިޔަ ގައުމީ ލީގާއި ގައުމީ މުބާރާތުގެ އިތުރުން އެހެން ފޯރިގަދަ މުބާރާތްތަކެއް އަންނަ އަހަރުގެ ކްރިކެޓު ކަލަންޑަރުގައި ހިމެނުމަށް ކްރިކެޓް ބޯޑުން އަންނަނީ މަސައްކަތް ކުރަމުންނެވެ.
