ރިސޯޓެއްގެ ގޮތުގައި ތަރައްގީކުރަމުންދާ ރ. ފުއްގިރީގައި މަސައްކަތްކުރަމުންދިޔަ ބިދޭސީއަކު އުސްތަނަކުން ވެއްޓި އަނިޔާވެގެން ހޮސްޕިޓަލުގައި ފަރުވާދޭން ފަށައިފި އެވެ.
މި ހާދިސާގައި އަނިޔާވެފައިވަނީ އުމުރުން 25 އަހަރުގެ ބަންގްލަދޭޝް ފިރިހެނަކަށެވެ. ފުލުހުންގެ އިދާރާއިން ހާމަކޮށްފައިވާ ގޮތުގައި މި ހާދިސާ ހިނގީ މިއަދުހަވީރުގެ ވަގުތެއްގަ އެވެ.
މި ހާދިސާ ހިނގަން މެދުވެރިވީ އެ ރަށުގައި ހުރި ޓަވަރެއްގެ މަތީގައި އެމީހާ މަސައްކަތް ކުރަމުން ދަނިކޮށެވެ. މަސައްކަތުގައި އުޅެނިކޮށް އޭނާ ވެއްޓުނީ ގާތްގަނޑަކަށް ފަންސަވީސް ފޫޓު މަތިން ކަމަށް މިހާތަނަށް ބެލިބެލުމުން އެނގިފައިވެއެވެ.
އަނިޔާވި ބިދޭސީ މީހާއަށް މިހާރު ފަރުވާ ދެމުންދަނީ ރ. އުނގޫފާރު ރީޖަނަލް ހޮސްޕިޓަލުގަ އެވެ. އޭނާއަށް ލިބިފައިވާ އަނިޔާތަކުގެ ތަފްސީލު ހޮސްޕިޓަލުން އަދި ހާމަކޮށްފައި ނުވިނަމަވެސް، އޭނާގެ ހާލު މިވަގުތު ސީރިއަސް ނޫންކަމަށް ފުލުހުން ބުނެ އެވެ.
