ޕެރިސް، ފްރާންސް (އޮގަސްޓް 12) - އުމުރުން 33 އަހަރުގެ މިޑްފީލްޑަރު، ޕައުލް ޕޮގްބާއާ އެކު، ފްރާންސްގެ ކްލަބް، މޮނާކޯ އިން ހަދާފައި އޮތް އެއްބަސްވުން އުވާލުމުގެ މަޝްވަރާތަކެއް ފަށާފައިވާ ކަމަށް ރިޕޯޓްތައް ބުނެފި އެވެ.
މެންޗެސްޓާ ޔުނައިޓެޑުގެ އެކަޑަމީއިން ވިދާލި ޕޮގްބާ ވަނީ އެ ޓީމަށާއި އިޓަލީގެ ޔުވެންޓަސް އަށް ދެ ފަހަރެއްގެ މަތިން ކުޅެފަ އެވެ. މަނާ ބޭހުގެ މައްސަލާގައި އޭނާ ފުރަތަމަ ވަގުތީ ގޮތުން ސަސްޕެންޑުކުރީ 2023 ގެ ސެޕްޓެމްބަރު މަހު އެވެ.
ވަގުތީ ސަސްޕެންޝަނުގައި ހުއްޓާ ދެ ވަނަ ފަހަރަށް ނެގި ސާމްޕަލް ވެސް ވަނީ، މަނާބޭހުގެ ގޮތުގައި ލިސްޓުކޮށްފައިވާ ޓެސްޓޯސްޓެރޯން އަށް ޕޮޒިޓިވްވެފަ އެވެ. އެއާއެކު ޕޮގްބާ އަށް ހަތަރު އަހަރުގެ ސަސްޕެންޝަނެއް އައި ނަމަވެސް ޕޮގްބާގެ ފަރާތުން ކޯޓް އޮފް އާބިޓްރޭޝަން ފޯ ސްޕޯޓްސް (ކާސް)ގައި ޕޮގްބާގެ ފަރާތުން ރަޖިސްޓްރީކޮށް، ކުރިއަށްގެންދިޔައިރު، ކާސް އިން ނިންމީ ޕޮގްބާގެ ސަސްޕެންޝަން 18 މަސް ދުވަަހަށް ކުޑަކޮށްދިނުމަށެވެ.
މަނާބޭހަށް ސަސްޕެންޑްކުރިއިރު، ޕޮގްބާ، ޔުވެންޓަސް ކޮންޓްރެކްޓްގައި ހުރި ނަމަވެސް، 2024 ވަނަ އަހަރު ނޮވެމްބަރު މަހު، އެ ޓީމުން ވަނީ އެ އެއްބަސްވުން އުވާލައިފަ އެެވެ. މީގެ 12 މަސް ދުވަސް ކުރިން، ޕޮގްބާ، މޮނާކޯ އަށް ސޮއިކުރީ، 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގަ އެވެ. އެކަމަކު، އެ އެއްބަސްވުމަށް އަހަރެއްވީއިރު، އެކަށީގެންވާ ނަތީޖާތަކެއް ހާސިލްނުކުރެވޭތީވެ، މޮނާކޯ މެނޭޖްމަންޓާއި ޕޮގްބާ ވަނީ އެއްބަސްވުން އުވާލުމުގެ ވާހަކަތައް ފަށައިފަ އެވެ.
ކުޅުމަށް އެނބުރި އައި ފަހުން، ޕޮގްބާ އަށް ކުޅެވުނީ މޮނާކޯ ޖޯޒީގައި އެންމެ ހަ މެޗެވެ. މިނިޓުން ބަލާނަމަ، އެއީ، 115 މިނިޓެވެ. އަދި، މި ފަހަރުގެ ޕްރީ ސީޒަނުގައި، ޕޮގްބާގެ ކުޅުން އެންމެ ރަނގަޅަށް ނުފެންނައިރު، ދާދި ފަހުން، ޓްރެއިނިންގެ ތެރެއިން އޭނާގެ ފަލަމަސްގަނޑަށް ވަނީ އަނިޔާވެފަ އެވެ.
މިއާ އެކު، ރިޕޯޓްތައް ބުނާގޮތުން، މޮނާކޯ އިން މިހާރު މަޝްވަރާ ކުރަމުން އަންނަނީ، ޕޮގްބާގެ ކޮންޓްރެކްޓް ނިމުމަކަށް ގެނައުމަށެެވެ.
