ރާއްޖޭގައި މި ދުވަސްވަރު އާދަޔާއިހިލާފަށް ހިމަބިހި ފެތުރެމުންދާ ދިޔުމާއި އާސަންދަ ހިދުމަތާ ގުޅޭގޮތުން މަޖިލީހުން ކުރި ސުވާލުތަކުގެ ޖަވާބު އަތުގައި ނެތް ކަމަށް ވިދާޅުވެ އެ ސުވާލުތަކަށް ޖަވާބުދޭން ހެލްތު މިނިސްޓަރު ގީލާ އަލީ ދެކޮޅު ހައްދަވައިފި އެވެ.
މިއަދު އޮތް މަޖިލީހުގެ ޖަލްސާގައި ސުވާލުކުރައްވަމުން ވައިކަރަދޫ ދާއިރާގެ މެންބަރު، ހުސެއިން ޒިޔާދު (ފިއްޓޭ) ވިދާޅުވީ މި ފަހުން އާދަޔާއި ހިލާފަށް ހިމަބިހި ފެތުރެން މެދުވެރިވީ އެ ބައްޔަށް ޓެސްޓު ކުރާ ކިޓު ހުސްވެފައި ހުރުމުން ކަމަށް އަޑުތައް ފެތުރިފައިވާ ކަމަށެވެ. އޭނާ ސުވާލު ކުރެއްވީ އެކަމުގެ ހަގީގަތް ހޯދުމަށެވެ.
ރާއްޖެއިން ބޭރުން އާސަންދަ ހިދުމަތް ދޭ ހޮސްޕިޓަލްތަކަށް ދޭންޖެހޭ ފައިސާ ދައުލަތުން ނުދީ ހުރުމުގެ ސަބަބުން ހިދުމަތްތައް ބުރޫ އަރާ ކަމަށް ވިދާޅުވެ، މިހައިތަނަށް ކިހައި ފައިސާއެއް އެ ހޮސްޕިޓަލްތަކަށް ނުދީ ހުރިތޯ ވެސް ފިއްޓޭ ސުވާލުކުރެއްވި އެވެ. އަދި، އާސަންދައިގެ ދަށުން ޑުބާއީ އާއި ބެންކޮކަށް ކިހައި މީހުންނެއް ބޭސްފަރުވާއަށް ފޮނުވިއްޖެތޯ ވެސް ފިއްޓޭ ސުވާލުކުރެއްވި އެވެ.
އޭގެ އިތުރުން، އައިޖީއެމް ހޮސްޕިޓަލުގައި ހުންނަ ހިތުގެ ބަލީގެ ޑިޕާޓުމެންޓުގެ އެގްރީމެންޓު ބާތިލުކޮށްފައި އޮތް ކަމަށް ބުނެ ފެތުރެމުންދާ ވާހަކަ އާއި ސަރުކާރުން އަލަށް އުފެއްދި ބޭސް ކުންފުނި، ސްޓޭޓް ފާމާ ކުންފުންޏަށް ރާއްޖޭގެ ބަޖެޓުން ކިހައި ފައިސާއެއް ހަރަދުކޮށްފައި ވޭތޯ ވެސް ފިއްޓޭ ސުވާލުކުރެއްވި އެވެ.
ނަމަވެސް، ގީލާ ވިދާޅުވީ އެ ސުވާލުތަކާ ބެހޭ މައުލޫމާތު އޭނާގެ އަތުގައި ނެތް ކަމަށެވެ.
"އިއްޒަތްތެރި މެންބަރު ވަރަށް ގިނަ ސުވާލުތަކެއް ތިޔަ ކުރެއްވީ، ދެން މިއަދު އަޅުގަނޑު މިކޮޅަށް މިއައީ ހަމަ ވަކި ސުވާލުތަކަކަށް ތިޔަ ބޭފުޅުންނަށް ޖަވާބު އެރުވުމަށްޓަކައި، އެހެންކަމުން، ވަރަށް ބޮޑަށް ޝުކުރިއްޔާ އިއްޒަތްތެރި ރައީސް،" ގީލާ ވިދާޅުވި އެވެ.
ހިމަބިހި ޖެހިފައިވާ މީހުންގެ އަދަދު ދެ ގުނަ އިތުރުވެ 121 އަށް އަރައިފި
ރާއްޖެއިން ނައްތާލާފައިވާ ހިމަބިހި ޖެހިފައިވާ މީހުންގެ އަދަދު 121 އަށް އަރާފައިވާއިރު، މިއީ ކުރީ ހަފުތާއާ އަޅާބަލާއިރު ދެގުނަ އިތުރުވުމެއް. މި ބަލި ފެތުރުން ކޮންޓްރޯލް ކުރުމަށް އެޗްޕީއޭއިން ވަނީ ވެކްސިން ކެމްޕޭނެއް ފަށައި، ބަލީގެ އަލާމާތްތައް ފެންނަ ނަމަ އެކަހެރިވުމަށާއި ސިއްހީ ފަރުވާ ހޯދުމަށް އިލްތިމާސްކޮށްފަ.
ފިއްޓޭގެ ސުވާލުތަކަށް ދޭނެ ޖަވާބެއް ނެތް ކަމަށް ގީލާ ވިދާޅުވުމުން، މަޖިލީހުގެ ތަޅުން ކޮންމެވެސް ވަރަކަށް ހޫނު ވެސް ވެގެންދިޔަ އެވެ. އެގޮތުން އެ ސުވާލުކުރެއްވި ފިއްޓޭ އާއި ޕީއެންސީގެ ބައެއް މެންބަރުންނާ ދެމެދު ބަހުގެ ހަމަލާތައް ވެސް ބަދަލު ކުރެވުނެވެ.
ހިމަބިއްސަކީ 2017 ވަނަ އަހަރު ރާއްޖެއިން މުޅިން ނައްތާލާފައިވާ ބައްޔެއްގެ ގޮތުގައި ޑަބްލިއުއެޗްއޯއިން ކަނޑައަޅާފައިވާ ބައްޔެކެވެ. ނަމަވެސް 2020 ވަނަ އަހަރާއި 2023 ވަނަ އަހަރުގެ އޭޕްރިލް މަހުގައި ވެސް ވަނީ ހިމަބިހީގެ ކޭސްތަކެއް ރާއްޖެއިން ފެނިފަ އެވެ. އެ ކޭސްތައް އޭރު ވަނީ ކޮންޓުރޯލް ކޮށްފަ އެވެ.
ނަމަވެސް، މި ފަހަަކަށް އައިސް ހިމަބިހީގެ ކޭސްތައް ރާއްޖޭގައި ވަނީ ވަރަށް ބޮޑަށް އިތުރުވެފަ އެވެ. އެޗްޕީއޭއިން ރޭ އާންމު ކުރި ހިސާބުތަކުން ދައްކާ ގޮތުގައި ހިމަބިހި މި އަހަރު ފެނުނު މިހާރު 122 މީހުންނަށް ެ ބަލި ވަނީ ޖެހިފަ އެވެ. މި ފާއިތުވި ދެ ހަފުތާގައި އެކަނި ވެސް 100 އަށް ވުރެ ގިނަ މީހުންނަށް އެ ބަލި ޖެހިފައިވެ އެވެ.
