ފެނަކަ މެނޭޖިން ޑިރެކްޓަރުގެ މަގާމުގައި ހުންނެވި، މުހައްމަދު އަފީފް ހުސެއިންއަށް ތުހުމަތު ކުރެވޭ ކޮރަޕްޝަންގެ މައްސަލައިގައި އޭނާގެ މައްޗަށް ދައުވާނުކުރަން ނިންމީ އޭނާގެ އަމަލުގެ ސަބަބުން ދައުލަތަށް ގެއްލުމެއް ލިބިފައި ނުވާތީ ކަމަށް ޕްރޮސެކިއުޓާ ޖެނެރަލްގެ އޮފީހުން ބުނެފި އެވެ.
ޕީޖީ އޮފީހުން ބުނީ އޭސީސީން ތަހުގީގު ކުރި މައްސަލައިގައި ހުރި ހެކިތަކަށް ބަލާއިރު، މުހައްމަދު އަފީފްގެ އަނބިކަނބަލުންގެ ކާރެއް ހައުސިން މިނިސްޓްރީގެ ބެލުމުގެ ދަށުގައި ހުންނަ ގަރާޖަކަށް ރެޖިސްޓްރީ ކުރުމަށް ސިޓީއެއް ތައްޔާރުކުރިކަން އެނގޭ ކަމަށެވެ.
އެހެންނަމަވެސް، އެ ސިޓީގައި އެދިފައިވާ ގޮތަށް، އެ ކާރު އެ ގަރާޖަށް މާލެ ސިޓީ ކައުންސިލުން ރެޖިސްޓްރީ ކޮށްދީފައި ނުވާތީ އެ އަމަލުގެ ސަބަބުން ދައުލަތަށް އެއްވެސް ގެއްލުމެއް އަދި މުހައްމަދު އަފީފް އަށް އެއްވެސް ފައިދާއެއް ލިބިފައި ނުވާ ކަމަށް ޝަފީއު ވިދާޅުވި އެވެ.
ފެނަކަ އެމްޑީގެ ކުރީގެ ކޮރަޕްޝަންގެ މައްސަލައެއް އަލުން ފެންމަތިކޮށްފި
ފެނަކަ ކޯޕަރޭޝަންގެ އެމްޑީ މުހައްމަދު އަފީފް ހުސެއިން، ޕަބްލިކް ވޯކްސްގެ ޑިރެކްޓާ ޖެނެރަލްގެ މަގާމުގައި ހުންނެވިއިރު ހިންގި ކަމަށް ތުހުމަތުކުރެވޭ ކޮރަޕްޝަންގެ މައްސަލައެއްގައި ދައުވާ ނުކުރަން ޕީޖީ އޮފީހުން ނިންމައިފިއެވެ.
އޭގެ އިތުރުން، އެ މައްސަލައިގައި، މުހައްމަދު އަފީފްގެ އިތުރުން، އޭނާ އެދިގެން ސިޓީ ތައްޔާރުކުރި އާދަމް ޝަފީއުއަށް ވެސް މީގެ ކުރިން އިދާރީ ފިޔަވަޅު އަޅާފައިވާ ކަމަށް ޕީޖީ އޮފީހުގެ ތަރުޖަމާނު އަހުމަދު ޝަފީއު ވިދާޅުވި އެވެ.
"އެހެންވީމާ ކޮރަޕްޝަންގެ އަމަލެއް، މި ދެންނެވީ ނާޖާއިޒު މަންފާއެއް ނާޖާއިޒު ފައިދާއެއް އެއްވެސް މީހަކަށް ލިބިފައި ނެތް ހާލަތުގައި އަނެއްކާ ދައުލަތަށް ވެސް މި އަމަލުގެ ސަބަބުން އެއްވެސް ގެއްލުމެއް ނުލިބި ޕްރިވެންޓު ކުރެވިފައިވާ ހާލަތުގައި އަޅުގަނޑުމެންނަށް ފެނުނީ މި މައްސަލައިގައި މުހައްމަދު އަފީފް ހުސެއިން އާއި އާދަމް ޝަފީއުގެ މައްޗަށް އިދާރީ ފިޔަވަޅު އެޅިފައި ވާތީ އިތުރަށް ޖިނާއީ ދައުވާއެއް ޕާސޫ ކުރުމުގެ މަސްލަހަތެއް ނެތޭ،" ޕީޖީ އޮފީހުގެ ތަރުޖަމާނު އަހުމަދު ޝަފީއު ވިދާޅުވި އެވެ.
އެއީ މީގެ ފަސް އަހަރު ކުރިން އޭސީސީއަށް ހުށަހަޅާފައި އޮތް މައްސަލައެކެވެ. މައްސަލަ ހުށަހަޅާފައި ވަނީ މާލެ ސިޓީގެ ކުރީގެ ކައުންސިލަރު، ސައިފް ފާތިހު އެވެ. އޭނާ ހުށަހެޅީ މިނިސްޓްރީއެއްގެ ގަރާޖަކަށް އަފީފްގެ ޕްރައިވެޓް ވެހިކަލެއް ރެޖިސްޓްރީ ކުރި މައްސަލައެކެވެ. އޭރު އަފީފް ހުންނެވީ ޕަބްލިކް ވޯކްސްގެ ޑިރެކްޓާ ޖެނެރަލްގެ މަގާމުގަ އެވެ.
އެ މައްސަލަ އޭސީސީން ތަހުގީގު ކުރުމަށްފަހު، ޕީޖީއަށް ފޮނުވާފައި ވަނީ އެ މައްސަލައިގައި ދައުވާ ކުރެވޭ މިންވަރަށް ހެކި ހުރި ކަމަށް ބެލެވޭތީ އެވެ.
