ބާމިންހަމް (މާޗް 7) - އިނގިރޭސި އެފްއޭ ކަޕްގެ ގަދަ 16 ބުރުގައި ވުލްވްސް އަތުން 3-1 އިން މޮޅުވެ، ލިވަޕޫލުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.
ވުލްވްސް ދަނޑުގައި މިދިޔަ އަންގާރަ ދުވަހުގެރޭ އިނގިރޭސި ޕްރިމިއާ ލީގުގައި ލިވަޕޫލް ވަނީ 2-1 އިން ވުލްވްސް އަތުން ބަލިވެފަ އެވެ. އެކަމަކު، ރޭގެ މެޗުގައި ވަނީ ރަނގަޅު ކުޅުމެއް ދައްކައި، ވުލްވްސްގެ މައްޗަށް ކުރިހޯދައިފަ އެވެ.
ޕްރިމިއާ ލީގުގެ މެޗެކޭ އެއްގޮތަށް އެފްއޭ ކަޕްގައި ވެސް ލިވަޕޫލާއި ވުލްވްސް، ފުރަތަމަ ހާފު ނިންމާލީ ލަނޑެއް ނުޖެހި އެވެ. އެކަމަކު، ދެ ވަނަ ހާފު ފެށިގެން މާ ލަސްތަކެއް ނުވެ، ލިވަޕޫލުން ވަނީ ގާތްގާތުގައި ދެ ގޯލު ޖަހައިފަ އެވެ.
އެ ގޮތުން، 51 ވަނަ މިނިޓްގައި އޭރިއާބޭރުން ގޯލުގެ ތިރީ ކަނަށް ބޯޅަ ފޮނުވާލައިގެން އެންޑީ ރޮބަޓްސަން ވަނީ ލިވަޕޫލަށް ލީޑުނަގައިދީފަ އެވެ. އަދި، އޭގެ މިނިޓެއް ފަހުން، ރޮބަޓްސަން ނެގި ހުރަހަކުން ސަލާހު، ލިވަޕޫލްގެ ދެ ވަނަ ލަނޑު ޖެހި އެވެ. މި ލަނޑު ފުރަތަމަ އޮފްސައިޑް ކަމަށް ކަނޑައެޅި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަަލައިފައި އޮފްސައިޑް ނޫން ކަމަށް ނިންމައި، ގޯލު ބަލައިގަތެވެ.
މެޗުގެ 74 ވަނަ މިނިޓްގައި އޭރިއާބޭރުން ގޯލުގެ ކަނަށް ބޯޅަ ވައްދާލައިގެން ކާޓިން ޖޯންސް ލިވަޕޫލްގެ ތިން ވަނަ ލަނޑު ޖަހައިދިނެވެ. ބަދަލަކަށް ކުޅެން އެރި ދެކުނު ކޮރެއާގެ ފޯވާޑް، ހްވާން ހީޗާން ވަނީ ވުލްވްސްގެ ހަމައެކަނި ލަނޑު މެޗުގެ އިތުރު ވަގުތުގެ ތެރޭގައި ޖަހައިފަ އެވެ.
ލިވަޕޫލުން ދެން ކުޅޭ މެޗުގައި އަންގާރަ ދުވަހުގެރޭ ބައްދަލުކުރާނީ، ޗެމްޕިއަންސް ލީގުގެ ގަދަ 16 ބުރުގެ ފުރަތަމަ ލެގުގައި ގަލަސަތަރާއިއާ އެވެ.
