އޮކްޓޯބަރު 3 ގައި އެމްޑީޕީން މާލޭގައި ބޭއްވި ބޮޑު މުޒާހަރާގައި އިއްވި ޑިމާންޑުތައް ރައީސް މުހައްމަދު މުއިއްޒު ނުފުއްދަވައިފި ނަމަ، ނޮވެމްބަރު 17، ގައި ބޮޑު މުޒާހަރާއެއް ބާއްވަން އެ ޕާޓީގެ ގައުމީ މަޖިލީހުން ރޭ ފާސްކުރި އެވެ.
އެމްޑީޕީ ހަރުގޭގައި ބޭއްވި ގައުމީ މަޖިލީސް ޖަލްސާއަށް ހޯރަފުށީ ދާއިރާގެ ރައީސް އަހުމަދު ސަލީމް ހުށަހެޅުއްވި އެ ގަރާރަށް ތާއީދު ކުރެއްވީ ނައިފަރު ދާއިރާގެ ރައީސް އަބްދުﷲ ރަޝީދު ހަސަން އެވެ.
އެމްޑީޕީގެ ޑިމާންޑުތައް:
- ދައުލަތުގެ ބާރުތައް ހިސޯރުކޮށް ހައްގުތައް ނިގުޅައިގަތުމަށް ގާނޫނު އަސާސީއަށް ގެނައި ބަދަލު އަނބުރާ އިޔާދަކުރުން.
- ދިވެހިރާއްޖޭގެ މާލީ ސިޔާސަތު ފުނޑާލާ އެސްއޯއީތައް މެދުވެރިކޮށް ޕްރޮޖެކްޓްތައް ހިންގުމުގެ ނަމުގައި ބަޖެޓު ލޫޓުވުން ހުއްޓުވައި، ޕްރައިވެޓް ސެކްޓާ ކުރިއެރުވުމަށް ހުރަސްއެޅުން ހުއްޓާލާ، ކުރިއަށް އޮތް ފަސް ހަފްތާ ތެރޭގައި ކުންފުނިތަކަށް ދޭން ޖެހޭ ފައިސާދީ ނިންމުން.
- ފައްކާވަމުން އައި ލާމަރުކަޒީ ނިޒާމު އިހު އޮތް ގޮތަށް އިޔާދަކޮށް، ބާރުވެރިކަން ރަށްރަށުން ނިގުޅައިގަތުން ހުއްޓުވާލުން.
- ހިޔާލުފާޅުކުރުމުގެ މިނިވަންކަމާއި މީޑިއާ ކޮންޓްރޯލްކުރާ ގާނޫނު އުވާލުން.
- އާސަންދަ އާއި ބޭސްފަރުވާ، ރައްކަތެރި ބޭސް 17 ނޮވެމްބަރު 2023 ގައި ހަމައަށް ދިވެހިންނަށް ލިބެން އައި މިންވަރަށް މިހިނދުން މިހިނދަށް ލިބިދިނުން.
މީގެ އިތުރުން، އޮކްޓޯބަރު 3 ގެ މުޒަހަރާގެ ބައިވެރިންނަށް މުއިއްޒުގެ ސީދާ އެންގެވުމަށް ދިން އަނިޔާތައް ކުށްވެރިކޮށް، އަދި ގާނޫނާ ހިލާފަށް ބަންދުކޮށްފައިވާ ހަ މީހުން ވަގުތުން ދޫކޮށްލުމަށް ގޮވާލައިފަ އެވެ. މުޒާހަރާގެ ތެރެއިން ޖުމުލަ އަށް މީހަކު ހައްޔަރުކުރި އެވެ. އޭގެ ތެރެއިން ދެ މީހަކު އިއްޔެ ވަނީ ދޫކޮށްލައިފަ އެވެ.
އެމްޑީޕީގެ ގައުމީ މަޖިލިސް މެންބަރުން ރޭ އިގުރާރުވީ ދިވެހި ރައްޔިތުންގެ އަސާސީ ހައްގުތަކާއި މިނިވަންކަން ދިފާއުކުރުމަށްޓަކައި ކުރަމުންދާ މަސައްކަތް އެއްވެސް ހުއްޓުމެއް ނެތި ކުރިއަށްގެންދިޔުމަށެވެ.
އޮކްޓޯބަރު 3 ގެ މުޒާހަރާގައި މި ސަރުކާރުން ގާނޫނުއަސާސީ ބަދަލުކޮށް، މުއައްސަސާތަކުގެ މިނިވަންކަން ގެއްލުވާލައި، ރައްޔިތުންގެ ފައިސާ އަށް ހަދާ ނުހަދާއެއް ނޭނގޭ ކަމަށް އިދިކޮޅު ފަރާތްތަކުން ތަކުރާރުކޮށް ބުނަމުން އަންނައިރު، އެކަންކަމާ ދެކޮޅަށް އަޑު އުފުލަން ނުކުތް އެތައް ހާސް ބަޔަކު މުއިއްޒުގެ އިސްތިއުފާ އަށް ގޮވި އެވެ.
އާޓިފިޝަލް ބީޗުން ފެށި މުޒާހަރާ ހޫނުވީ މަޖީދީ މަގުން ކުރިއަށްދާން އުޅުމުން އެކަމަށް ފުލުހުން ހުރަސް އެޅުމުންނެވެ. އެގޮތުން ފުލުހުން ވަނީ މުޒާހަރާގެ ބައިވެރިން ގަޔަށް ޕެޕާ ސްޕްރޭ ޖަހައި ބާރުގަދަ އަޑު އިއްވާ "ސޮނިކް ވެޕަން" ބޭނުންކޮށްފަ އެވެ.
އޮކްޓޯބަރު 3 ގެ މުޒާހަރާ އަކީ މުއިއްޒުގެ ވެރިކަމާ ދެކޮޅަށް މި ދެ އަހަރުގެ ތެރޭގައި ބޭއްވި އެންމެ ބޮޑު މުޒާހަރާ އެވެ.
