މެޑްރިޑް (ޑިސެމްބަރު 14) - މެންޗެސްޓާ ސިޓީގެ ފޯމަށް އަސަރުކޮށް، އެ ޓީމުގެ ކޯޗު ޕެޕް ގާޑިއޯލާގެ ކޯޗިން ކެރިއަރުގައި ފުރަތަމަ ފަހަރަށް ކުރިމަތިލާން ޖެހިފައިވާ އުނދަގޫ ހާލަތުން އޭނާ ކަންކަން ދަސްކުރާނެ ކަމަށް ރެއާލް މެޑްރިޑްގެ ކޯޗު ކާލޯ އަންޗެލޮޓީ ބުނެފި އެވެ.
ސިޓީން ހުރިހާ މުބާރާތެއްގައި އެންމެ ފަހުން ކުޅުނު 10 މެޗުގެ ތެރެއިން މޮޅުވީ އެންމެ މެޗަކުންނެވެ. ހަތް މެޗުން ބަލިވިއިރު، ދެ މެޗުން ވީ އެއްވަރެވެ. މިއީ، ގާޑިއޯލާގެ ވިއްސަކަށް އަހަރުވީ ކޯޗިން ކެރިއަރުގައި ކުރިމަތިލާ އެންމެ އުނދަގޫ ހާލަަތު ކަމަށް އޭނާ ވަނީ ބުނެފަ އެވެ.
ޕްރިމިއާ ލީގުގައި ޗެލްސީ އާއި އެވަޓަން އަށް ކޯޗުކޮށްދިން މިހާރު ރެއާލްގެ ކޯޗު އަންޗެލޮޓީ ބުނީ، ކޮންމެ ކޯޗަކަށް ވެސް ކެރިއަރުގައި އެކި ކަހަލަ ތަޖުރިބާ ކުރަން ޖެހޭ ހާލަތްތައް އަންނާނެ ކަމަށާއި މިއީ، ގާޑިއޯލާ އަށް އުނދަގޫ ހާލަތެއް ކަމަށެވެ.
"ސިޓީގެ އެންމެ ފަހުން ކުޅުނު މެޗުތަކުގެ ނަތީޖާތައް އެއްވެސް ކަމެއް ބަދަލެއް ނުވޭ. ގާޑިއޯލާ އަކީ ފުޓްބޯޅައިގެ އިނޮވޭޓަރެއް، އާދަޔާހިލާފު ކޯޗެއް. ދުނިޔޭގެ ފުޓްބޯޅައިގައި ފެނުނު އެންމެ މޮޅު ކޯޗުންގެ ތެރެއިން އެކަކު،" އަންޗެލޮޓީ ބުންޏެވެ.
"ކޮންމެ ކޯޗެއް ވެސް އެކި މަރުހަލާތަކުގައި ކަންކަން ދަސްކުރާނެ. އަލަށް ކުރިމަތިލާ ކަންކަން ވެސް އަންނާނެ. އަހަރެން ދެކޭގޮތުގައި މި ވަގުތު އެ ކުރިމަތިލާ ގޯސް ހާލަތުން ގާޑިއޯލާ ކަންކަން ދަސްކުރާނެ،"
އިޓަލީގެ މީޑިއާ އަކަށް ދިން އިންޓަވިއުއެއްގައި ގާޑިއޯލާ ވަނީ މިދިޔަ ހަފްތާތަކުގައި އޭނާ އަށް ހަމަނިދި ނުލިބޭއިރު، ކެއުމުގެ ކަންކަން ބެލެހެއްޓުމުގައި ގެންގުޅޭ ޑައިޓް އަށް ވެސް ފަރުވާކުޑަކުރެވިފައިވާ ކަމަށެވެ. މިއީ، އެކި ގޮތްގޮތުން ތަފާތު ޕްރެޝަރުތަކާ ކުރިމަތިލާ ދުވަސްތަކެއްކަން ފާހަގަކޮށް، ގާޑިއޯލާ ބުނީ، އަމިއްލަ ނަފްސަށް އޮތް އިތުބާރާއި ސިޓީ ޓީމަށް އޮތް ޔަގީންކަން ވަރުގަދަކޮށްގެން ހާލަތު ބަދަލުކުރެވޭނެ ކަމަށެވެ.
