މައުލޫމާތު ހޯދުމަށް އެދި ހުށަހަޅާފައިވާ ހުށަހެޅުމަކަށް ހައުސިން މިނިސްޓްރީން ޖަވާބު ދީފައި ނުވާ މައްސަލައެއް ބެލުމަށް އިންފޮމޭޝަން ކޮމިޝަނަރުގެ އޮފީހުން ތާވަލު ކުރި ބައްދަލުވުމަކަށް ކުރިން އެންގުމަކާ ނުލައި ހާޒިރު ނުވުމުން 350ރ. އިން އެ މިނިސްޓަރީ ޖޫރިމަނާކޮށްފި އެވެ.
އިންފޮމޭޝަން ކޮމިޝަނަރުގެ އޮފީހުން ދާދި ދެންމެއަކު އެކްސްގައި ކުރި ޕޯސްޓެއްގައި ބުނީ ހައުސިން މިނިސްޓްރީ ޖޫރިމަނާ ކުރީ، އެ އޮފީހުން ބަލަމުންދިޔަ މައްސަލަ އަކާ ގުޅިގެން އާންމުކޮށް ހުޅުވާލައިގެން ބޭއްވުމަށް ތާވަލުކުރި ބައްދަލުވުކަށް ހާޒިރުވެފައި ނުވާތީ ކަމަށެވެ.
"އިންފޮމޭޝަން ކޮމިޝަނަރުގެ އޮފީހުން ބަލަމުންދިޔަ މައްސަލައަކާ ގުޅިގެން އާންމުކޮށް ހުޅުވައިލެވިގެން ބޭއްވުމަށް ތާވަލުކުރެވުނު ބައްދަލުވުމަށް ހާޒިރުވެފައި ނުވާތީ، މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް ވަނީ -/350 ރުފިޔާއިން ޖޫރިމަނާކުރެވިފައި،" އައިކޮމްގެ ޕޯސްޓުގައި ބުނެފައިވެ އެވެ.
ހައުސިން މިނިސްޓްރީ އާއެކު ބައްދަލުވުމެއް ތާވަލު ކުރީ ހައުސިން މިނިސްޓަރީން މައުލޫމާތުތަކެއް ހޯދުމަށް އެދި ބަޔަކު ހުށަހަޅާފައިވާ ހުށަހެޅުމަކަށް އެ މިނިސްޓަރީން ޖަވާބު ނުދިނުމުން ކަމަށް އައިކޮމް އިން ބުންޏެވެ. އަދި އެ ބައްދަލުވުން ތާވަލު ކުރީ މި މަހުގެ 7، އަށް ކަމަށް ވެސް އައިކޮމް އިން ބުންޏެވެ.
މައުލޫމާތު ހޯދައި ލިބިގަތުމުގެ ގަވާއިދުގައި ބުނެފައި ވާގޮތުން، ބައްދަލުވުމަކަށް ހާޒިރުވާން އިންފޮމޭޝަން ކޮމިޝަނަރުގެ އޮފީހުން އަންގައިފި ނަމަ މަގުބޫލު ސަބަބެއް މެދުވެރިވެގެން ނޫނީ ހާޒިރު ވާން ޖެހޭނެ އެވެ. މަގުބޫލު ސަބަބެއް މެދުވެރިވެގެން ހާޒިރު ވެވެން ނެތްނަމަ ބައްދަލުވުން ފެށުމުގެ މަދުވެގެން އެއްގަޑިއިރު ކުރިން އެކަން އަންގަންވާނެ ކަމަށް މަހޯލި ގަވާއިދުގައި އޮވެ އެވެ.
ހައުސިން މިނިސްޓްރީ ޖޫރިމަނާ ކުރީ އެ ގަވާއިދުގައި ބަޔާންކޮށްފައި ވާގޮތަށް އަމަލު ނުކުރުމުން ކަމަށް އައިކޮމް އިން ބުންޏެވެ.
އައިކޮމް އޮފީހުން މިފަދަ ނިންމުމެއް ނިންމާފައި މިވަނީ މި ސަރުކާރަކީ ހާމަކަންބޮޑުކޮށް ހުރިހާ މައުލޫމާތެއް ރައްޔިތުންނަށް ފޯރުކޮށްދީގެން ހިންގާ ސަރުކާރެއް ކަމަށް ވެރިކަން ކުރާ ޕީއެންސީން ބުނިތާ ހަފުތާއެއް ވެސް ނުވަނީހެނެވެ.
މިދިޔަ އަންގާރަ ދުވަހު ޕީއެންސީން ނެރުނު ބަޔާނެއްގައި ބުނީ މައުލޫމާތު ހޯދުމުގެ ހައްގުގެ ގާނޫނުގެ ދަށުން ހޯދަން ހުށަހަޅާ މައުލޫމާތުތައް ސަރުކާރުން ފޯރުކޮށްދެމުންދާ ކަމަށެވެ.
"ސަރުކާރުގެ ވުޒާރާތަކާއި ދައުލަތުގެ ކުންފުނިތަކުން ވެސް އަންނަނީ އާރްޓީއައިތަކަށް ޖަވާބުދެމުން. ފާއިތުވި ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބެއް ނުދޭ. ދައުލަތުގެ ކުންފުނިތަކުން އާރްޓީއައިއަށް ޖަވާބުދޭން ޖެހޭ ކަމަށް ދިވެހިރާއްޖޭގެ ކޯޓަކުން ކަނޑައެޅުމުން ވެސް ޖަވާބުނުދީ ހިފަހައްޓާފައި އޮތް. އެ ސިޔާސަތު ނިމުމަކަށް ގެންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު،" އެ ބަޔާނުގައި ބުންޏެވެ.
ޕީއެންސީން އެހެން ބުނި ނަމަވެސް، އާރްޓީއައިތަކަށް އެކަށީގެންވާ އިޖާބައެއް ސަރުކާރުން ނުދޭތީ އެކަމާ އިންފޮމޭޝަން ކޮމިޝަނަރުގެ އޮފީހުން ވަނީ މީގެ ކުރިން ވެސް ކަންބޮޑުވުން ފާޅުކޮށްފަ އެވެ.
