ޕެރިސް (އޮގަސްޓް 3) - ޕެރިހުގައި މިހާރު ކުރިއަށްދާ އޮލިމްޕިކްސްގެ ޓެނިހުގެ ފިރިހެން ސިންގަލްސް ފައިނަލުގައި، ސާބިއާގެ ނޮވަކް ޖޮކޮވިޗް އާއި ސްޕެއިނުގެ ކާލޮސް އަލްކަރާޒް ބައްދަލުކުރަން ޖެހިއްޖެ އެވެ.
އަލްކަރާޒް އާއި ޖޮކޮވިޗް ވަނީ މީގެ ވިއްސަކަށް ދުވަސް ކުރިން، ވިމްބަލްޑަން ޓެނިސް ފައިނަލުގައި ބައްދަލުކޮށްފަ އެވެ. އެ މެޗުން، އަލްކަރާޒް ވަނީ މޮޅުވެފަ އެވެ.
ޓެނިހުގެ ދުނިޔޭގައި ހަލުވި ދުވެއްޔެއްގައި ކުރިއެރުން ހޯދަމުނ އަންނަ އަލްކަރާޒް، 21، ވަނީ، މިދިޔަ ޖޫން މަހު، ފްރެންޗް އޯޕަން ވެސް ކާމިޔާބުކޮށްފަ އެވެ. އެހެންކަމުން އޮލިމްޕިކްސް ރަން މެޑަލް ހޯދިއްޖެނަމަ، ޖެހިޖެހިގެން ތިން މަހު، ބޮޑު ތިން ކާމިޔާބީ ހޯދޭނެ އެވެ.
ޖޮކޮވިޗް، 37، ފައިނަލަށް ދަތުރުކުރީ، އިޓަލީގެ ލޮރެންޒޯ މުސެއްޓީ އަތުން ސެމީ ފައިނަލުގައި، 6-4، 6-2 އިން މޮޅުވެގެންނެވެ. މިއީ، ޓެނިހުގެ ގްރޭންޑް ސްލޭމްގެ 24 ތަށި ހޯދާފައިވާ ޖޮކޮވިޗްގެ ކެރިއަރުގައި އޮލިމްޕިކްސް ފައިނަލަކަށް ދަތުރުކުރި ފުރަތަމަ ފަހަރެެވެ.
ޖޮކޮވިޗްގެ ކާމިޔާބު ކެރިއަރުގައި މަދުވަނީ، އޮލިމްޕިކްގެ ޓެނިސް އިވެންޓުން ރަން މެޑަލެކެވެ. އޮލިމްޕިކްސްގައި ޖޮކޮވިޗްގެ އެންމެ ރަނގަޅު ފަހަރަކީ، 2008 ވަނަ އަހަރު ހޯދި ލޯ މެޑަލް އެވެ. އެންމެ ފަހުން ބޭއްވި އޮލިމްޕިކްސްގައި ޖޮކޮވިޗް ދިޔައީ ހަތަރު ވަނަ އެވެ.
ރަފައެލް ނަޑާލްއާ އެކު، ޑަބަލްސް ކުުޅުނު، އަލްކަރާޒް، ސިންގަލްސް ފައިނަލުން ޖާގަ ހޯދީ ސެމީ ފައިނަލުގައި، ކެނަޑާގެ ފީލިކްސް އޯގާ-އަލިއަސީމޭ އަތުން 6-1، 6-1 އިން މޮޅުވެގެންނެވެ.
ޕެރިސް އޮލިމްޕިކްސްގެ ޓެނިސް އިވެންޓް، ފިރިހެން ސިންގަލްސް ފައިނަލް އޮތީ މާދަމާ އެވެ.
