ލަންޑަން (ޖުލައި 16) - މެންޗެސްޓާ ސިޓީ އަށް ކުޅެމުން އަންނަ ސްޕެއިނުގެ ހުނަރުވެރި މިޑްފީލްޑަރު، ޑެނީ އޮލްމޯގެ ސޮއި ހޯދުމާ ގާތަށް ޖެހިލައިފައިވާ ކަމަށް މީޑިއާ ރިޕޯޓްތައް ބުނެފި އެވެ.
އޮލްމޯ، 26، މި ވަގުތު، ޖަރުމަނުގެ އާރްބީ ލައިޕްޒިގުގެ ކޮންޓްރެކްޓްގައި ހުރިއިރު، އޭގެ މާއްދާއެއްގައިވާ ގޮތުން، މި މަހު 20 ވަނަ ދުވަހުގެ ކުރިން، 55 މިލިއަން ޑޮލަރުގެ ފީއެއް ދެއްކުމަށް ފަހު، އޮލްމޯ ގަތުމުގެ ފުރުސަތު އެބައޮތެވެ. އެއީ، ލައިޕްޒިގާ އެކު، 2027 ވަނަ އަހަރުގެ ޖޫންގެ ނިޔަލަށް އޮތް އޮލްމޯގެ ކޮންޓްރެކްޓް އުވާލުމަށްފަހު އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ސިޓީން ވަނީ އެ އަގު ދީފައި އޮލްމޯގެ ކޮންޓްރެކްޓް ގަންނަން ތައްޔާރަށެވެ. ބާސެލޯނާ އިން ވެސް އޮލްމޯ ހޯދަން މަސައްކަތް ކުރަމުން އައި ނަމަވެސް، އެ ޓީމުން ފޯކަސް ބަދަލުކޮށްލާފައިވަނީ އެތުލެޓިކް ބިލްބާއޯ އަށް ކުޅޭ ސްޕެއިންގެ ވިންގް، ނީކޯ ވިލިއަމްސް ގަންނާށެެވެ.
މި ފަހަރުގެ ޔޫރޯގައި ތިން ގޯލު ޖަހައި، ދެ ގޯލު ޖަހަން ފުރުސަތު ތަނަވަސްކޮށްދިން އޮލްމޯ އަށް ބަޔާން މިއުނިކްގެ ހުށަހެޅުން ވެސް ވަނީ ލިބިފަ އެވެ.
ބާސެލޯނާގައި 2007-2014 އަށް ހޭދަކުރި އޮލްމޯ އަކީ އެ ކްލަބްގެ ޔޫތު ޓީމުތަކުގައި ވެސް ފާހަގަކޮށްލެވޭ މޮޅު ކުުޅުމެއް ދެއްކި ކުޅުންތެރިއެކެވެ. އެކަމަކު، ބާސެލޯނާ ދޫކޮށް އޮލްމޯ ވަނީ، 2014 ވަނަ އަހަރު ކްރޮއޭޝިއާގެ ޑިނަމޯ ޒަގްރެބަށް ބަދަލުވެފަ އެވެ. އަދި އެ ޓީމަށް ގިނަ އަހަރުތަކެއް ކުޅުމަށް ފަހު، އޮލްމޯ ވަނީ 2020 ވަނަ އަހަރު ޖެނުއަރީ މަހު، 35 މިލިއަން ޑޮލަރަށް ލައިޕްޒިގަށް ސޮއިކޮށްފަ އެވެ.
ލައިޕްޒިގަށް މިހާތަނަށް ކުޅެދިން، 148 މެޗުން 29 ގޯލު ޖަހައި، 34 ލަނޑު ޖަހަން ފުރުސަތު ތަނަވަސްކޮށްދިން އޮލްމޯ ވަނީ އެ ޓީމާ އެކު، ޖަރުމަނު ކަޕް ދެ ފަަހަރު އަދި ޖަރުމަނު ސުޕަ ކަޕް އެއް ފަހަރު ކާމިޔާބުކޮށްފަ އެވެ.
