ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެންމެ ފަހުން އޮތް އިންތިހާބީ ހިންގާ ކޮމިޓީގެ ދައުރު ހަމަވުމާ އެކު، ފީފާ އިން އަންގާ އެންގުމާ އެއްގޮތަށް، އެފްއޭއެމް ހިންގަން ޖެނެރަލް ސެކްރެޓަރީ، ޖައުޝަން ޝަރީފް (ޖައު) ހަވާލުކޮށްފި އެވެ.
ބައްސާމް، ދެ ވަނަ ދައުރަކަށް އެފްއޭއެމްގެ ރައީސްކަމަށް އިންތިހާބުވީ، 2020 ވަނަ އަހަރުގެ ޖުލައި ދެ ވަނަ ދުވަހު ބޭއްވި އިންތިހާބު ކާމިޔާބު ކުރައްވައިގެންނެވެ. އެއީ، ފީފާ އާއި އޭއެފްސީން އޮބްޒާވްކުރި އިންތިހާބީ ކޮންގްރެސްއެކެވެ. އެ މުއްދަތު ވަނީ އިއްޔެގެ ނިޔަލަށް ހަމަވެފަ އެވެ. އެފްއޭއެމް އިން އާ ހިންގާ ބޯޑެއް އިންތިހާބުކުރަން، އިންތިހާބެއް ބާއްވަން މި އަހަރުގެ ޖެނުއަރީ މަހުން ފެށިގެން މަަސައްކަތްކުރަމުން އައި ނަމަވެސް ބޭއްވިފައިނުވަނީ އޭއެފްސީ/ފީފާގެ އެންގުންތަކާ ހެދި އެވެ.
އިންތިހާބެއް ނުބޭއްވި، އެންމެ ފަހުގެ ހިންގާ ބޯޑުގެ ދައުރު ހަމަވުމުން، މިހާރު އެފްއޭއެމްގެ ކަންކަން ކުރުމުގެ ޒިންމާ އޮތީ ޖައުޝަންއާ ހަވާލުކޮށްފަ އެވެ.
"ފީފާގެ އެންގުންތަކާ އެއްގޮތަށް ކަންކަން ކުރެވެން އޮތީ. އެ ބުނާ ގޮތަކަށް، ދެން މި ބަލަނީ ކުރިއަށް ދާނެ ގޮތުގެ ސީދާ ޖަވާބެއް ހަފްތާއެއް ނޫނީ ދެ ހަފްތާއެއް ތެރޭގައި ލިބޭނެ ކަމަށް،" ޖައުޝަން ވިދާޅުވި އެވެ.
ފީފާގެ އެންގުމެއް ނެތި، އެފްއޭއެމް އަށް މުބާރާތެއް ކުރިއަށް ގެންދިއުމުގެ ހުއްދަ ވެސް ނެތެވެ.
އޭޝިއާގެ ފުޓްބޯޅަ އިދާރާ (އޭއެފްސީ)ގެ ލީގަލް ކޮމިޓީގެ މެމްބަރުކަން ވެސް ކުރައްވާ ޖައުޝަން، އެފްއޭއެމްގެ ޖެނެރަލް ސެކްރެޓަރީ ކަމާ ހަވާލުވީ މިދިޔަ އަހަރުގެ ނޮވެމްބަރު މަހު އެވެ.
ގިނަ އެސޯސިއޭޝަންތަކެއްގެ ގާނޫނީ މަސައްކަތަކެއް ކުރައްވާފައިވާ ޖައުޝަން، އެފްއޭއެމްގެ ކަންކަމާ ހަވާލުވާން ޖެހުނީ އެ އިދާރާ އުނދަގޫ ހާލަތެއްގައި އޮއްވަ އެވެ. އިދާރީ ގޮތުން ގިނަ ގޮންޖެހުންތަކެއް ދިމާވެ، މުބާރާތްތައް ހިންގުމަށް ވެސް އެފްއޭއެމް އަށް އަންނަނީ ހުރަސްތައް ކުރިމަތިވަމުންނެވެ. އެ ގޮތުން މުވައްޒަފުންގެ މުސާރަ ނުދެވުމާއި، ކުލަބުތަކަށް ދޭންޖެހޭ ފައިސާ ނުދެވުމާއި، ގިނަ ކުންފުނިތަކާއި އަމިއްލަ ފަރާތްތަކަށް ދޭން ޖެހޭ ފައިސާ ނުދެވި ގިނަ ދަަރަނިތަކެއް ދައްކަން ވަނީ ޖެހިފަ އެވެ.
ގިނަ ކޯޓު ހުކުމްތަކެއް ވެސް އެފްއޭއެމްގެ މައްޗަށް އައިސްފައިވާއިރު، ޕީޖީ އޮފީހާއި ފުލުހުން ކުރަމުން އަންނަ އެފްއޭއެމާ ގުޅޭ ކޮރަޕްޝަންގެ ތަހުގީގުގެ މައްސަލައިގައި އެފްއޭއެމްގެ ކުރީގެ ރައީސް، ބައްސާމް އަދީލް ޖަލީލްގެ މައްޗަށް ވަނީ މަނީ ލޯންޑަރިންނާއި ހިޔާނާތުގެ ދައުވާ އުފުލައިފަ އެވެ. އަދި ފީފާ އިން ވަނީ މިދިޔަ މަހުގެ 20 ވަނަ ދުވަހު، ބައްސާމް، ނުވަ މަހަށް ސަސްޕެންޑްކޮށްފަ އެވެ.
