އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް) އާއި ޔޫރަޕިއަން ޔޫނިއަން (އީޔޫ) އާ ދެމެދު ގާއިމުކޮށްފައިވާ "ސަމޯއާ އެގްރީމަންޓް" ގައި ރާއްޖެއިން ސޮއިކުރީ ލާދީނީ އަދި ގާނޫނުއަސާސީއާ ފުށުއަރާ މާއްދާތަކަށް ރިޒަވޭޝަން ހުށަހެޅުމަށްފަހު ކަމަށް ސަރުކާރުން ބުނެފި އެވެ.
އެ އެއްބަސްވުމުގައި އިސްލާމް ދީނާ ހިލާފު ކަންކަން ހުރުމުންނާއި ރާއްޖޭގެ ގާނޫނު އަސާސީއާ ފުށުއަރާ ގިނަ ކަންކަން ހިމެނޭތީ ގިނަ ބަޔަކު އަންނަނީ ފާޑު ކިޔަމުންނެވެ. އެއްބަސްވުމުގައި ސޮއިކުރަން ރައްޔިތުންގެ މަޖިލީހުން ފާސްކުރީ އާދީއްތަ ދުވަހެވެ. ސަރުކާރުން އެ އެއްބަސްވުމުގައި ސޮއިކުރީ އިއްޔެ އެވެ.
"ޖުމްލަ 12 މާއްދާއަކަށް ޑެކްލަރޭޝަން އަދި ރެޒަވޭޝަން ހުށައަޅާފައިވޭ. އަދި މީގެ ކުރިންވެސް ރާއްޖެއިން ބައިވެރިވެފައިވާ މުއާހަދާތަކުގައި ސޮއިކޮށްފައިވަނީ މިފަދަ މާއްދާތަކަށް ރެޒަވޭޝަން ހުށައެޅުމަށްފަހު،" ސަރުކާރުގެ ތަރުޖަމާނު ހީނާ ވަލީދު ވިދާޅުވި އެވެ.
އެމީހަކު ބޭނުން ދީނަކަށް އުޅުމުގެ މިނިވަންކަން ދިނުމަކީ ސަމޯއާ އެގްރިމެންޓުން ވަރަށް ބޮޑަށް ބާރުއަޅާ ކަމެކެވެ. އަދި އެއް ޖިންސުން ގުޅުން ހިންގާ މީހުންގެ "ހައްގުތައް" ހިމާޔަތް ކުރުމާއި އެބޯޝަން ހެދުން ހުއްދަ ކުރަން ވެސް އެ އެގްރިމެންޓުގައި ބާރުއަޅާ ކަމަށް ޖަމިއްޔާތަކުން ބުނެ އެވެ.
އެކަމަކު، އިސްލާމްދީނާއި ރާއްޖޭގެ ގާނޫނު އަސާސީއާ ފުށުއަރާ އެއްވެސް ކަމަކަށް މި ސަރުކާރުން ފުރުސަތު ނުދޭނެ ކަމުގެ ފުރިހަމަ ޔަގީންކަން ހީނާ ވަނީ އަރުވާފަ އެވެ.
މި އެއްބަސްވުމާއެކު އޯއޭސީޕީއެސްގެ މެންބަރު ގައުމުތަކަށް ޔޫރަޕިއަން ޔޫނިއަންގެ ތެރެއިން ލިބޭ ލުއި ފަސޭހަ އިންތިޒާމުތައް ރާއްޖެއަށް ލިބުމުގެ ފުރުސަތު ފަހިވެގެންދާނެ ކަމަށް ވެސް ސަރުކާރުން ބުނެ އެވެ.
މި އެއްބަސްވުމުގައި އޯއޭސީޕީއެސް ގެ 79 ގައުމު އަދި ޔޫރަޕިއަން ޔޫނިއަންގެ 27 މެމްބަރު ހިމެނެ އެވެ. ރާއްޖެ އޯއޭސީޕީއެސްގެ ފުރިހަމަ މެމްބަރު ޤައުމަކަށްވެފައިވަނީ ޑިސެމްބަރު 9, 2022 ގަ އެވެ.
