އިންޑިއާ ގައުމީ ފުޓްބޯޅަ ޓީމުގެ ކޯޗުގެ މަގާމުން ފަސް އަހަރަށް ފަހު، ކްރޮއޭޝިއާގެ ކުރީގެ ކުޅުންތެރިޔާ އަދި ކޯޗު، އީގޯ ސްޓިމަކް ވަކިކޮށްފި އެވެ.
ސްޓިމަކް، 56، އަންނަނީ މެއި، 15، 2019 އިން ފެށިގެން އިންޑިއާ އަށް ކޯޗުކޮށްދެމުންނެވެ. ސްޓިމަކް، އެންމެ ފަހުން އިންޑިއާއާ އެކު ހެދި ކޮންޓްރެކްޓް އޮތީ، 2026 ޖޫންގެ ނިޔަލަށެވެ. އެ އެއްބަސްވުމުގައި ވަނީ ސްޓިމަކް އަށް އިންޑިއާ ގޮވައިގެން، ވޯލްޑް ކަޕް ކޮލިފައިންގެ ތިން ވަނަ ބުރަށް ދެވިއްޖެނަމަ، 2028 އަށް ކޮންޓްރެކްޓް އާ ކުރެވޭ ގޮތަށް ވަނީ ހިމަނައިފަ އެވެ.
އެކަމަކު، އެންމެ ފަހުގެ އޭޝިއަން ކަޕާއި ފީފާ ވޯލްޑް ކަޕް ކޮލިފައިންގެ ދަށް ނަތީޖާއާ އެކު، އޯލްއިންޑިއާފުޓްބޯލް ފެޑެރޭޝަން އިން ނިންމީ ސްޓިމަކް ވަކިކުރުމަށެވެ.
އިންޑިއާ ފުޓްބޯޅަ ފެޑެރޭޝަނުން މިރޭ ނެރުނު ބަޔާނެއްގައި ބުނެފައިވަނީ، އެ ފެޑެރޭޝަންގެ ނަޒަރުގައި މިހާ ހިސާބުން ދެން އެންމެ ރަނގަޅު ގޮތަކީ އާ ހެޑް ކޯޗަކާ އެކު ކުރިއަށްދިއުން ކަމަށެވެ.
އިންޑިއާގެ ސަރުކާރާ ދެމެދު ވެސް ދެބަސްވުންތަކެއްގައި ގިނަ ފަހަރުތަކެއް މަތިން މަސައްކަތްކުރި ސްޓިމަކް ވަނީ އެ ގައުމުގެ ފުޓްބޯޅަ ޓީމަށް ހަތަރު ތަށި ހޯދައިދީފަ އެވެ. އޭގެ ތެރެއިން ތިން ތަށި ހޯދީ މިދިޔަ އަހަރު އެވެ. އެއީ، ބެންގަލޫރުގައި ކުރިއަށްދިޔަ ސާފް ޗެމްޕިއަންޝިޕާއި އެ ގައުމުން ހޯސްޓްކުރި، ޓްރައި ނޭޝަން ސީރީސް އާއި އިންޓަ ކޮންޓިނެންޓަލް ކަޕް އެވެ. އޭގެ ކުރިން، ހޯދީ 2021 ވަނަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް އެވެ.
ކްރޮއޭޝިއާ އިން 1998 ވަނަ އަހަރުގެ ފީފާ ވޯލްޑް ކަޕްގެ ތިން ވަނަ ހޯދިއިރު، އެ ޓީމަށް ކުޅުނު ސްޓިމަކް އަށް ވަނީ އެންމެ ފަހުން ދެ ސާފް ޗެމްޕިއަންޝިޕްގައި ހަތަރު ރަތް ކާޑު ދައްކައި، ބެންޗުން ފޮނުވާލައިފަ އެވެ.
