ބާލިން (ޖޫން 15) - ޔޫރޯ ފުޓްބޯޅަ މުބާރާތުގެ ޗެމްޕިއަންކަން ތިން ފަހަރު ހޯދާފައިވާ ސްޕެއިނުން މި ފަހަރުގެ މުބާރާތުގައި ކުޅުނު ފުރަތަމަ މެޗުން ކްރޮއޭޝިއާ އަތުން 3-0 އިން މޮޅުވެ، ފެންވަރު ދައްކާލައިފި އެވެ.
މަޝްހޫރު ބާލިން އޮލިމްޕިކް ސްޓޭޑިއަމްގައި ކުޅުނު މިރޭގެ މެޗު ފަށައިގެން ކްރޮއޭޝިއާ އިން ރަނގަޅަށް މެޗުގެ ތެރެއަށް ވަދެގެން ކުޅެން ފެށިތަނާ ސްޕެއިނުން ވަނީ ލަނޑު ޖަހައި ލީޑުނަގައިފަ އެވެ.
މެޗުގެ 29 ވަނަ މިނިޓްގައި ސްޕެއިނުގެ ފުރަތަމަ ލަނޑު ޖެހީ، ކެޕްޓަން އަލްވާރޯ މޮރާޓާ އެވެ. މިއީ، ފަބިއަން ރުއީޒް ދިން ބޯޅައެއް ހިފައިގެން އޭރިއާތެރެއަށް ވަދެ ގޯލުގެ ތިރީ ކަނަށް ބޯޅަ ފޮނުވާލައިގެން މޮރާޓާ ޖެހި ގޯލެކެވެ. މިއީ މޮރާޓާ، ޔޫރޯ ފުޓްބޯޅަ މުބާރާތްތަކުގައި ޖެހި ހަތް ވަނަ ލަނޑެވެ. ދެން، ހަތް ލަނޑު ޖަހާފައިވަނީ، އިނގިރޭސި ކުރީގެ ފޯވާޑް އެލަން ޝިއަރާ އާއި ފްރާންސްގެ ތަރި އެންޓޮއިން ގްރީޒްމަން އެވެ.
އެ އަށް ވުރެ ގިނައިން ގޯލު ޖަހާފައިވަނީ، ނުވަ ގޯލު ޖެހި ފްރާންސްގެ ކުރީގެ ތަރި، މިޝޭލް ޕްލަޓީނީ އާއި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެވެ. ރޮނާލްޑޯ ވަނީ ޔޫރޯތަކުގައި 14 ގޯލު ޖަހައިފަ އެވެ.
ޔަމާލް (ވ) ކްރޮއޭޝިއާގެ ބްރޮޒޮވިޗް ކައިރިން ބޯޅަ ހިފައިގެންދަނީ.
ސްޕެއިނުން ލީޑުނެގިތާ އިރުކޮޅެއްގެ ތެރޭގައި ކްރޮއޭޝިއާ އަށް އެއްވަރުކޮށްދޭން، މަޓެއޯ ކޮވަސިޗް ޖެހި ބޯޅައެއް ސްޕެއިންގެ ކީޕަރު އުނާއި ސިމޯން ވަނީ މަތަކޮށްފަ އެވެ.
ލީޑުފުޅާކުރަން ސްޕެއިނުން މާ ގިނައިރެއް ނުނަގަ އެވެ. މެޗުގެ 32 ވަނަ މިނިޓްގައި ފަބިއަން ރުއީޒް ވަނީ އޭރިއާ ރޮނގުކައިިރިން ކްރޮއޭޝިއާގެ ދެ ކުޅުންތެރިން ކައިިރިން ދެމިގަތުމަށް ފަހު، ކައިރީ ކަނަށް ބޯޅަ ފޮނުވާލައި ސްޕެއިނުގެ ދެ ވަނަ ލަނޑު ޖަހައިދީފަ އެވެ.
އޭގެ ފަހުން, ކްރޮއޭޝިއާ އަަށް ލަނޑެއް ޖަހައިދޭން، މާކޯ ބްރޮޒޮވިޗް ޖެހި ބޯޅައެއް ކީޕަރު ސިމޯން މަތަކުރުމުން ރީބައުންސަށް އަރައި، ލޮވްރޯ މާޔާ ޖެހި ބޯޅަ އަމާޒުވީ އަރިމަތީ ދާގަނޑަށެވެ. އަދި ކްރޮއޭޝިއާގެ ޖޮސްކޯ ގްވާޑިއޯލް ނެގި ބޯޅަ ޖަހަން އެ ޓީމުގެ ކުޅުންތެރިއަކަށް ނޭރުނެވެ.
ސްޕެއިނުގެ އުމުރުން 16 އަހަރުގެ ލަމީން ޔަމާލް، ޔޫރޯއެއްގައި ކުޅުނު އެންމެ ޒުވާން ކުޅުންތެރިޔާގެ ރެކޯޑް ހެދި މި މެޗުގައި އޭނާ ވަނީ ފުރަތަމަ ހާފު ނިމުމުގެ ކުރިން ސްޕެއިނުގެ ތިން ވަނަ ލަނޑު ޖަހައިދޭން އެހީތެރިވެދީފަ އެވެ. ޔަމާލް ނެގި ހުރަހަކުން މި ލަނޑު ޖެހީ ޑެނީ ކާވަހާލް އެވެ. މިއީ ކާވަހާލް، ސްޕެއިނަށް ޖަހައިިދިން ފުރަަތަމަ ގޯލެވެ.
ޔަމާލް (ވ) ދިން ބޯޅައަކުން ލަނޑު ޖެހުމަށް ފަހު، ކާވަހާލް އުފާފާޅުކުރަނީ.
ދެ ވަނަ ހާފު ފަށައިގެން ސްޕެއިނަށް ހަތަރު ވަނަ ލަނޑެއް ޖަހައިދޭން ޔަމާލް ފޮނުވާލި ބޯޅަ ކްރޮއޭޝިއާގެ ކީޕަރު ޑޮމިނިކް ލިވާކޮވިޗް ވަނީ މަތަކޮށްފަ އެވެ.
ކްރޮއޭޝިއާ އަށް ލަނޑެއް ޖަހައިދޭން ދެ ވަނަ ހާފުގައި، ކްރޮއޭޝިއާގެ ޖޯސިފް ސްޓަނިސިޗް ޖެހި ބޯޅަ ގޯލު ރޮނގުކައިިރިން ސަލާމަތްކުރީ ޖޯސިޕް ސްޓަނިސިޗް އެވެ.
މެޗުގެ 80 ވަނަ މިނިޓްގައި ކްރޮއޭޝިއާގެ ބްރޫނޯ ޕެޓްކޮވިޗް ލަނޑެއް ޖެހި އެވެ. މިއީ ޕެނަލްޓީ އަކުން ޕެޓްކޮވިޗް ޖެހި ބޯޅައެއް ސްޕެއިނުގެ ކީޕަރު ސިމޯން މަތަކުރުމުން، ރީބައުންސް ބޯޅައިގައި، އީވާން ޕެރިސިޗް ހުރަސްކޮށްލި ބޯޅައަކުން ޕެޓްކޮވިޗް ޖެހި ލަނޑެކެވެ. އެކަމަކު، މި ލަނޑު ޖެހި ފަހުން، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލި ބެލުމުގައި، ޕެޓްކޮވިޗް ޕެނަލްޓީ ފޮނުވާލުމުގެ ކުރިން، ކްރޮއޭޝިއާ ކުޅުންތެރިން އޭރިއާ އަށް ވަނުމުން ނިންމީ ފައުލެއް ކަމަށެވެ.
މި މެޗުން މޮޅުވުމުން، މަރުގެ ގްރޫޕްގެ ގޮތުގައި މަޝްހޫރުވެފައި އޮތް ގްރޫޕް ބީގައި ސްޕެއިން މި ވަނީ މޮޅަކުން ފަށައިފަ އެވެ. މި ގްރޫޕްގެ އަނެއް މެޗުގައި މިރޭ އެންމެ ފަހުގެ ޗެމްޕިއަން، އިޓަލީން އަލްބޭނިއާއާ ބައްދަލުކުރާނެ އެވެ.
