ޑޯޓްމަންޑް (ޖޫން 15) - ޔޫރޯ ފުޓުބޯޅަ މުބާރާތް ކުރިއަށްދާއިރު, ޕްލޭސްޓޭޝަން އާއި ވީޑިއޯ ގޭމް ކުޅުން އިޓަލީ ކުޅުންތެރިންނަށް މަނާނުކުރާ ކަމަށް އެ ޓީމުގެ ކޯޗު ލޫޝިއާނޯ ސްޕަލެއްޓީ ބުނެފި އެވެ.
އެންމެ ފަހުގެ ޗެމްޕިއަން އިޓަލީން މިރޭ އެ ޓީމުން ކުޅޭ ފުރަތަމަ މެޗުގައި ނުކުންނާނީ އަލްބޭނިއާއާ ދެކޮޅަށެވެ.
އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ސްޕަލެއްޓީ އަށް އަމާޒުވި އެއް ސުވާލަކީ، އެ ޓީމުގެ ކުޅުންތެރިންނަށް ވީޑިއޯ ގޭމް/ ޕްލޭސްޓޭޝަން ކުޅުން މަނާކުރި ކަމަށް ދެކެވޭ ވާހަކަތަކުގެ ހަގީގަތް ހާމަކޮށްދިނުމަށެވެ. އޭނާ ބުނީ، ހަގީގަތުގައި އިޓަލީގެ ފުރަތަމަ މެޗުގެ ކުރިން ޖަވާބު ދޭން ޖެހިފައި މި ވަނީ ދައްކަން ބޭނުންނުވާ ކަންތައްތަކުގެ ވާހަކަ ކަމަށާއި އެކަމަކު ހަގީގަތް ހާމަކުރުމަކީ، ވަޒީފާގެ މުހިންމު ބައެއް ކަމަށެވެ.
އެ ގޮތުން، ސްޕަލެއްޓީ ބުނީ، އިޓަލީގެ ކުޅުންތެރިންނަށް ޕްލޭސްޓޭޝަން އަދި އެ ނޫން ވެސް ވީޑިއޯ ގޭމެއް ކުޅުން މަނަލެއް ނުވާނެ ކަމަށެވެ.
"އިޓަލީގެ އެއްވެސް ކުޅުންތެރިއަކަށް ތިޔަ ބުނާ ގޭމްތައް ކުޅުން މަނަލެއް ނުވާނެ. އެކަމަކު، އަހަރެން ބޭނުމެއް ނޫން ކުޅުންތެރިން ރަނގަޅަށް ރޭގަނޑު ނުނިދާ އަނެއް ދުވަހު ފަރިތަކުރުންތަކަށް ދާކަށް" ސްޕަލެއްޓީ ބުންޏެވެ.
އިޓަލީ ފުޓްބޯޅައިގައި ތަޖުރިބާ ބޮޑު ކޯޗު، ސްޕަލެއްޓީ ބުނީ ޔޫރޯ ކޭމްޕުގައި އިޓަލީ ކުޅުންތެރިން ޕްލޭސްޓޭޝަން ކުޅެން އެ ކަމަށް ހާއްސަ ކޮޓަރި އެއް ހަދާފައިވާ ކަމަށެވެ. އަދި އެ ތަނުގައި އޭނާ ވެސް ގޭމް ކުޅުމުގައި ބައިވެރިވާކަމަށް ބުނެފައިވެ އެވެ.
ޔޫރޯގައި އޭނާގެ ޓީމަކީ އެންމެ ފަހުގެ ޗެމްޕިއަނުންނަށް ވުމަކީ އިޓަލީ އަށް އޮތް އެޑުވާންޓޭޖެއް ކަމަށް ސްޕަލެއްޓީ ގަބޫލުކުރެ އެވެ. އެކަމަކު، ޗެމްޕިއަނުންގެ ޕާފޯމެންސް މުބާރާތް ތެރޭގައި ދެއްކުމަކީ ޕްރެޝަރެއް ކަމަށް ވެސް ސްޕަލެއްޓީ ބުނެފައިވެ އެވެ.
އަލްބޭނިއާ އާ ދެކޮޅަށް އިޓަލީން ނުކުންނާނީ އެ ޓީމަށް ފުރިހަމައަށް އިހުތިރާމް ކޮށްގެން ކަމަށާއި, އެ ޓީމަކީ ކައުންޓާގައި ނުރައްކާތެރި ޓީމެއް ކަމަށް ސްޕަލެއްޓީ ވަނީ ފާހަގަކޮށްފަ އެވެ.
އިޓަލީން ޔޫރޯގެ ކުރިން އަދި ޔޫރޯގެ ފުރަތަމަ މެޗަށް ނުކުންނައިރު, ޓީމުގެ ރޫހު ވަރަށް ރަނގަޅު ކަމަށާއި, ކުޅުންތެރިން ތިބީ 2020 ޔޫރޯގެ ކާމިޔާބީ ތަކުރާރު ކުރަން ބޭނުންވެފައި ކަމަށް ސްޕަލެއްޓީ ބުނެފައިވެ އެވެ.
"އިޓަލީ އަބަދުވެސް ފުޓްބޯޅަ މެޗަކަށް ތައްޔާރުވާނީ މޮޅުވެވެން އޮތް ހުރިހާ ގޮތަކަށް ވިސްނައި، ކާމިޔާބީ އަށް ފަހު ވަގުތާ ޖެހެންދެން މަސައްކަތް ކުރަން، ބިރެއް ނުގަންނާނެ، ފަަހަތަކަށް ނުޖެހޭނެ. އެއީ އިޓަލީގެ ބްރޭންޑްގެ ފުޓްބޯޅަ އަކީ،" ސްޕަލެއްޓީ ބުންޏެވެ.
އިޓަލީ ހިމެނިފައި ވަނީ ޔޫރޯގެ މަރުގެ ގްރޫޕްގެ ގޮތުގައި ގިނަ ބަޔަކު ފާހަގަކުރާ ގްރޫޕް ބީގަ އެވެ. މި ގްރޫޕުގައި އިޓަލީ އާއި އަލްބޭނިއާގެ އިތުރުން ދެން ހިމެނެނީ ސްޕެއިން އަދި ކްރޮއޭޝިއާ އެވެ.
އިޓަލީ އާއި އަލްބޭނިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
