މި ސީޒަނުގައި ބޮރޫޝިއާ ޑޯޓްމަންޑަށް މޮޅު ކުޅުމެއް ދެއްކި ފުލްބެކް، އިއަން މާޓްސެން، ގްރީސްގެ މައިކޯނޯސްގެ ޔޮޓެއްގައި ޗުއްޓީ ހޭދަކުރަމުން ދަނިކޮށް، އޭނާ އަށް ނެދަލެންޑްސްގެ ޔޫރޯ ސްކޮޑުން ޖާގަ ލިބުނުކަން ބުނަން ފޯނުން ގުޅީ ނެދަލެންޑްސް ކޯޗު ރޮނާލްޑް ކޫމަން އެވެ.
އުމުރުން 22 އަހަރުގެ މާޓްސެން، ހަ މަސް ދުވަހުގެ ލޯނެއްގެ ދަށުން ޑޯޓްމަންޑަށް ބަދަލުވެ، އެ ޓީމުގައި ތަފާތު މޮޅު ކުޅުމެއް ދެއްކި އެވެ.
ނެދަލެންޑްސް އިން ޔޫރޯ އަށް ނެގި ސްކޮޑުގައި މާޓްސެން ނެތްކަން އޭނާ އަށް އެނގުނީ ޔުއެފާ ޗެމްޕިއަންސް ލީގުގެ ފައިނަލުގައި ރެއާލް މެޑްރިޑާ ދެކޮޅަށް ކުޅެން ތައްޔާރުވަމުން އަންނަނިކޮށެވެ.
ޗެލްސީގެ ކޮންޓްރެކްޓްގައި ހުރި މާޓްސެން، ޔޫރޯ ސްކޮޑަށް ނޭރުމާއި ޗެމްޕިއަންސް ލީގުގެ ފައިނަލުން ބަލިވުމުގެ މާޔޫސްކަމުން އަރައިގަންނަން، ޗުއްޓީއެއް ހޭދަކުރުމުގެ ގޮތުން ލޯބިވެރިޔާ ގޮވައިގެން ދިޔައީ، ގްރީސްގެ މައިކޯނޯސް އަށެވެ. އަދި އެ ތަނުގައި، އެންމެ އަގުބޮޑު ޕެކޭޖްތަކުގެ ތެރެއިން ޗުއްޓީ ހަމަޖައްސައިގެން މާޓްސެން ހުރިއިރު، އޭނާ ނެގި ޕެކޭޖްގެ އަގު، 650،000 ޑޮލަރަށް އަރާ ކަމަށް ނޫސްތަކުން ރިޕޯޓްކޮށްފައިވެ އެވެ.
ޗުއްޓީ ހޭދަކުރަން ގޮސް ހުއްޓައި، މާޓްސެން އަށް ނެދަލެންޑްސްގެ ޔޫރޯ ސްކޮޑުން ފުރުސަތު ލިބިފައިވާކަން އެންގީ އެ ޓީމުގެ ކޯޗު، ކޫމަން އެވެ. މާޓްސެން ޓީމަށް އެރޭގޮތްވީ، ނެދަލެންޑްސް ޓީމަށް ކުޅޭ ޓެއުމް ކޫޕްމައިނާސްގެ އުކުޅުވަޅަށް ލިބުނު އަނިޔާއަކާ ހެދި ޓީމުން ވަކިވާން ޖެހުމުންނެވެ.
ޔޫތު ލެވަލްގައި ނެދަލެންޑްސްގެ ގިނަ ޓީމުތަކަށް ކުޅެފައިވާ މާޓްސެން އަށް ޔޫރޯގައި ކުޅެލަން ލިބުނު މި ފުރުސަތުގެ ބޭނުންހިފަން އޭނާ ހުރީ ތައްޔާރުވެގެންނެވެ.
ޑޯޓްމަންޑްގައި މާޓްސެން ދެއްކި ކުޅުމަށް ބަލާފައި، ޗެލްސީން ވަނީ އަންނަ ސީޒަނުގައި އެ ޓީމުގެ ޕްލޭން ތެރޭގައި އޭނާ ހިމަނަން ނިންމައިފަ އެވެ. އަދި މި ފަހަރުގެ ޔޫރޯގައި މާޓްސެން އަށް ރަނގަޅު ކުޅުމެއް ދެއްކިއްޖެނަަމަ، ޗެލްސީގެ އާ ކޯޗު އެންޒޯ މަރެސްކާ، މާޓްސެން އަށް ޓީމުގެ ފުރަތަމަ އެގާރައިން ޖާގަ ދިނުމުގތެ ފުރުސަތު ވެސް އެބައޮތެވެ.
ޗެލްސީން 2019 ވަނަ އަހަރު މާޓްސެން ގަތީ ނެދަލެންޑްސްގެ ފެޔަނޫޑް ދޫކޮށެވެ. އޭނާ ވަނީ އެ އަހަރު، ލީގު ކަޕް މެޗެއްގައި ޗެލްސީ އަށް ކުޅެފަ އެވެ. އޭގެ ފަހުން، މާޓްސެން ވަނީ ލޯން ޑީލުތަކެއްގައި އެކި ޓީމުތަކަށް ކުޅެފަ އެވެ. އޭގެ ތެރޭގައި ޗާލްޓަން އެތުލެޓިކް، ކަވެންޓްރީ ސިޓީ، ބާންލީ އަދި ޑޯޓްމަންޑް ހިމެނެ އެވެ.
ޖެނުއަރީ މަހު ޑޯޓްމަންޑަށް ދިއުމުގެ ކުރިން މާޓްސެން ވަނީ ޗެލްސީގެ ކޮންޓްރެކްޓް، 2026 ޖޫންގެ ނިޔަލަށް އާ ކޮށްފަ އެވެ.
މާޓްސެން ވަނީ ނެދަލެންޑްސްގެ 15، 16، 17، 19 އަދި 21 އަހަރުން ދަށުގެ ގައުމީ ޓީމަށް ކުޅެފަ އެވެ.
ނެދަލެންޑްސް އިން މި ފަހަރުގެ ޔޫރޯގައި ކުޅޭ ފުރަތަމަ މެޗުގައި މާދަމާ 6 ޖަހާއިރު ކުޅޭނީ، ޕޮލެންޑާ އެވެ.
