ބާލިން، ޖަރުމަނު (ޖޫން 13) - ބޮރޫޝިއާ ޑޯޓްމަންޑްގެ ކޯޗަކަށް ހުރި އެޑިން ޓާޒިޗް، އަމިއްލަ އަށް އެދިގެން މަގާމުން ވަކިވެއްޖެ އެވެ.
ޑޯޓްމަންޑް ގޮވައިގެން މި ފަހަރު ޗެމްޕިއަންސް ލީގުގެ ފައިނަލުގައި ވާދަކުރި ޓާޒިޗް، 41، އެ ޓީމުގެ ކޯޗުކަމުން ވަކިވަން ބޭނުންވާކަން އެންގީ އެ ކްލަބްގެ ވެރިންނާ އެކުގައި ބޭއްވި ބައްދަލުވުމެއްގަ އެވެ.
"ވެމްބްލީގައި އޮތް (ޗެމްޕިއަންސް ލީގުގެ) ފައިނަލަށް ފަހު، އަަހަރެން އެދުނީ ޑޯޓްމަންޑްގެ ސީނިއާ މެނޭޖްމަންޓާ އެކުގައި ބައްދަލުވުމަކަށް، ޑޯޓްމަންޑްގައި ހޭދަކުރި ނުވަ އަހަރު، ހަ އަހަރު ކޯޗިން ސްޓާފެއްގެ ގޮތުގައި އަދި ދެ އަހަރާއި ބައި ހެޑްކޯޗަކަށް ހުރުމަށް ފަހު، އަހަންނަށް ފެންނަނީ ދެން މި ޓީމަށް އާ ކޯޗެއް ގެނެސްގެން ކުރިއަށްދާން،" ޑޯޓްމަންޑްގެ ސަޕޯޓަރެއްގެ ގޮތުގައި ފުރަތަމަ ހުރި ޓާޒިޗް ބުންޏެވެ.
ޓާޒިޗް، ކޯޗިން ކެރިއަރު ފެށީ، 2010-2013 އަށް ޑޯޓްމަންޑްގެ އެކެޑަމީންނެވެ. ފަހުން، ސްލަވެން ބިލިޗްގެ އެސިސްޓަންޓް ކޯޗެއްގެ ގޮތުގައި އޭނާއާ އެކު، ތުރުކީގެ ބެސިކްޓާސް އާއި އިނގިރޭސި ކްލަބް، ވެސްޓް ހޭމް ޔުނައިޓެޑްގައި މަސައްކަތްކުރި އެވެ.
ލޫޝިއަން ފާވްރޭގެ އެސިސްޓަންޓް ކޯޗެެއްގެ ގޮތުގައި، 2017 ވަނަ އަހަރު ނޮވެމްބަރު މަހު، ޓާޒިޗް ވަނީ ޑޯޓްމަންޑަށް އެނބުރި އަތުވެފަ އެެވެ. ޑިސެމްބަރު، 2020 ގައި ފާވްރޭ ވަކިކުރުމުން، ޑޯޓްމަންޑްގެ ވަގުތީ ކޯޗަކަށް ޓާޒިޗް ހަމަޖެއްސި އެވެ. އެ ފަހަރު އޭނާ ވަނީ ޖަރުމަނު ކަޕް އެ ޓީމަށް ކާމިޔާބުކޮށްދީފަ އެވެ.
ޑޯޓްމަންޑްގެ ޓެކްނިކަލް ޑިރެކްޓަރަކަށް ވެސް މަސައްކަތްކުރުމަށް ފަހު، ޓާޒިޗް ހެޑް ކޯޗުކަމާ ރަސްމީކޮށް ހަވާލުވީ، 2022 ވަނަ އަހަރު އެވެ. ޓާޒިޗްގެ ފުރަތަމަ ސީޒަނުގައި، ޑޯޓްމަންޑް ނިންމާލީ ލީގުގެ ދެ ވަނައިގަ އެވެ. އަދި މިދިޔަ ސީޒަނުގައި ލީގުގެ ފަސް ވަނައިގަ އެވެ.
"މި ކްލަބް ދޫކޮށްލުމަކީ އަހަންނަށް ވަރަށް އުނދަގޫ ނިންމުމެއް، ވަރަށް ވިސްނާފައި މި ގޮތަށް މި ނިންމީ، އަހަރެން އަބަދުވެސް ޑޯޓްމަންޑަށް ކާމިޔާބަށް އެދެން،" ޓާޒިޗް ބުންޏެވެ.
