ރޯމް، އިޓަލީ (ޖޫން 11) - ޕްރޮފެޝަނަލް ޓެނިސް ކުޅުންތެރިންގެ ފިިރިހެނުންގެ ރޭންކިން އެއް ވަނަ އަށް އިޓަލީގެ ޖަނިކް ސިނާ އަރައިފި އެވެ.
ސިނާ، 22 އަކީ ޓެނިހު ރޭންކިންގެ އެއް ވަނަ މަގާމަށް އެރި އިޓަލީ އަށް އުފަން ފުރަތަމަ ކުޅުންތެރިޔާ އެވެ. އެހެންކަމުން، ދުނިޔޭގެ ރޭންކިންގެ ކުރިއަށް ސިނާ މި ޖެހިލީ، ގައުމީ ޝަރަފަކާ އެކު އެވެ.
މީގެ ކުރިން އިޓަލީ ކުޅުންތެރިއަކަށް އެންމެ ކުރިއަށް ދެވިފައިވަނީ ރޭންކިންގެ ހަތަރު ވަނަ އަށެެވެ. އެއީ، 1976 ވަނަ އަހަރު ދުނިޔޭގެ ރޭންކިން ހަތަރަކަށް ޖެހިލި، އެޑްރިއާނޯ ޕަނާޓާ އެވެ. ޕަނާޓާގެ ރެކޯޑް ސިނާ މުގުރާލީ މިދިޔަ ފެބްރުއަރީ މަހު ތިން ވަނަ އަށް ޖެހިލައިގެންނެވެ.
ސިނާ އަށް އެއް ވަނަ ލިބުނީ، މި ފަހަރުގެ ފްރެންޗް އޯޕަންގައި، ނޮވަކް ޖޮކޮވިޗް، ކުއާޓާ ފައިނަލާ ހަމައިން މުބާރާތުން ވަކިވުމުންނެވެ. ޖޮކޮވިޗް، މުބާރާތުން ވަކިވީ އަނިޔާއާ ހެދި އެވެ. ޖޮކޮވިޗަށް ދުނިޔޭގެ ރޭންކިން އެއް ވަނަ މި ގެއްލުނީ، 39 ހަފްތާ އަށް ފަހު އެވެ.
ރޭންކިންގެ އެއް ވަނަ ސިނާ އަށް ލިބުމުގައި މި އަހަރު އޭނާގެ ފޯމު އިސް ރޯލެއް ކުޅުނެވެ. އޭނާ ވަނީ އޮސްޓްރޭލިއަން އޯޕަން އާއި މިއާމީ އޯޕަން ތަށި ހޯދައިފަ އެވެ. ފްރެންޗް އޯޕަންގެ ސެމީ ފައިނަލުގައި ސިނާ ބަލިވީ މުބާރާތުގެ ތަށި ހޯދި ސްޕެއިނުގެ ކާލޮސް އަލްކަރާޒް އަތުންނެވެ.
ސިނާ ބުނީ، ދުނިޔޭގެ ރޭންކިން އެއް ވަނައިގެ ގޮތުގައި އެ ފެށެނީ އޭނާގެ ކެރިއަރުގެ އާ ޗެޕްޓަރެެއް ކަމަށެވެ.
އެ ގޮތުން، ރޭންކިން އެއް ވަނަ ދިފާއުުކުރަން ސިނާ ނުކުންނާނެ މުބާރާތަކީ، އަންނަ މަހު އެއް ވަނަ ދުވަހު ފަށާ ވިމްބަލްޑަން ޓެނިސް މުބާރާތެވެ. މިިދިޔަ އަހަރުގެ ވިމްބަލްޑަންގައި ސިނާ ވަނީ ސެމީ ފައިނަލަށް ދަތުރުކޮށްފަ އެވެ.
ސިނާ އަކީ، 1973 ވަނަ އަހަރު ޓެނިހުގެ ރޭންކިން ނަގަން ފެށި ފަހުން، އެ މަގާމަށް ޖެހިލި 29 ވަނަ ކުޅުންތެރިޔާ އެވެ. ސިނާ ދެކޭގޮތުގައި، އޭނާ ރޭންކިން އެއް ވަނަ އަށް އެރުމަކީ، އެ މަގާމަށް ދިއުމަށް އުންމީދުކުރާ އިޓަލީ ކުޅުންތެރިންނަށް ފެށުމެއް ކަމަށެވެ.
