ނިއުޔޯކް، ޔުނައިޓެޑް ސްޓޭޓްސް (ޖޫން 10) - މިހާރު ކުރިއަށްދާ ޓީ20 ވޯލްޑް ކަޕްގައި ކުޅަދާނަ ބޯލަރު ޖަސްޕްރީތު ބުމްރާ ދެއްކި މޮޅު ކުޅުމާ އެކު، އިންޑިއާ އިން ހަ ލަނޑުން ވާދަވެރި ޕާކިސްތާން އަތުން މޮޅުވެއްޖެ އެވެ.
އެންމެ ފަހުގެ ރަނަރަޕް ޕާކިސްތާން މި ވަނީ މި ފަހަރުގެ މުބާރާތުގައި ކުޅުނު ފުރަތަމަ ދެ މެޗުން ބަލިވެފަ އެވެ. ފުރަތަމަ މެޗުން އެމެރިކާ އަތުން ބަލިވިއިރު، ރޭ ދެ ވަނަ މެޗުގައި ވަނީ، އިންޑިއާ އަތްދަށުވެފަ އެވެ.
ގްރޫޕް އޭގެ ކޮންމެ ޓީމެއް ދެ މެޗު ކުޅެފައިވާއިރު، އެއް ވަނައިގައި އޮތް އިންޑިއާ އާއި ދެ ވަނައިގައި އޮތް އެެމެރިކާ އަށް ވަނީ ހަތަރު ޕޮއިންްޓް ލިބިފަ އެވެ. އިންޑިއާ ކުރީގައި އޮތީ ނެޓް ރަން ރޭޓުންނެވެ. ތިން ވަނައިގައި އޮތް ކެނަޑާ އަށް ދެ މެޗުން ދެ ޕޮއިންޓް ލިބިފައިވާއިރު، ހަތަރެއްގައި އޮތް ޕާކިސްތާނާއި ފުލުގައި އޮތް އަޔަލެންޑަށް އަދި ޕޮއިންޓެއް ނުލިބެ އެވެ.
ޓޮސް ދިމާވުމުން ޕާކިސްތާނުން ނިންމީ ފީލްޑް ކުރާށެވެ. އިންޑިއާ އިން ކުޅެން އަރައި، 19 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 119 ލަނޑެވެ. މިއީ، ޓީ20 ވޯލްޑް ކަޕް މެޗެއްގައި އިންޑިއާ އަށް ޕާކިސްތާން ކައިރީގައި މި ފަހުން ނެރެވުނު އެންމެ ދަށް ސްކޯ އެވެ.
އިންޑިއާ އަށް މެޗު ފަށައިގެން ފައިތިލަ ސާބިތުނުކުރެވުނީ، އެ ޓީމުގެ ދެ ތަރިން ކަމަށްވާ، ކެޕްޓަން ރޯހިތު ޝަރްމާ އާއި ވިރާތު ކޯލީ އަށް މާ ރަނގަޅު ސްކޯއެއް ނުހެދުމުންނެވެ. އެ ގޮތުން، ރޯހިތު 13 ލަނޑު ހެދިއިރު، ވިރާތު ނުބައިވީ ހަތަރު ލަނޑަށެެވެ. އިިންޑިއާ އިން އެންމެ ރަނގަޅު ކުޅުމެއް ދެއްކީ، 31 ބޯޅައިން 42 ލަނޑު ހެދި ރިޝަބް ޕާންޓް އެވެ.
މި އިނިންސްގައި ޕާކިސްތާންގެ ހަރިސް ރައޫފް އާއި ނަސީމް ޝާހް، ކޮންމެ ކުޅުންތެރިއަކު ދެ ވިކެޓް ނެގި އެވެ.
ޖަވާބުގައި ކުޅެން އަރައި، ޕާކިސްތާނަށް 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 113 ލަނޑެވެ. ޕާކިސްތާން ޓީމަށް އެންމެ ރަނގަޅު ކުޅުމެއް ދެއްކީ، 44 ބޯޅައިން 31 ލަނޑު ހެދި މުހައްމަދު ރިޒްވާން އެވެ.
ޕާކިސްތާނަށް ޓީ20 ވޯލްޑް ކަޕް ތާރީހުގައި އެންމެ ދަށް ސްކޯއެއް އަނބުރައިނުލެވުނީ، ރޭގެ މެޗުގައި އިންޑިއާގެ ބޯލަރުންގެ ހުށިޔާރުކަމުންނެވެ. އެ ގޮތުން، މެޗުގެ މޮޅު ކުޅުންތެރިޔާ، ބުމްރާ ވަނީ ތިން ވިކެޓް ނަގައިފަ އެވެ. އަދި ހާޑިކް ޕާންޑްޔާ ވެސް ވަނީ ދެ ވިކެޓް ނަގައިފަ އެެވެ.
މި މެޗުން ބަލިވުމުން ޕާކިސްތާނަށް އަމިއްލަ ބާރުގައި ނޮކައުޓަށް ދިއުމުގެ ފުރުސަތު ވަނީ ގެއްލިފަ އެވެ. އެ ޓީމުން ޖެހޭނީ ދެން ކުޅޭ ދެ މެޗުން، އަޔަލެންޑާއި ކެނަޑާ އަތުން މޮޅުވެ، ދެން މެޗުތަކުން ނުކުންނަ ނަތީޖާ އަށް އިންތިޒާރުކުރާށެވެ.
