މިއާމީ (ޖޫން 8) - އެމެރިކާގެ މޭޖާ ސޮކާ ލީގުގެ އިންޓަ މިއާމީ އަށް ކުޅެމުން އަންނަ އާޖެންޓީނާގެ ތަރި ލިއޮނަލް މެސީ، 2026 ވަނަ އަހަރު އެމެރިކާގައި ބާއްވާ ފީފާ ވޯލްޑް ކަޕުން ފެނިދާނެ ކަމުގެ އިޝާރާތެއް ދީފި އެވެ.
އެންމެ ފަހުން ގަތަރުގައި ބޭއްވި ވޯލްޑް ކަޕް އާޖެންޓީނާއާ އެކު މެސީ ވަނީ ކާމިޔާބު ކޮށްފަ އެވެ. މިއާއެކު ފުޓުބޯޅައިގެ ކުލަބް ފެންވަރުގައި އަދި ގައުމީ ޓީމާ އެކު ހޯދެން ހުރި ހުރިހާ ތައްޓެއް މެސީ ވަނީ ހޯދައިފަ އެވެ.
ދާދި ފަހުން ދިން އިންޓަވިއުއެއްގައި މެސީ ވަނީ އޭނާގެ ކުރިމަގާ މެދު ވާހަކަ ދައްކައިފަ އެވެ. އެ ގޮތުން، މެސީ ބުނީ މި އަހަރުގެ ކޮޕަ އެމެރިކާ އަށްފަހު ގައުމީ ޓީމުން ރިޓަޔާވާން ނިންމާފައިނުވާކަން ހާމަކޮށްފަ އެވެ. އަދި 2026 ވަނަ އަހަރުގެ ވޯލްޑް ކަޕުގައި އޭނާ ފެނިދާނެ ކަމުގެ އިޝާރާތެއް ވެސް ވަނީ ދީފަ އެވެ.
"އަހަރެން ރިޓަޔާ ކުރަން ވިސްނާނީ އަހަރެންގެ ހަށިގަނޑު އެކަމަށް އެދުމުން. އަހަރެން ނުދެކެން އުމުރަކީ މައްސަލަ އެއް ކަން. އަދި ވެސް އަހަރެން އަށް އަހަރެންގެ "ބެސްޓު" އެބަ ދެއްކޭ" މެސީ ބުންޏެވެ.
މެސީ ބުނީ ވޯލްޑް ކަޕް ކުޅުމާމެދު ގޮތެއް ނިންމަން އަދި ވަގުތު އެބައޮތް ކަމަށެވެ. އަދި މިހާރުގެ ފޯކަސް އަކީ ކުރިއަށް އޮތް ކޮޕަ އެމެރިކާ މުބާރާތް ކަމަށް މެސީ ބުންޏެވެ.
މެސީ ބުނީ އެންމެ ފަހުން ކުރިއަށްދިޔަ ވޯލްޑް ކަޕް ކާމިޔާބުކުރުމާއެކު, ބޮޑު ޕްރެޝަރަކުން ސަލާމަތްވެވުނު ކަމަށެވެ.
މި މަހު 20 ވަނަ ދުވަހު އެމެރިކާގައި ފަށާ ކޮޕަ އެމެރިކާ ފުޓްބޯޅަ މުބާރާތަށް އާޖެންޓީނާ އިން ނުކުންނާނީ ފޭވަރިޓުގެ ގޮތުގައިތޯ ސުވާލުކުރުމުން މެސީ ބުނީ، ދެކުނު އެމެރިކާ ސަރަހައްދުގެ ކޮންމެ މުބާރާތަކަށް ނުކުންނައިރު، ފޭވަރިޓުންގެ ގޮތުގައި ގުނަނީ ބްރެޒިލާއި އާޖެންޓީނާ ކަމަށެވެ.
