މެންޗެސްޓާ (ޖޫން 4) - މުސްތަގުބަލާ މެދު ވިސްނަން އަދި ވަގުތު އެބައޮތް ކަމަށާއި, އޭނާގެ ކުރިމަގާ މެދު ވިސްނަމުން އަންނަ ކަމަށާއި, އެކަމުގެ މަޝްވަރާތައް އާއިލާއާ އެކު ކުރަމުން އަންނަ ކަމަށް މެންޗެސްޓާ ސިޓީގެ ތަރި ކެވިން ޑި ބްރޭނާ ބުނެފި އެވެ.
ސިޓީ އާއެކު ޑި ބްރޭނާ ހަދާފައިވާ ކޮންޓްރެކްޓް އަންނަ އަހަރުގެ ޖޫން މަހު ހަމަވާނެ އެވެ. އެހެންވެ, ސިޓީ އިން މި ފަހަރުގެ ޓްރާންސްފާގައި ޑި ބްރޭނާ ވިއްކާލަން މަސައްކަތް ކުރާނެ ކަމަށް ރިޕޯޓްތައް ބުނެ އެވެ.
މި ޓްރާންސްފާ މާކެޓުގައި ވެސް ރަނގަޅު އަގެއް ހުށަހަޅައިފިނަމަ ޑި ބްރޭނާ ވިއްކާލަން ސިޓީ އިން އޮތީ ތައްޔާރަށް ކަމަށް ރިޕޯޓްތައް ބުނެ އެވެ. ޑި ބްރޭނާ ބުނީ އޭނާގެ ކެރިއަރުގެ ފަހު ދެ އަހަރު ސައުދީގައި ކުޅެން ލިބުން އެއީ ރަނގަޅު ފައިސާގެ ގޮތުން ބަލާނަމަ ކުރިއެރުން ލިބޭނެ ކަމައް ކަމަށެވެ. އަދި ސައުދީގެ ހުށަހެޅުންތަކެއް އޭނާ އަށް ލިބިފައިވާ ކަމަށް ޑި ބްރޭނާ ބުނެފައިވެ އެވެ.
"އަހަރެންގެ ކެރިޔަރުގެ ފަހު ދެ އަހަރުގައި މުސާރަ ބޮޑުވާނަމަ އެއީ ލިބޭ ކުރިއެރުމެއް. ސައުދީގެ ހުށަހެޅުންތަކެއް ވަނީ ލިބިފައި. އަހަރެން މި އަންނަނީ އާއިލާ އާއެކު, މަޝްވަރާ ކުރަމުން. އެކަމަކު އަދި ނިންމުމެއް ނިންމަން ވަގުތު އެބައޮތް. ސިޓީ އާއެކު އަހަރެން ހަދާފައިވާ އެގްރީމަންޓް ހަމަވާނީ އަންނަ އަހަރު" ޑި ބްރޭނާ ބުންޏެވެ.
ރިޕޯޓްތައް ބުނާ ގޮތުން ޑި ބްރޭނާގެ ސޮއި ހޯދަން މަސައްކަތް ކުރަމުން އަންނަނީ ސައުދީގެ އަލް ނަސްރު އަދި އަލް ހިލާލުންނެވެ.
ސިޓީން ޑި ބްރޭނާ ގަތީ، 2015 ވަަނަ އަހަރު ވުލްފްސްބާގް އަށް 65 މިލިއަން ޑޮލަރުގެ ފީއެއް ދެއްކުމަށް ފަހު އެވެ. އޭގެ ފަހުން، އޭނާ އަންނަނީ ސިޓީން ހޯދަމުން އަންނަ ގިނަ ކާމިޔާބީތަކުގައި އިސް ރޯލެއް ކުޅެމުންނެވެ. ޑި ބްރޭނާ ވަނީ ޕްރިމިއާ ލީގުގެ ތަށި ސިޓީގައި ހުރެ ހަ ފަހަރު ހޯދައިފަ އެވެ.
