އިސްތަންބޫލް، ތުރުކީ (ޖޫން 1) - ސައުދީ ޕްރޯ ލީގުގެ ދެ ކްލަބަކާއި ތުރުކީގެ ބެސިކްޓާސް އިން ލިބިފައި އޮތް ހުށަހެޅުންތައް ދޫކޮށް، ޕޯޗުގީސް ކޯޗު ހޯސޭ މޮރީނިއޯ، ތުުރުކީގެ ގަދަބާރު ފެނަބާޗޭއާ ހަވާލުވާން އެއްބަސްވެފައިވާ ކަމަށް ރިޕޯޓްތައް ބުނެފި އެވެ.
މިދިޔަ ޖެނުއަރީ މަހު، އިޓަލީގެ ރޯމާ އިން ވަކިކުރި މޮރީނިއޯއާ މަޝްވަރާކުރާ ކަމަށް، ދާދި ފަހުން، ބެސިކްޓާސްގެ ނައިބު ރައީސް، ހުސެއިން ޔުޝެލް ވިދާޅުވި އެވެ. އޭނާ ވިދާޅުވީ، ތުރުކީ ކްލަބަކަށް އަންނަން މޮރީނިއޯ ހުރީ ބޭނުންވެފައި ކަމަށާއި، ވަރަށް އަވަހަށް ކޮންޓްރެކްޓް ހުށަހަޅާނެ ކަމަށެވެ.
އެކަމަކު، މީޑިއާ ރިޕޯޓްތައް ބުނާގޮތުން، މޮރީނިއޯ ވަނީ ބެސިކްޓާސްގެ ބަދަލުގައި، ދެ އަހަރުގެ ކޮންޓްރެކްޓެއްގައި، ފެނަބާޗޭ އަށް ކޯޗުކޮށްދޭން އެއްބަސްވެފަ އެވެ.
މޮރީނިއޯ އަށް، މިދިޔަ ދޮޅު މަސް ދުވަސް ތެރޭގައި އެންމެ ބޮޑު ހުށަހެޅުންތަކެއް ލިިބިގެންދިޔައީ، ސައުދީ އަރަބިއްޔާގެ ޕްރޮފެޝަނަލް ލީގުގެ ކްލަބްތަކުންނެވެ. އެ ގޮތުން، އެއް ޓީމަކުން މޮރީނިއޯ އަށް ރެކޯޑް މުސާރައެއް ވެސް ހުށަހެޅި އެވެ. އެކަމަކު، ޔޫރަޕްގެ ފުޓްބޯޅައިގައި މަސައްކަތް ކުރަން ބޭނުންވާތީ، މޮރީނިއޯ ނިންމީ ސައުދީގެ އޮފާތައް ދޫކޮށްލާށެވެ.
ތުރުކީގެ މީޑިއާ ރިޕޯޓްތައް ބުނާގޮތުން މޮރީނިއޯ ވަރަށް އަަވަހަށް ރަސްމީކޮށް ފެނަބާޗޭއާ އެކު ކޮންޓްރެކްޓްގައި ސޮއިކުރާނެ އެވެ.
މީގެ ކުރިން މޮރީނިއޯ ވަނީ ޔޫރަޕްގެ ހަތަރު ގައުމެއްގައި ކޯޗިންގެ މަސައްކަތްކޮށްފަ އެވެ. ޕޯޗުގަލްގައި ޕޯޓޯއާ އެކު ފެނުުނުއިރު، އިނގިރޭސި ޕްރިމިއާ ލީގުގައި ޗެލްސީ، މެންޗެސްޓާ ޔުނައިޓެޑް އަދި ޓޮޓެންހަމް އަށް ކޯޗުކޮށްދިނެވެ. ސްޕެއިނުގެ ރެއާލް މެޑްރިޑާއި އިޓަލީގެ އިންޓަ މިލާނަށް ވެސް މޮރީނިއޯ ވަނީ ކޯޗުކަން ކޮށްދީފަ އެވެ. ފެނަބާޗޭ އަށް ބަދަލުވެއްޖެނަމަ، ތުރުކީ ވެގެންދާނީ، ޕްރޮފެޝަނަލް ކޯޗިންގައި މޮރީނިއޯ މަސައްކަތްކުރާނެ ފަސް ވަނަ ގައުމަށެވެ.
