ސްރީ ލަންކާގެ ކޭންޑީގައި ކުރިއަށްދިޔަ، ސައުތު އޭޝިއަން ޔޫތު ޓޭބަލް ޓެނިސް ޗެމްޕިއަންޝިޕްގައި ރާއްޖޭގެ ޓީމުން ހަތަރު މެޑަލް ހޯދައިފި އެވެ.
އެ ގޮތުން، ރާއްޖޭން ކާމިޔާބުކުރީ ތިން ލޯ މެޑަލާއި އެއް ރިހި މެޑަލް އެވެ.
ރާއްޖެ އަށް ރިހި މެޑަލް ލިބުނީ، 19 އަހަރުން ދަށުގެ މިކްސް ޑަބަލްސް ބައިންނެވެ. އެ ގޮތުން، ފައިނަލުގައި، ރާއްޖޭގެ ފާތިމަތު ދީމާ އަލީ އާއި އަހްޔާރު އަހުމަދު ހާލިދުގެ ޕެއާ އަތުން، އިންޑިއާގެ ބެޓަޖީ އާއި ޕްރިތާގެ ޕެއާ މޮޅުވީ، 3-0 އިންނެވެ. ސެޓުތައް ގެންދިޔައީ، 11-09، 14-12، 11-08 އިންނެވެ.
މުބާރާތުގައި ރާއްޖޭން ލޯ މެޑަލް ހޯދީ، 19 އަހަރުން ދަށުގެ އަންހެން ޑަބަލްސް ބައިން، ދީމާ އާއި މިޝްކާ މުހައްމަދު އިބްރާހިމްގެ ޕެއާ އެވެ. ނަވާރަ އަހަރުން ދަށުގެ ފިރިހެން ޑަބަލްސް ބައިން ރާއްޖޭގެ އުމީރު މުހައްމަދު މުއިއްޒު އާއި އަހްޔާރުގެ ޕެއާ ލޯ މެޑަލް ހޯދިއިރު، 15 އަހަރުން ދަށުގެ އަންހެން ޑަބަލްސް ބައިން، އައިޝަތު އަލްސާ ނާފިޒު އާއި އައިޝަތު މަލާކް ތާސީންގެ ޕެއާ ލޯ މެޑަލް ހޯދި އެވެ.
މުބާރާތުގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު އެވެ.
ސައުތު އޭޝިއާގެ ޔޫތު މުބާރާތުގެ މެޑަލް ތަފްސީލަށް ބަލާއިރު، އެންމެ ކުރީގައި އޮތީ ޖުމްލަ 17 މެޑަލް ހޯދި އިންޑިއާ އެވެ. އިންޑިއާ އިން 13 ރަން މެޑަލާއި ހަތަރު ރިހި މެޑަލް ހޯދި އެވެ.
ދެ ވަނަ ހޯދި ސްރީ ލަންކާ އިން ވަނީ 12 މެޑަލް (އެއް ރަން މެޑަލް، 5 ސިލްވާ މެޑަލް އަދި 6 ލޯ މެޑަލް) ހޯދައިފަ އެވެ. ތިން ވަނަ އަށް ދިޔަ، ޕާކިސްތާނުން 10 މެޑަލް (އެއް ރިހި މެޑަލް އަދި 9 ލޯ މެޑަލް) ހޯދިއިރު، ހަތަރެއްގައި ނިންމާލި، ބަންގްލަދޭޝަށް ހަ މެޑަލް (ދެ ސިލްވާ އަދި 4 ލޯ މެޑަލް) ހޯދި އެވެ. ފަސް ވަނަ އަށް ދިޔަ، ނޭޕާލަށް ފަސް މެޑަލް (އެއް ރިހި މެޑަލް އަދި ހަތަރު ލޯ މެޑަލް ލިބުނެވެ. އަދި ރާއްޖެ އަށް ލިބުނީ، ހަތަރު މެޑަލް އެވެ. އެއީ، އެއް ރިހި މެޑަލާއި ތިން ލޯ މެޑަލް އެވެ.
