ރޯމް (މެއި 30) - އިޓަލީގެ ގައުމީ ޓީމާއި ޔުވެންޓަސްގެ ލެޖަންޑް ލިއޮނާޑޯ ބޮނޫޗީ ކުޅުން ހުއްޓާލައިފި އެވެ.
ކްލަބު ކެރިއަރުގައި ބޮނޫޗީ ވަނީ 12 އަހަރު ޔުވެންޓަސްގައި ހޭދަކޮށްފަ އެވެ. މީގެ އިތުރުން އޭނާ ވަނީ އޭސީ މިލާން، ޓްރެވީސިއޯޯ، ޕީސާ، ބާރީ އަދި ޖަރުމަންގެ ޔޫނިއަން ބާލިން އަށް ކުޅެފައެވެ.
ބޮނޫޗީ ކުޅުން ހުއްޓާލީ ތުރުކީގެ ފެނަބާޗޭ އަށް ކުރު މުއްދަތުގެ އެއްބަސްވުމެއްގެ ދަށުން ކުޅެފަ އެވެ.
ބޮނޫޗީގެ ކެރިއަރުގައި އެންމެ ކާމިޔާބު އަހަރުތައް ހޭދަކުރީ ޔުވެންޓަސްގަ އެވެ. ޔުވެންޓަސްގައި އޭނާ ޖުމްލަ 19 ތަށި ހޯދިއެވެ. އޭގެ ތެރޭގައި އިޓާލިއަން ލީގުގެ ޗެމްޕިއަންކަން ހޯދި ފަސް ފަހަރު ވެސް ހިމެނެ އެވެ.
ބޮނޫޗީ ކުޅުން ހުއްޓާލަން ނިންމުމާ އެކު ޔުވެންޓަސް އިން ވަނީ ބަޔާނެއް ނެރެފަ އެވެ. ޔުވެންޓަސް އިން ބުނީ ބޮނޫޗީ އަކީ "ކްލަބުގެ ފަހުގެ ތާރީހުގެ ބޮޑު ބައެއް" ކަމަށެވެ.
"އަހަރަމެން ބޮނޫޗީ އަށް ސެޕްޓެމްބަރު މަހު އަލްވަދާއު ކިޔިން. އެކަމަކު ބޮނޫޗީ އާއި މި ކްލަބާ އޮތް ގުޅުން ނުކެނޑޭނެ،" ޔުވެންޓަސް އިން ބުންޏެވެ.
ބޮނޫޗީ ވަނީ އިޓަލީގެ ގައުމީ ޓީމަށް 121 މެޗު ކުޅެފަ އެވެ. ބޮނޫޗީ ވަނީ 2010 އާއި 2014 ވަނަ އަހަރުގެ ވޯލްޑް ކަޕްގައި ކުޅެފައެވެ. އަދި ޔޫރޯގެ ތިން މުބާރާތުގައި ގައުމީ ޓީމަށް ކުޅެފަ އެވެ. އޭގެ ތެރެއިން 2020 ވަނަ އަހަރުގެ މުބާރާތް އިޓާލީން ވަނީ ކާމިޔާބުކޮށްފަ އެވެ.
