ޕެރިސް (މެއި 30) - ފްރާންސްގެ ތަރި ކީލިއަން އެމްބާޕޭ ދެން ބަދަލުވާނެ ކުލަބް ވަރަށް އަވަހަށް ހާމަކުރާނެ ކަމަށް ބުނެފި އެވެ.
މި ސީޒަން ނިމުމުން އެމްބާޕޭ ޕީއެސްޖީ ދޫކޮށްލާނެކަން ހާމަކޮށްފައިވާއިރު, އޭނާ ދެން ބަދަލުވާނީ ރެއާލް މެޑްރިޑަށް ކަމަށް ރިޕޯޓްތައް ބުނެ އެވެ. އެކަމަކު އެމްބާޕޭ ބުނީ އޭނާ ދެން ބަދަލުވާނެ ކުލަބް ހާމަކުރާނީ އެ ވަގުތު ޖެހުމުން ކަމަށެވެ.
މީޑިއާ އަކަށް ދިން އިންޓަވިއުއެއްގައި އެމްބާޕޭ ބުނީ ކުރިއަށް އޮތް ހަފުތާ އެއްގެ ތެރޭގައި އޭނާ ދެން ބަދަލުވާނެ ޓީމު ހާމަކުރާނެ ކަމަށެވެ. އަދި އެ ކުލަބާއެކު އެއްބަސްވުމުގައި ޔޫރޯގެ ކުރިން ސޮއި ކުރާނެ ކަމަށް އެމްބާޕޭ ބުންޏެވެ.
"އަހަރެން ދެން ބަދަލުވާނެ ކުލަބެއް ކަނޑައަޅައިފިން. ވަރަށް އަވަހަށް އެއްބަސްވުމުގައި ސޮއި ކުރާނަން. ޔޫރޯގެ ކުރިން އެކަން ކުރުމަށް މި އަންނަނީ މަސައްކަތް ކުރަމުން" އެމްބާޕޭ ބުންޏެވެ.
ޔޫރަޕްގެ ބޮޑެތި ކުލަބްތަކުން އެމްބާޕޭ ހޯދަން މަސައްކަތް ކުރަމުން އަންނައިރު, އޭނާގެ އަގުބޮޑު މުސާރަ ދެވޭނެކަމަށް ބެލެވެނީ ރެއާލަށެވެ. އެކަމަކު, އެ ކުލަބުން އެމްބާޕޭ ދެން ގެންދާ ކަމަށްވަނީނަމަ, މީގެ ކުރިން އެ ކުލަބުން އެމްބާޕޭ އަށް ހުށަހެޅި މުސާރައަށްވުރެ މި ފަހަރު ހުށަހަޅާ މުސާރަ ކުޑަވާނެ ކަމަށް ބެލެވެ އެވެ.
އެމްބާޕޭ ހޯދަން ތިން ފަހަރެއްގެ މަތިން ރެއާލުން ވަނީ ބިޑްކޮށްފަ އެވެ. އެކަމަކު އެ ތިން ފަހަރު ވެސް އެމްބާޕޭ ވަނީ ރެއާލުގެ ހުށަހެޅުމަށް ދެކޮޅު ހަދާފަ އެވެ.
އެމްބާޕޭ ޕީއެސްޖީ އަށް ކުޅެދިން 306 މެޗުގައި އޭނާ ވަނީ 256 ގޯލު ޖަހާ 96 ގޯލު ޖަހަން އެހީތެރިވެދީފަ އެވެ. އަދި ޕީއެސްޖީ އާއެކު ހަތް ފަހަރު ފްރެންޗް ލީގު ވަނީ ކާމިޔާބު ކޮށްފަ އެވެ.
