ލަންޑަން (މެއި 25) - ބަޔާން މިއުނިކުން އެ ކްލަބްގެ ކޯޗަކަށް ބާންލީގައި ހުރި ވިންސެންޓް ކޮމްޕެނީ ހަމަޖައްސަން ނިންމި ނިންމުން އޭނާގެ ނަޒަރުގައި ރަނގަޅު ކަމަށާއި ކޮންމެ ވެސް އެއް ދުވަހަކުން ކޮމްޕެނީ، މެންޗެސްޓާ ސިޓީގެ ކޯޗުކަން ވެސް ކުރާނެ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި ޕްރިމިއާ ލީގުގައި މި ފަހަރު ރެލިގޭޓްވި، ބާންލީގައި ހުރި ކޮމްޕެނީ، ގެންދަން ޖަރުމަނުގެ ގަދަބާރު ބަޔާން އިން ނިންމުމުން އެ ކަމަށް ގިނަ މީޑިއާތަކެއްގެ ފާޑުކިޔުން ވަނީ އަމާޒުވެފަ އެވެ.
އެކަމަކު، ގާޑިއޯލާ ދެކޭގޮތުގައި، މިއީ ބަޔާން އިން ނިންމި ރަނގަޅު ނިންމުމެކެވެ.
"ބަޔާނުން، ވިނީ (ކޮމްޕެނީ) އަށް ޝައުގުވެރިވުމަކީ އަހަންނަށް ލިބޭ އުފަލެއް. ބާންލީ ރެލިގޭޓްވިޔަސް އަހަރެން ކޮމްޕެނީއާ މެދު ދެކެނީ ވަރަށް ތަފާތު ނަޒަރަކުން،" ކުރިން ބަޔާން އަށް ވެސް ކޯޗުކޮށްދިން ގާޑިއޯލާ ބުންޏެވެ.
"އޭނަ (ކޮމްޕެނީ)ގެ މަސައްކަތް ވަރަށް ރަނގަޅު، އޭނަ އެކަން ކުރާ ގޮތް، ފުޓްބޯޅައިގެ ފިލޯސަފީ އާއި ކަންކަމަށް ކޮމްޕެނީ ހުރީ ފަރިތަވެފައި، މީޑިއާއާ ކުރިމަތިލާން ވެސް އެނގޭ،"
ގާޑިއޯލާ ބުނީ، ސިޓީގެ ކުރީގެ ކެޕްޓަން، ކޮމްޕެނީ، އެ ކްލަބްގެ ކޯޗެއްގެ ގޮތުގައި ވެސް މުސްތަގުބަލުގައި ފެންނާނެ ކަމަށް ގަބޫލުކުރާ ކަމަށެވެ. ސިޓީގައި ކޮމްޕެނީ ހޭދަކުރި 11 އަހަރު ތެރެއިން ފަހު ތިން އަހަރު ކުޅުނީ ގާޑިއޯލާގެ ކޯޗުކަމުގަ އެވެ.
"ވިނީ (ކޮމްޕެނީ) އަދި މި ޓީމު (ސިޓީ)ގެ ކޯޗަކަށް ވެސް ހުންނާނެ، އެ ދުވަސް ފެންނާނެ،" ގާޑިއޯލާ ބުންޏެވެ.
ބާންލީގެ ކޯޗަކަށް 2028 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓެއްގައި ހުރި، ކޮމްޕެނީގެ އެ އެއްބަސްވުން އުވާލަން ދައްކަން ޖެހޭ ފީ ކަމަށްވާ 15 މިލިއަން ޑޮލަރު ދޭން ބަޔާނުން ވަނީ އެއްބަސްވެފަ އެވެ. ކޮމްޕެނީ، ބަޔާނާ އެކު، ތިން އަހަރުގެ ކޮންޓްރެކްޓެއްގައި ސޮއިކުރާނެ ކަމަށް ރިޕޯޓްތައް ބުނެ އެވެ.
