ޗެންނާއި، އިންޑިއާ (މެއި 25) - ރާޖަސްތާން ރޯޔަލްސް އަތުން 36 ލަނޑުން މޮޅުވެ، ސަންރައިޒާސް ހައިދަރުއާބާދުން އިންޑިއަން ޕްރިމިއާ ލީގު (އައިޕީއެލް) ފައިނަލުގެ ފަހު ޖާގަ ހޯދައިފި އެވެ.
އާދިއްތަ ދުވަހު ކުޅޭ ފައިނަލުގައި، ހައިދަރުއާބާދުން ކުޅޭނީ، ކަލްކަތާ ނައިޓްރައިޑާސްއާ ދެކޮޅަށެވެ. ޕްލޭއޮފްގެ ފުރަތަމަ މެޗުން، ކަލްކަތާ އިން ވަނީ، އަށް ވިކެޓުން ހައިދަރުއާބާދު ބަލިކޮށްފަ އެވެ. މި ފަހަރުގެ އައިޕީއެލްގައި ކަލްކަތާ އިން ވަނީ މީގެ ކުރިން ވެސް ހައިދަރުއާބާދު ބަލިކޮށްފަ އެވެ.
ޗިދަމްބަރަމް ސްޓޭޑިއަމްގައި ރޭ ކުޅުނު މެޗުގައި، ރާޖަސްތާނުން ޓޮސް ދިމާވުމުން ނިންމީ ފީލްޑް ކުރާށެެވެ. ހައިދަރުއާބާދުން ކުޅެން އަރައި، 20 އޯވަރު ތެރޭގައި ނުވަ ކުޅުންތެރިން ނުބައިވެގެން ވަނީ 175 ލަނޑު ހަދައިފަ އެެވެ. މެޗުގައި، ހައިދަރުއާބާދަށް އެންމެ ރަނގަޅު ކުޅުމެއް ދައްކައިިދިނީ، 34 ބޯޅައިން 50 ލަނޑު ހެދި ހެއިންރިޗް ކްލާސެން އެވެ.
މި އިނިންގްސްގައި ރާޖަސްތާނުގެ ޓްރެންޓް ބޯލްޓް އާއި އަވޭޝް ހާން، ކޮންމެ ކުޅުންތެރިއަކު ތިން ވިކެޓް ނެގި އެވެ.
ޖަވާބުގައި ކުޅެން އަރައި، 20 އޯވަރުގެ ތެރޭގައި ރާޖަސްތާން ކުޅުންތެރިންނަށް، ހަތް ކުޅުންތެރިން ނުބައިވެގެން ހެދުނީ 139 ލަނޑެވެ. ރާޖަސްތާނަށް އެންމެ ރަނގަޅު ކުޅުމެއް ދެއްކީ، ދްރޫވް ޖުރެލް އެވެ. އޭނާ ވަނީ، ނުބައިނުވެ، 35 ބޯޅައިން 56 ލަނޑު ހަދައިފަ އެވެ. އެ ޓީމުގެ ތަރި، ޔަޝަޝްވީ ޖޭސްވާލް ނުބައިވީ، 21 ބޯޅައިން 42 ލަނޑު ހަދައިފަ އެެވެ.
ހައިދަރުބާދަށް މި އިނިންގްސްގައި އެންމެ ރަނގަޅު ކުޅުމެއް ދައްކައިދިނީ، ތިން ވިކެޓް ނެގި، ޝާހުބާޒް ހާން އެވެ.
މީގެ ކުރިން، 2016 ވަނަ އަހަރުގެ އައިޕީއެލްގެ ޗެމްޕިއަންކަން ހޯދި، ހައިދަރުއާބާދު ވަނީ 2018 ވަނަ އަހަރު ޗެންނާއި ސުޕަ ކިންގްސް އަތުން ފައިނަލުގައި ބަލިވެފަ އެވެ.
