ޕެރިސް (މެއި 24) - ފްރާންސް ގައުމީ ޓީމުގެ ފޯވާޑް، އޮލިވިއޭ ޖިރޫޑް، މި ފަހަރުގެ ޔޫރޯ ފުޓްބޯޅަ މުބާރާތަށް ފަހު، ފްރާންސް ޓީމަށް ކުޅުން ހުއްޓާލަން ނިންމައިފި އެވެ.
އުމުރުން 37 އަހަރުގެ ޖިރޫޑް، މި ސީޒަނަށް ފަހު، އެމެރިކާ ލީގުގެ އެލްއޭ އެފްސީ އަށް ބަދަލުވާން ދާދި ފަހުން ވަނީ ނިންމައިފަ އެވެ. އެލްއޭ އެފްސީ އަކީ ފްރާންސްގެ ކުރީގެ ކީޕަރު، ހޫގޯ ލޮރިސް ވެސް ކުޅެމުން އަންނަ ކްލަބް އެވެ.
ފްރާންސްގެ ލެކިއުޕޭ އަށް ދިން އިންޓަވިއުއެއްގައި ޖިރޫޑް ބުނީ، ހަގީގަތަށް ބުނާނަމަ މި ފަހަރުގެ ޔޫރޯ ފުޓްބޯޅަ މުބާރާތަކީ ގައުމީ ޓީމުން އޭނާ ފެންނާނެ ފަހު މުބާރާތް ކަމަށެެވެ.
"ދެން އަހަންނެއް ގައުމީ ޓީމު މުބާރާތަކުން ނުފެންނާނެ. މިއީ ޒުވާން ކުޅުންތެރިންނަށް ފުރުސަތު ދޭން ޖެހޭ ވަގުުތު،" ޖިރޫޑް ބުންޏެވެ.
ގައުމީ ޓީމަށް ކުޅުން ހުއްޓާލަން ޖެހޭކަން އިހުސާސް ކުރެވޭ އެންމެ ބޮޑު ސަބަބަކީ އުމުރުން ދުވަސްވާއިރަށް، ފިޒިކަލީ އެންމެ ރަނގަޅަށް ހުރުމަށް އިސްކަން ދޭން ޖެހޭ ކަމަށް ދެކިގެން ކަމަށް ޖިރޫޑް ވަނީ ބުނެފަ އެވެ. އެންމެ ފަހުން ބޭއްވި ފީފާ ވޯލްޑް ކަޕަށް ފަހު، ރަފައެލް ވަރާން، ފްރާންސަށް ކުޅުން ހުއްޓާލީ އަނިޔާގެ މައްސަލަ އާއި ފިޓްނަސްގެ ކަންކަމަށް ބަލާފައި ކަމަށް ހާމަކުރި އެވެ. ޖިރޫޑް ވަނީ ވަރާންގެ އެ ވިސްނުން ރަނގަޅު ކަމަށް ބުނެފަ އެވެ.
ޖިރޫޑް، އެންމެ ފުރަތަމަ ފްރާންސަށް މެޗެއް ކުޅުނީ 2011 ވަނަ އަހަރު އެވެ. ފްރާންސް ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތީ ޖިރޫޑް އަތުގަ އެވެ. ފްރާންސަށް ކުޅެދިން 131 މެޗުން ޖިރޫޑް ވަނީ 57 ލަނޑު ޖަހައިފަ އެވެ.
