އަހުމަދުއާބާދު، އިންޑިއާ (މެއި 23) - އިންޑިއަން ޕްރިމިއާ ލީގު (އައިޕީއެލް)ގެ ޕްލޭއޮފް އެލިމިނޭޓާ މެޗުގައި ހަތަރު ވިކެޓުން، ރޯޔަލް ޗެލެންޖާސް ބެންގަލޫރު ކަޓުވާލައި، ރާޖަސްތާން ރޯޔަލްސް އިން މުބާރާތުގައި ކުރިއަށް ދިއުމުގެ ފުރުސަތު ފަހިކޮށްފި އެވެ.
އާދިއްތަ ދުވަހު ކުޅޭ ފައިނަލުގައި ކަލްކަތާ ނައިޓް ރައިޑާސްއާ ދެކޮޅަށް ކުޅޭނެ ޓީމެއް ކަނޑައެޅޭނީ، ހުކުރު ދުވަހުގެރޭ، ސަންރައިޒާސް ހައިދަރުއާބާދާއި ރާޖަސްތާން ކުޅޭ ކޮލިފަޔާ މެޗުންނެވެ. ފުރަތަމަ ކޮލިފަޔާ މެޗުން، ކަލްކަތާ އިން ވަނީ ފަސޭހައިން ހައިދަރުއާބާދު ބަލިކޮށްފަ އެވެ.
މިރޭގެ މެޗަށް ނުކުތްއިރު، ރާޖަސްތާން އޮތީ އެންމެ ފަހުން ކުޅުނު ހަތަރު މެޗުން ވެސް ބަލިވެފަ އެވެ. މެޗަށް ނުކުތްއިރު، ބެންގަލޫރު ފޭވަރިޓެއްގެ ގޮތުގައި އޮތީ، އެންމެ ފަހުން ކުޅުނު ހަ މެޗުން މޮޅުވެފައިވާތީ އެވެ. އެކަމަކު، ރާޖަސްތާނުން ވަނީ މިރޭ ޓޮސް ދިމާވުމުން، ހޮވަން އަރައި، އެ ޓީމުގެ ޕްލޭނާ އެއްގޮތަށް ކުޅެ މެޗުން މޮޅުވެފަ އެވެ.
ބެންގަލޫރުން ފުރަތަމަ ކުޅެން އަރައި، 20 އޯވަރުގެ ތެރޭގައި، އަށް ކުޅުންތެރިން ނުބައިވެގެން ހެދުނީ، 172 ލަނޑެވެ. އެ ޓީމުން އެންމެ ރަނގަޅަށް ކުޅުނީ، 33 ލަނޑު ހެދި ވިރާތު ކޯލީ އާއި 34 ލަނޑު ހެދި ރަޖަތު ޕަތީދާރު އަދި 32 ލަނޑު ހެދި މަހިޕާލް ލޮމްރޯރް އެވެ.
މި އިނިންގްސްގައި، ރާޖަސްތާނުގެ އަވޭޝް ހާން ވަނީ ތިން ވިކެޓް ނަގައިފަ އެވެ.
ޖަވާބުގައި ކުޅެން އަރައި، ރާޖަސްތާނުން ވަނީ، ބާކީ ހަ ބޯޅަ އޮއްވައި، ހަ ކުޅުންތެރިން ނުބައިވެގެން، 174 ލަނޑު ހަދައި، މެޗުން މޮޅުވެފަ އެވެ.
ރާޖަސްތާން ޓީމަށް މި މެޗުގައި އެންމެ ރަނގަޅު ކުޅުމެއް ދެއްކި ދެ ކުޅުންތެރިއަކީ، 45 ލަނޑު ހެދި، ޔަޝަޝްވީ ޖައިސްވާލް އާއި 36 ލަނޑު ހެދި ރިހާން ޕަރާގް އެވެ. ރާޖަސްތާން މޮޅުވުމުގައި، ފަހު ވަގުތު، ރޮވްމަން ޕަވެލް ވަނީ މުހިންމު ލަނޑުތަކެއް ހަދައިފަ އެވެ.
މި އިނިންގްސްގައި، ބެންގަލޫރުން އެންމެ ރަނގަޅު ކުޅުމެއް ދެއްކީ، ދެ ވިކެޓް ނެގި މުހައްމަދު ސިރާޖު އެވެ.
ބެންގަލޫރު މި މެޗުން ބަލިވެ، އައިޕީއެލް ތަށި ހޯދަން ކުރާ އިންތިޒާރުދިގުލައިދިޔައިރު، ރާޖަސްތާނުން ދެ ވަނަ ފަަހަރަށް މުބާރާތުގެ ތަށި ހޯދަން ކުރާ އުންމީދު ވަނީ އާ ވެފަ އެވެ.
އައިޕީއެލް އެންމެ ފުރަތަމަ ބޭއްވި އަހަރު، 2008 ވަނަ އަހަރުގެ ސީޒަނުގައި ތަށި އުފުލާލީ ރާޖަސްތާނުންނެވެ. އެ ފަހުން، އެ ޓީމުން 2022 ވަނަ އަހަރުގެ ފައިނަލުގައި ކުޅުނެވެ. އެކަމަކު، ގުޖުރާތު ޓައިޓަންސް އަތުން ބަލިވީ އެވެ.
