މިއުނިކް (މެއި 21) - ޔޫރޯ ފުޓްބޯޅަ މުބާރާތަށް ފަހު، ޓޯނީ ކްރޫސް، ޕްރޮފެޝަނަލް ފުޓްބޯޅަ އިން ރިޓަޔާކުރަން ނިންމާފައިވާ ކަމަށް އިއުލާނުކޮށްފި އެވެ.
އުމުރުން، 34 އަހަރު ކްރޫސްގެ މި ނިންމުން އޭނާ ހިއްސާކޮށްފައިވަނީ، އިންސްޓަގްރާމްގައި ކުރި ޕޯސްޓެއްގަ އެވެ.
މީގެ ދެ މަހެއްހާ ދުވަސް ކުރިން ކްރޫސް ވަނީ އަންނަ ސީޒަނަށް ރެއާލް މެޑްރިޑްގެ ކޮންޓްރެކްޓް އާ ކޮށްފަ އެވެ. އަދި މީގެ ތިން މަސް ކުރިން، ކްރޫސް ވަނީ ގައުމީ ޓީމަށް ކުޅެން ހުއްޓާލަން ނިންމި ނިންމުން ބަދަލުކޮށް، މި ފަހަރުގެ ޔޫރޯ ކުޅެން އެނބުރި ޓީމާ ގުޅިފަ އެވެ. ކްރޫސް، ޖަރުމަނު ޓީމަށް ކުޅުން ހުއްޓާލީ، އެންމެ ފަހުން ޔޫރޯ އަށް ފަހު، 2021 ވަނަ އަހަރު އެވެ.
ކްރޫސް، މިއަދު އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، އަބަދުވެސް ކުޅުން ހުއްޓާލަން ބޭނުންވީ ކެރިއަރުގެ އެންމެ ޕީކުގައި ހުރެ ކަމަށާއި އެ ގޮތަށް ވިސްނާއިރު މި ފަހަރުގެ ޔޫރޯ އަށް ފަހު ކުޅުން ހުއްޓާލުން އެއީ އެންމެ ރަނގަޅު ގޮތް ކަމަށް ފެންނަ ކަަމަށެވެ.
"އަހަރެން ވަރަށް އުފަލުން މި ހުރީ މި ނިންމުން މިހާ ރަނގަޅަށް ނިންމަން ރަނގަޅު ވަގުތެއްގައި މިކަން ކުރެވުނީތީ،" ކްރޫސް ބުންޏެވެ.
ޖަރުމަނުން 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގައި މޮޅު ކުޅުމެއް ދެއްކި، ކްރޫސް ވަނީ މިހާތަނަށް ޖަރުމަނު ޓީމަށް 106 މެޗު ކުޅެފަ އެވެ.
ކްލަބް ކެރިއަރަށް ބަލާއިރު، ބަޔާން މިއުނިކާއި ބަޔާ ލެވަކޫސަނަށް ކުޅުނު ކްރޫސް، މިހާރުގެ ކްލަބް، ރެއާލަށް ބަދަލުވީ، 2014 ވަނަ އަހަރު ޖުލައި މަހުގަ އެވެ. ބަޔާނާ އެކު، 10 ތަށި އުފުލާލި ކްރޫސް ވަނީ ރެއާލަށް ބަދަލުވުމަށް ފަހު އެ ޓީމާ އެކު، 21 ތަށި ކާމިޔާބުކޮށްފަ އެެވެ. އޭގެ ތެރޭގައި، ޗެމްޕިއަންސް ލީގު، ހަތަރު ފަހަރު އަދި ކްލަބް ވޯލްޑް ކަޕް ފަސް ފަހަރު ކާމިޔާބުކުރުން ހިމެނެ އެވެ.
ކްރޫސް، ރެއާލަށް ކުޅޭ ފަހު މެޗަކަށްވާނީ ބޮރޫޝިއާ ޑޯޓްމަންޑާ ދެކޮޅަށް ކުޅޭ ޗެމްޕިއަންސް ލީގުގެ ފައިނަލް މެޗެވެ.
