މިއުނިކް (މެއި 21) - އާ ކޯޗަކު ހޯދަން ބަޔާން މިއުނިކުން ކުރާ މަސައްކަތުގައި، އެ ޓީމުން ގެންގުޅޭ ކޯޗުންގެ ޝޯޓްލިސްޓުގައި ބާންލީގެ ކޯޗު ވިންސެންޓް ކޮމްޕެނީ ހިމެނޭ ކަމަށް މީޑިއާ ރިޕޯޓްތައް ބުނެފި އެވެ.
ބަޔާންގެ ކޯޗަކަށް މި ވަގުތު ހުރި، ތޯމަސް ޓުޗެލް އެ ޓީމު ދޫކޮށްލާނެކަން މީގެ ދެ މަހެއްހާ ކުރިން އިއުލާނުކޮށްފައިވާއިރު، އޭނާ މަޑުކުރުވަން އެ ޓީމުން ފަހުން އެކި ފަހަރު ވާހަކަ ދެއްކިޔަސް އެ ނިންމުމަށް ބަދަލެއް ނާދެ އެވެ.
އާ ކޯޗެއް ހޯދުމުގެ މަސައްކަތުގައި ބަޔާނުން ވާހަކަ ދެއްކި ކޯޗުންނަށް ބަލާއިރު، ޖަރުމަނުގެ ކޯޗު ހޫލިއަން ނާގަލްސްމަން ވަނީ އެ ޓީމުގެ ކޮންޓްރެކްޓް އާ ކޮށްފަ އެވެ. އޮސްޓްރިއާ ގައުމީ ޓީމުގައި ހުރި، ރަލްފް ރަންގްނިކް ވެސް ބަޔާނާ މަޝްވަރާކުރި އެވެ. އެކަމަކު، ރަންގްނިކް ނިންމީ އޮސްޓްރިއާގައި މަޑުކުރާށެވެ. ސްޕޯޓިން ލިޒްބަންގެ ކޯޗު ރުބެން އަމޮރިމް އާއި ބަޔާ ލެވަކޫސަންގެ ކޯޗު، ޒަބީ އަލޮންސޯއާ ވެސް ބަޔާުނުން ވާހަކަ ދެއްކި އެވެ. އެކަމަކު، އޭގެއިން ކޯޗެއް ވެސް ބަޔާނާ ހަވާލުވާން މި ވަގުތު ބޭނުމެއް ނުވި އެވެ.
މީޑިއާ ރިޕޯޓްތައް ބުނާގޮތުން، ބަޔާނުން ވަނީ ދާދި ފަހުން ޕްރިމިއާ ލީގުން ރެލިގޭޓްވި ބާންލީގެ ކޯޗު، ކޮމްޕެނީއާ ވާހަކަ ދައްކަން ނިންމައިފަ އެެވެ. ކޮމްޕެނީ، 28، މި ވަގުތު، 2028 ވަނަ އަހަރުގެ ޖޫންގެ ނިޔަލަށް ބާންލީގެ ކޮންޓްރެކްޓްގައި ހުރިއިރު، އޭނާ ވަނީ މަގާމުގައި ހުރުމާ މެދު ގޮތެއް ނިންމާނެ ކަމަށް ދާދި ފަހުން ބުނެފަ އެވެ.
ބާންލީއާ ހަވާލުވުމަށް ފަހު، ކޮމްޕެނީ އެ ޓީމު، ޕްރިމިއާ ލީގަށް ޕްރޮމޯޓްކޮށްދިނީ، ދެ ވަނަ ޑިވިޝަނުގެ ޗެމްޕިއަނުންގެ ގޮތުގަ އެވެ. އެކަމަކު، ބާންލީ ވަނީ، ލީގުގެ 19 ވަަނައިގައި ނިންމާލަން ޖެހި ރެލިގޭޓްވެފަ އެވެ.
ބާރަ އަހަރު ތެރޭ ފުރަތަމަ ފަަހަރަށް ބަޔާނަށް ޖަރުމަނު ލީގުގެ ތަށި ގެއްލުނު މި ސީޒަނުގައި އެ ޓީމުން ނިންމާލަން ޖެހުނީ، ލީގުގެ ތިން ވަނައިގައި އޮވެ އެވެ. އާ ކޯޗެއްގެ އިރުޝާދުގެ ދަށުން ބަޔާންގެ ގިނަ ކަންތައްތަކެއް ބަދަލުކުރަން އެ ކްލަބްގެ ބޯޑުން ވަނީ ނިންމައިފަ އެެވެ.
